Almatyda Zamanbek Nurqadilovtiń 80 jyldyǵyna oraı eske alý asy ótti, dep habarlaıdy "Adyrna" tilshisi.
Memleket jáne qoǵam qaıratkeri, saıasatker Zamanbek Nurqadilovtiń týǵanyna 80 jyl tolýyna oraı Almatyda as berildi. Jıyn barysynda saıasatkerdiń ómir súrgen jyldaryndaǵy estelikteri aıtylyp, týǵan aýylyna eskertkish qoıylatyny da aıtyldy.
Eske alý jıynyna Prezıdenttiń keńesshisi ári Baspasóz hatshysy Berik Ýálı arnaıy qatysyp, Memleket basshysy Qasym-Jomart Toqaevtyń jazǵan hatyn oqyp berdi.
"Qurmetti qaýym! Bıyl belgili memleket jáne qoǵam qaıratkeri Zamanbek Nurqadilovtiń týǵanyna 80 jyl toldy. Táýelsiz Qazaqstan tarıhynda el múddesi úshin aıanbaı eńbek etken azamattar az emes. Zamanbek Qalabaıuly – osyndaı tuǵyrly tulǵalardyń biri. Ol egemendiktiń alǵashqy kezeńinde kóptegen jaýapty qyzmetti abyroımen atqardy. Memlekettigimizdi nyǵaıtýǵa aıryqsha atsalysyp, óńirlerdi órkendetýge zor úles qosqany daýsyz. Ult perzentteriniń esimin el jadynda jańǵyrtyp, eńbegine laıyqty baǵa berý – urpaq paryzy. Osy oraıda, Zákeńniń týǵan jeri – Almaty oblysynyń Kegen aýdanynda oǵan eskertkish ornatý jáne Almatydaǵy turǵan úıinde eskertkish-taqta ashý qajet dep sanaımyn. "Tarıh – tarazy" dep beker aıtylmaǵan. Halqymyzdyń kesek tulǵaly azamatynyń elge sińirgen eńbegi eshqashan umytylmaıdy. Barshańyzǵa zor densaýlyq, baq bereke tileımin! Elimiz aman, jurtymyz tynysh bolsyn!", – delingen hatta.
Memleket jáne qoǵam qaıratkeri Zamanbek Nurqadilov ómiriniń sońyna qaraı oppozıııalyq saıasatker retinde kópshilik esinde qaldy. Ol sol kezdegi prezıdent Nursultan Nazarbaevty ótkir synaıtyn. 2005 jyly óz úıinde belgisiz jaǵdaıda qaza tapqan onyń óliminiń syry áli ashylǵan joq. Resmı habarlarda "óz-ózin qarýmen birneshe márte atty" delindi. 15 qańtar - saıasatkerdiń týǵan kúni.
