Ýkraına tarapynyń bastamasy boıynsha Qasym-Jomart Toqaev Vladımır Zelenskıımen telefon arqyly sóılesti, dep habarlaıdy «Adyrna» tilshisi Aqordaǵa silteme jasap.
Áńgimelesý barysynda Ýkraına prezıdenti Qazaqstannyń qoǵamdyq uıymdary arqyly eline kórsetilgen gýmanıtarlyq kómegi úshin Memleket basshysy Qasym-Jomart Toqaevqa rızashylyǵyn bildirdi. Sondaı-aq taıaýda Davosta (Shveıarııa) 80-nen astam eldiń ókilderi qatysqan «beıbitshilik formýlasy» atty kezdesýdiń qorytyndysy jáne Shveıarııada ótetin kezekti jahandyq sammıtke daıyndyq barysy jóninde jan-jaqty málimet berdi.
Sonymen qatar memleketter basshylary Qazaqstan men Ýkraına arasyndaǵy gýmanıtarlyq, saýda-ekonomıkalyq baılanystardy damytý máselelerin talqylady.