19 qyrküiek künı Adyrna ūlttyq portalynda «SQO-daǧy sport mektebı 19 955 357 teŋgege 1 dana «qaraqūiryq» satyp almaq» degen maqala jariialanǧan edı. Sol syni maqalaǧa SQO äkımdıgınıŋ dene şynyqtyru jäne sport basqarmasynyŋ basşysy S.Melehov jauap berdı, - dep habarlaidy Adyrna tılşısı.
Atalǧan maqalada basqarma «Sport mektebıne qaraqūiryq satyp alu» degen ataumen tender jariialaǧanyn, tehnikalyq sipattamada memlekettık tılde bır auyz söz de jazylmaǧanyn, taqyryptaǧy «qaraqūiryq» degennıŋ audarmasy mikroavtobus ekenın, «Taiynşa audanynyŋ balalar men jasöspırımder sport mektebı» 19 955 357 teŋgege memlekettık tıldı aiaqqa taptap, jaŋa mikroavtobus satyp alǧaly otyrǧanyn synaǧan edık.
Synap qana qoimai tiıstı mekemege tömendegı sūraqtardy da joldadyq.
1. Soltüstık Qazaqstan oblysynyŋ Dene şynyqtyru jäne sport basqarmasynda memlekettık tıldı bıletın bırde-bır maman joq pa?
2. Soltüstıktıŋ şeneunıkterı mikroavtobusty qaraqūiryq dep audaryp, qazaq tılın masqaralamaq pa?
3. Tehnikalyq sipattamnyŋ qazaqşa nūsqasy nege joq? Basqarma memlekettık tıldı şettetıp, tıl turaly Zaŋdy öreskel būzyp otyrǧan joq pa?
Būl üş sūraqqa SQO äkımdıgınıŋ dene şynyqtyru jäne sport basqarmasynyŋ basşysy S.Melehov:
«2024 jyldyŋ 11 qaŋtarynda «Taiynşa audanynyŋ balalar men jasöspırımder sport mektebı» kommunaldyq memlekettık mekemesı tarapynan memlekettık satyp alu portalynda №11265812-1 «Sport mektebıne qaraqūiryq satyp alu» jönındegı habarlandyru jariialanǧan. Habarlandyrudy jariialau kezınde «Taiynşa audanynyŋ balalar men jasöspırımder sport mektebı» kommunaldyq memlekettık mekemesı konkurstyq qūjattamaǧa tehnikalyq sipattamasynyŋ memlekettık tıldegı nūsqasyn tırkemei, habarlandyru atauyn dūrys körsetpegen. Osynyŋ saldarynan äleuettı önım beruşılerdı jaŋylystyrdy.
«Taiynşa audanynyŋ balalar men jasöspırımder sport mektebı» kommunaldyq memlekettık mekemesı zaŋ būzuşylyqtardy joiu boiynşa şaralar qoldanyp, körsetılen satyp aludyŋ küşı joiyldy.
Alda barlyq eskertuler tüzetılıp, habarlandyru memlekettık satyp alu portalynda qaita jariialanatyn bolady. Körsetılgen eskertuler «Soltüstık Qazaqstan oblysy äkımdıgınıŋ dene şynyqtyru jäne sport basqarmasy» kommunaldyq memlekettık mekemesınıŋ barlyq baǧynysty ūiymdaryna qarastyru üşın jıberıldı, olarmen aldaǧy uaqytta joǧaryda atalǧan faktılerdıŋ oryn aluyna jol bermeu jūmystary jürgızıldı» dep jauap qatypty.
Mikroavtobusty «qaraqūiryqpen» şatystyryp, memlekettık tıldı masqaralap otyrǧan mekeme qyzmetkerlerıne qandai jaza qoldanylǧany jauapta jazylmapty. Söitse de, qatelıktıŋ tüzetılgenı kışkene bolsa da köŋılge medeu...
Qanat Bırlıkūly
Adyrna ūlttyq portaly
