Qazaqstan mūsylmandary Dıni basqarmasy «imam» jolauşy men taksişı arasynda bolǧan janjalǧa qatysty mälımdeme jasady, dep habarlaidy «Adyrna» tılşısı.
Būǧan deiın äleumettık jelıde taksi jürgızuşısı men er adamnyŋ janjaldasyp jatqan videosy taraǧan edı. Jelı qoldanuşylary «Allahu akbar, audarylyp qal!» degen auyr sözdı aitqan adam Güldala auylyndaǧy meşıttıŋ imamy ekenın jazǧan bolatyn.
Alaida müftiiat būl aqparatty joqqa şyǧardy.
«Būqaralyq aqparat qūraldary men äleumettık jelılerde Bahtiiar Jaqsylyqov esımdı azamattyŋ taksi jürgızuşısımen kikıljıŋge kelıp, dörekı äreket körsetkenı jäne onyŋ «imam» ekenı talqylanuda.
Osy oraida Bahtiiar Jaqsylyqovtyŋ Qazaqstan mūsylmandary dıni basqarmasynyŋ qyzmet jüiesınde jūmys ıstemeitının resmi türde mälımdeimız. Sondai-aq būqaralyq aqparat qūraldary ökılderı men äleumettık jelı qoldanuşylarynan anyqtalmaǧan habardy taratpauyn sūraimyz»,—delıngen habarlamada.
