Qyrǵyzstanda prezıdent saılaýy 2027 jyly ótedi. Bul saılaýǵa qazirgi memleket basshysy Sadyr Japarov qatysa ma degen suraqqa prezıdenttiń baspasóz hatshysy Asqat Alagózov jaýap berdi, dep habarlaıdy “Adyrna” ulttyq portaly.
“Iá, prezıdent Sadyr Japarov ekinshi merzimge úmitker bolady", - dedi Memleket basshysynyń baspasóz hatshysy Asqat Alagózov 24.kg saıtyna bergen jaýabynda.
"Bizdiń elimiz úshin strategııalyq mańyzy bar uzaq merzimdi Halyqaralyq jobalar iske qosylatynyn jáne josparlanatynyn eskere otyryp, Sadyr Japarovtyń ekinshi merzimge saılaýǵa qatysýy saıasattaǵy dáıekti qadam bolady", — dep túsindirdi ol.
Aıta keteıik, buǵan deıin Sadyr Japarov 2020 jyldyń 10 qazanynan 2021 jyldyń 21 qańtaryna deıin eldiń premer-mınıstri bolǵan. 2021 jyldyń 28 qańtarynan bastap Qyrǵyz Respýblıkasynyń prezıdenti bolyp saılandy.
“Adyrna” ulttyq portaly
