Astana qalasynyŋ äkımı Jeŋıs Qasymbek qaladaǧy qoqys şyǧarumen ainalysatyn Äliia Nazarbaevanyŋ kompaniiasyna qatysty sūraqqa jauap berdı, dep habarlaidy "Adyrna" ūlttyq portaly Tengrinews saityna sılteme jasap.
Äkım Clean City NC kompaniiasymen jasalǧan kelısımşarttyŋ merzımı qaşan aiaqtalatyny turaly sūraqqa naqty jauap berdı.
"Biyl būl kompaniiamen kelısımşart aiaqtalady. Ol bügınde bükıl qala boiynşa jūmys ıstep jatyr. Onymen kelısım 5-6 jyl būryn jasalǧan boluy kerek. Osy jyldan bastap säuırdıŋ basynda baiqau jariialaudy josparlap otyrmyz. Qalany bes audanǧa bölemız. Qala ekı ese östı, säikesınşe tūrǧyndar sany da östı. Bır jyl ışınde kün saiyn şamamen 1,5 myŋ tonna qatty tūrmystyq qaldyqtar jinalady", - dedı Astana qalasynyŋ äkımı.
Onyŋ aituynşa, tek bır ǧana käsıporynnyŋ quaty endı bükıl qalany qamtamasyz etuge qauqarsyz. Sondyqtan endıgı jospar boiynşa basqa da qoqys şyǧaratyn kompaniialar jūmysqa tartylady.
"Bız bes audan boiynşa qoqyspen ainalysatyn merdıgerlık ūiymdardy anyqtaudy josparlap otyrmyz. Mındettı şart - tehnikanyŋ boluy. Bügınde üzılıster mezgıl-mezgıl bolyp tūrady, özderıŋız bılesızder, äsırese Nūra audanynda. Būl kompaniianyŋ 3-4 jyl būryn bolǧan tehnika kölemıne bailanysty. Olar 80 kölıkpen bastady, qazır de şamamen sondai, säl köbırek. Bızge qalany tazartu üşın 150-160 maşina qajet. Sondyqtan, basqa kompaniialardy barynşa tartamyz, kem degende 3-4 kompaniia qalada jūmys ısteidı dep kütemız", - dep Jeŋıs Qasymbek aldaǧy josparmen bölıstı.
"Adyrna" ūlttyq portaly
