Atadan balaǵa jetip, qanshama urpaqtyń qulaq quryshyn qandyrǵan dástúrli án-jyrymyz babalar tarıhyn, muńy men armanyn arqalaǵan aqparatqa toly ekeni sózsiz. Biraq ókinishke qaraı, búgingi urpaqtyń boıyna biz osynaý asyl nárimizdi tolyq sińire almaı kelemiz. Óıtkeni halyq ánderi sekildi baǵa jetpes baılyǵymyzdyń nasıhaty az. «Atameken» óner ordasynyń uıymdastyrýymen ótken «Muhıttyń muragerleri» atty batys dástúrli án mektebi ókilderiniń óner keshi dástúrli ándi, syrly áýendi, syrshyl sezimdi ańsaǵan halyqtyń káýsaryn qandyrdy.
Oral qalasyndaǵy «Atameken» óner ordasyna jıylǵan jurtshylyq aldymen oblystyq halyq shyǵarmashylyǵy ortalyǵy men oblystyq tarıhı-ólketaný mýzeıi jasaqtaǵan kórmeni tamashalady. Kórmege qoıylǵan Jaıyq topyraǵynan túlep ushqan tarıhı tulǵalardyń aspaptarynyń kóshirmeleri jáne tutynǵan kıimderi tańdaı qaqqyzdy.
Ulttyq ónerge shólirkegen halyqtyń kóptigi sonshalyq, zalda ıne shanshar jer tabylmady. Keshtiń tizginin ustaǵan aqyn Baýyrjan Shırmedınuly qara sózdiń maıyn tamyzyp, rýhanı keshtiń shyraıyn kirgizdi. Konertte ataqty Hatımolla Berdiǵalıev, Serik Abdrahmanov, Saǵadat Rahmetjanov, Ashat Orazov, Sáýle Taýdaeva, Zııash Amanǵalıev, Kúlásh Qýanyshqalıeva, Qaırat Kákimov, Jaqsylyq Eslamǵalıev, Farhat Orazov, Aqmaral Kemelhanova, Dastan Esentemirov, Aıjan Muhametjanova, Beıbit Qajyǵalıev, Armat Aldamjarov, Ernar Ómiráli, Danııar Eleýov, Nazgúl Qabıeva, Nuraly Aıtýǵanov áýeletip án salǵanda, tyńdarmandar siltideı tyndy. Talaı ǵasyrdyń súzgisinen ótip, qaımaǵy buzylmaı búginge jetken dástúrli án-kúıdiń tarıhy tereńnen tamyr tartady. Dástúrli án aıtý óneri basqa janrlarmen salystyrǵanda qurylymy ózgeshe ekenin shyn uǵyndyrdy. Kesh boıy ulttyq týyndylardy tyńdap, qulaq quryshyn qandyrǵan kórermen qaýym oryndaýshylardan qoshemetterin aıaǵan joq. Kórermenniń qıqýy dástúrli ánshilerge shynaıy shabyt syılady.
Jyr keshinde sóz alǵan oblys ákimi Narıman Tóreǵalıev qazaq dalasy jýsanyn jel terbese de, qýraıyna shymshyq qonsa da án men kúı tógilip qoıa beretin ǵajaıyp ereksheligimen belgili ekenin, myńdaǵan jyldar boıy en dalany terbep kele jatqan ulttyń osynaý saf óneri eshqashan kómeski tartpaıtynyn tilge tıek etip, bolashaqta bul jobanyń Astana, Almaty tórlerinde ótýine yqpal etetinin jetkizdi.
Kesh sońynda «Habar» arnasy men «Assyltas» qoǵamdyq qory uıymdastyrǵan «ASYL DOMBYRA-2023» telejobasynda bas báıgeni jeńip alyp, óńir abyroıyn asqaqtatqan BQO aqyndar komandasyna «Asyl dombyra» saltanatty túrde tabystaldy. Aıtys óneriniń janashyry, Qazaqstannyń eńbek sińirgen qaıratkeri Júrsin Erman: – 20 oblystyń arasynan Batys Qazaqstan oblysynyń aqyndary top jaryp, bas báıgeni qanjyǵalady. Oblys basshysy Narıman myrzadan, óner janashyrlarynan súıinshi suraı keldik. Eńsesi bıik, rýhy asqaq eldiń aqyndary ǵana top jara alady. Jaıyqtyń ulandarynyń mereıli jetistigi. Jaıyqtyń Jansaıasyn kim jaqsy kórmeıdi? «Altyn dombyra» men «Asyl dombyrany» qatar alǵan aqyn Qazaqstanda joq. Aıtysqa qatysqan úsh aqynnyń biri Jansaıa bolsa, biri qaq tórimizde ónerpazdardyń mereıin ústem etip turǵan Baýyrjan Shırmedınuly, endi biri talanty jarqyrap, halyqtyń súıispenshiligine bólenip júrgen Muradym Mırlanov. Osy shabystaryńnan tanbańdar. Bul san túrli óner tulǵalaryn túletken Oral ǵoı. Baqtaryń taımasyn! –dep jeńimpaz aqyndarǵa aq batasyn berdi.
Keshtiń qurmetti qonaqtary, Memlekettik syılyqtyń ıegeri Ǵalym Jaılybaı, «Habar agenttigi» akıonerlik qoǵamynyń Basqarma Tóraǵasy Kemelbek Oıshybaev, «Assyltas» qoǵamdyq qorynyń tóraǵasy, meenat Dýlat Tastekeı «Asyl dombyrany» BQO ákimi Narıman Tóreǵalıevke tabystasa, óńir basshysy bas júldeni ıelengen jerlesterimizdiń jeńisi – mádenıet salasyndaǵy aýqymdy isterdiń jemisi ekendigin atap ótip, eldiń mereıin ústem etken Jansaıa Mýsına, Muradym Mırlanov, Baýyrjan Shırmedınulyna usyndy.
Aıta keteıik, batysqazaqtandyqtardyń abyroıyn asqaqtatyp, mereıin tasytqan «Asyl dombyra» «Atameken» óner ordasynyń kire berisine qoıylyp, óner ordasyna sabylatyn qala turǵyndary men qonaqtarynyń kóz qýanyshyna aınalatyn boldy.
Káýsar BAIǴALIEVA,
«El jáne muǵalim»
