Almaty oblysynda Berdibek Soqpaqbaevtyń eskertkishi boı kótermek. Bul týraly óńir ákimi Qýat Sultanǵazıv jazýshynyń 100 jyldyq mereıtoıynyń saltanatty sharasynda aıtty, dep habarlaıdy «Adyrna» tilshisi.
«Prezıdentimiz Qasym-Jomart Kemeluly Toqaev tól ádebıetimizdiń damýyna erekshe kóńil bólip keledi. Osy oraıda ádebıetimizdiń birtýar tulǵasy Berdibek Soqpaqbaevtyń mereıtoıyn týǵan ólkesinde keń kólemdi atap ótý prezıdenttiń rýhanııat salasyndaǵy saıasatyn qoldaý dep bilemiz.
Raıymbek aýdanynyń ortalyǵy – Narynqol aýylyndaǵy Berdibek Soqpaqbaevtyń aty beriletin saıabaqta jazýshynyń eńseli eskertkishi boı kóteretin bolady»,—dedi ol.
Ákim aldaǵy ýaqytta budan bólek birneshe jumystyń atqarylatynyn atap ótti.
«Narynqoldaǵy Berdibek Soqpaqbaev atyndaǵy mektep-gımnazııaǵa aǵymdaǵy jóndeý jumystaryn júrgizý, mekteptegi jazýshynyń mýzeıin zamanaýı úlgide jabdyqtaý, mektep aldynda ornalasqan jazýshynyń bıýstin qaıta jasaý syndy birqatar jumystar josparlanǵan. Qalamgerdiń týǵan aýyly – Qostóbe abattandyrylyp, ınfraqurylymy jóndeledi. Berdibekteı birtýar jazýshyǵa qurmet kórsetý isi týǵan aýdanymen ǵana shektelip qalmaýy kerek dep oılaımyn. Máselen, qalyń buqara qoldap jatsa, oblystyq kitaphanaǵa Berdibek Soqpaqbaev esimin berýdi usynamyn. Bul bastamany jaýapty mekemeler jyl sońyna deıin júzege asyrady dep úmittenemin»,—dep tolyqtyrdy Sultanǵazıv.
