Búgin, 10 aqpan aqyn, aýdarmashy Hamza Abdýllınniń týǵan kúni.
Hamza Abdýllın 1919 jyly Soltústik Qazaqstan oblysynyń Býlaev aýdanynda dúnıege kelgen.
Aýdarmashy grýzın aqyny Shota Rýstavelıdiń «Jolbarys tondy jıhankez»aýdarmasymen tanymal.
Aqynnyń alǵashqy óleńderi, ocherkteri, áńgimeleri men feletondary 1936 jyldan bastap baspasóz betinde jaryq kóre bastaǵan. 1940 jyly Búkilqazaqstandyq ádebı konkýrsta «Shoıyn jolda» atty dastany jeńiske jetken.
1937-1940 jyldary Almatydaǵy Kommýnıstik Jýrnalıster ınstıtýtynda oqyp, ony tamamdaǵannan keıin, «Soıalıstik Qazaqstan» gazetinde, Soltústik Qazaqstan oblystyq gazetinde, «Jańa fılm» jýrnalynda bólim meńgerýshisi qyzmetin atqarady.
1941 jyly áskerge alynyp, Uly Otan soǵysyna qatysady. Soǵystyń alǵashqy jyldarynda tutqynǵa túsip, konlagerdiń taýqymetin basynan ótkeredi. Keıin Mustafa Shoqaı uıymdastyrǵan Túrkistan legıonynyń qatarynda bolady.
Aqyn óziniń Ekinshi dúnıejúzilik soǵysta tutqynǵa túsip, Túrkistan legıonynda bolǵanyn, onda da qýdalanǵanyn, keıinnen Berlındegi Máýlikesh Qaıbaldınmen kezdesýden keıin “Saıran” bolyp óleń shyǵaryp júrgeni týraly «Mustafa men Maǵjan – Turan eliniń danalary» atty kitabynda egjeı-tegjeıli jazady.
“Adyrna” ulttyq portaly
