Halyq pıkırın eskere otyryp, atom elektr stansiiasyn saluǧa bailanysty şeşım qabyldanady" dedı Qazaqstannyŋ energetika ministrı Qanat Bozymbaev 20 mausymda tūrǧyndarǧa esep beru jiynynda. Būl aqparatty memlekettık aqparat agenttıkterı habarlady.
"Halyq pıkırın eskeru degenımız ne? Būl halyq arasynda saualnama jürgızu nemese referendum ötkızu. Sondyqtan alaŋdamaŋyzdar: eger AES salynsa, mındettı türde ol jaily estisızder, bılesızder. Halyq öz pıkırın aitady. Eger "joq" dese, eşkım eşteŋe salmaidy. Sız ben bız Semei synaq poligonyn bastan ötkerdık, mūny jaqsy tüsınemız. Qanşama adam zardap şektı. Būl jady - ony "gendık jady" dep ataimyz. Būl qoǧamda AES-tıŋ salynbauyn qoldaityn köŋıl-küidı qalyptastyryp otyr. Qalai bolǧanda da, AES salu boiynşa jospar, şeşım qabyldanǧan joq" dedı ministr.
Būǧan deiın jergılıktı aqparat agenttıkterı "Qazaqstanda AES salu boiynşa tender jariialanǧanyn", "bırqatar halyqaralyq kompaniialardyŋ oǧan qatysudy josparlap otyrǧanyn" habarlaǧan. (Būl aqparatqa bailanysty Azattyq tılşısı 6 mausymda energetika ministrlıgıne resmi saual jıbergen. Bıraq äzırge jauap kelmedı). Būl aqparatty meŋzegen ministr eger qandai da bır şetel ūiymdary ne kompaniialar tüsınıkteme berse, būl olardyŋ Qazaqstanǧa öz önımın satqysy kelgenınen habar beredı degen.
Säuır aiynyŋ basynda Reseige saparlap barǧan Qazaqstan prezidentı Qasym-Jomart Toqaevpen kezdesude prezident Vladimir Putin Qazaqstanda "reseilık tehnologiia" boiynşa AES salu turaly ūsynys aitqan. Būl äleumettık jelıde qyzu talqylanyp, qoldanuşylar ärtürlı pıkır bıldırgen.
Kelesı künı energetika vise-ministrı Maǧzūm Myrzaǧaliev stansiia qūrylysyna qatysty naqty şeşım qabyldanbaǧanyn, alaida atom elektr stansiiasy ornalasuy mümkın aumaq retınde Kurchatov qalasy men Ülken auylyn ataǧan.
Elde mamyr aiynda bolǧan narazylyq şaralarynda özge ūrandarmen qatar "AES salynbasyn!" degen talap ta bolǧan. Būǧan deiın astanalyq belsendı Bolatbek Bılälov AES jobasyna qarsy narazylyq şarasyn ötkızuge oqtalyp, 15 künge qamalyp şyqqan.
"Azattyq" radiosy