Sheshendik jýrnalıst Saıd Bıoev Qazaqstan halqyn kóktemniń alǵashqy kúnindegi alǵys aıtý kúnimen quttyqtady, dep habarlaıdy "Adyrna" ulttyq portaly.
Saıd Bıoev qazaqstandyqtarǵa izgi tilegin arnady:
"Sizderdi kóktemniń osy tamasha merekesi – Alǵys aıtý kúnimen quttyqtaımyn. Biz 1944 jyly Qazaqstan panalaǵan repressııaǵa ushyraǵan ıngýsh sheshenderdiń tikeleı urpaǵymyz. Biz birneshe saıası qasiretti kezeńdi birge ótkergen eldermiz. Stalındik terrordyń aýyr zardaptarynan áli aıyǵa qoımaǵan qazaqstandyqtar Kavkaz halqyna kómek qolyn sozdy. Qazaqstandaǵy «stalındik terror» qurbandarynyń jalpy sany birneshe mıllıonnan asady. Biraq dana qazaq sheshen, ıngýsh jáne basqa jer aýdarylǵan halyqtardyń ózderi sııaqty qurban bolǵanyn túsindi. Sondyqtan múmkindiginshe kómektesip, qoldaý kórsetýge tyrysty, bul ondaǵan myń adamdy ajaldan aman alyp qaldy" dep jazdy jýrnalıst óziniń áleýmettik jelidegi paraqshasynda.
Sondaı-aq, ol qazaqstandyqtardyń janashyrlyǵyn eshqashan umytpaıtynyn aıtty:
"Ǵasyrlar ótse de, qazaqtyń erligi, batyldyǵy men tektiligi urpaqtan-urpaqqa jalǵasyp, júregimizde saqtalady. Biz qazirden bastap birge bolýǵa laıyqpyz! Baýyrlas halyq bolýǵa daıynbyz! Raqmet, qazaq eli!" dedi ol.
