Jurnalist Aslan Qajenovke Astanada küres türlerınen ötıp jatqan Qazaqstan bırınşılıgınen habar taratuǧa kedergı keltırılgen. Būl turaly BAQ ökılınıŋ özı Facebook jelısındegı paraqşasynda aitty, dep habarlaidy «Adyrna» tılşısı.
«Qazır Astanada küres türlerınen Qazaqstan chempionaty ötıp jatyr. Ol bastalmai tūryp, ülken dau būrq ettı. Işkı bırınşılıkke legionerler qaptai bastady. Taǧy da kelıp qosylady degen sybystar bar. Federasiia tarapynan resmi tüsındırme bolmady. Äleumettık jelıdegı qyzu pıkırtalasqa nükte qoiylmady. Älı künge deiın ne bolyp jatqanyn bılmeimız. Kımnen sūraimyz? Nege kelımsekter köbeidı? Tüpkı maqsat qandai?
Endı bügın sol kelımsekterdı öz közımmen köreiın dep jekpe-jek saraiyna arnaiy bardym. Final aldyndaǧy bırer saǧattyq üzılıs eken. Osy fotoǧa tüsıp ülgergenım joq, basy-qasynda jürgender quyp şyqty. Tura maǧynasynda quyp şyqty. Qasymdaǧy ärıptesım sol sättı telefonǧa tüsırgısı kelgen edı. Onyŋ ūialy qūrylǧysyn tartyp aldy. Işındegı videony tazalady. Ne masqara mynau? Ne äreket būl?
Jabaiy emespız, qylmysker emespız. Sözdıŋ retın de tüsınemız. Qazaqstan chempionatynan habar tarata almasaq, nesıne qazaq jurnalistı bolyp jürmız? Nebır qūrlyqtyq jäne älemdık alamandardyŋ ortasynda boldym. Bükıl jerde etika bar. Ötınış, jıgıtterge aityp qoiyŋyz, aşularyn bır jerlerıne tyǧyp qoisyn. Ary-berı itermelep, telefonymyzdy tartyp alatyndai loh emespız. Aitpaqşy, älgı video öşırılgen joq. Zamanaui telefondardyŋ sondai qasietı bar. Ony da eskertıŋız»,—dedı ol.
Sport jurnalisı Mäjılıs deputaty Däulet Tūrlyhanovtan ülken ümıt kütkenın jetkızdı.
«Odan keiın keşe Mäjılıste sportqa qatysty zaŋ jobasy talqylandy. Aşyǧyn aitaiyn, sızden (Däulet Tūrlyhanov — red.) ülken ümıt küttım. Öitkenı, basqa-basqa, otandyq sporttyŋ bylyǧy men şylyǧyn betıne şyǧaryp, retteudı ūsyna alatyn sanauly adamdardyŋ bırısız. Mälımdemeŋızden keiın älgı ümıt su sepkendei basyldy. Bukmekerlık kompaniiaǧa qatysty «ne ot horoşei jizni» degen pıkır bıldırdıŋız. Qarjynyŋ tapşylyǧymen tüsındırdıŋız. Küres federasiiasyna byltyrdyŋ özınde memleketten 150 million teŋgeden asa qarjy bölıngen. Ony qaida jūmsadyŋyz? Esebın kım beredı? Onyŋ özı jetkılıksız be? Aşyq aitsaŋyzşy. Al, endı jetkılıktı bolsa, onda nege federasiia OLİMPBET-pen kelımşart jasasty?
Būl endı özıŋızdıŋ qūzıretıŋızge kıretın, şeşıluı qolyŋyzdan keletın negızgı mäseleler. Odan bölek, sportşylardyŋ, bapkerlerdıŋ jäne küres ainalasynda jürgen mamandardyŋ tüiıtkılderı jetedı. Ony da jiı estimız. Ūlttyq qūramanyŋ daiyndyǧy jäne kürestıŋ damu jüiesıne qatysty da sūraq köp. Bıraz adam «Däulet aǧa azamat qoi, qazaqtyŋ batyry ǧoi, oǧan tiıspei-aq qoişy» - dep habarlasady. Men sızdıŋ jeke basyŋyzda eşqandai şaruam joq. Kezınde el namysyn qorǧap, abyroiymyzdy asqaqtatqanyŋyzdy baǧalaimyn. Bıraq, endı otandyq kürestı sūrauǧa qaqymyz bar şyǧar? Işkı bırınşılıkke emın-erkın kırıp, nege qalyŋ qazaq janküierıne aqparat tarata almaimyz? Tüsınemın, tärtıp bar. Boluy da kerek. Bıraq, şaş al dese, bas aludy qaşan qoiamyz? Otandyq sportty, onyŋ ışınde, otandyq kürestı qalai damytamyz? Qalai bır jolǧa qoiamyz? Naqty jospar men strategiia bar ma? Älde, tek legionerlerge senemız be? Däulet myrza ne deisız? Jalpy ne ıstep jürsız?!»—dedı Aslan Qajenov.
