El ışınde otbasyny ūiytyp, ūrpaq tärbielep qoǧamnyŋ damuyna üles qosyp jatqan qarapaiym adamdardyŋ orny bölek. Olardyŋ är künı marapatqa laiyq.
Jan jyluy, şeksız mahabbat iesıne ainalǧan olar ystyq ūiasymen qosa süiıktı mamandyq ielerı. Meilı auylda tūrsyn, meilı qalada tūrsyn – olardyŋ qoǧamda alar orny bölek.
ŞARŞAMAITYN TIGINŞI
Tıgınşı mamandyǧyn igergen Qūttyqyz Tastanova – alty balanyŋ anasy. Künıne ekı mezgıl siyr sauyp, qūrt-mai taǧy basqa türlı süt önımderın özı qoldan öŋdep, osy arqyly kışıgırım biznesınde döŋgeletıp otyrǧan jaiy bar.
Onymen qosa Qūttyqyz hanym üiıne jaqyn ornalasqan tıs emhanasynda sanitar qyzmetın atqarady.
Qalǧan uaqytyn üiınde balalarynyŋ janynda ötkızedı, olarǧa as-auqatyn berıp, sabaqtaryn baqylaidy. Bos uaqyt tauyp tıgınşılıkpen de ainalysady. Keşke qarai dastarqan basyna barlyq otbasy müşelerı jinalǧanda, «osyndai jan balqytar jyly ortada otyrǧanda, barlyq şarşauym basylady» deidı ol
ŪRPAQTARDY JALǦASTYRǦAN ŪLY ŪSTAZ
Janar Azhodjaeva 37 jyl mektepte aiauly ūstaz bolyp qyzmet atqarǧan. Qazır zeinet jasyna şyǧyp, tättı nemerelerın baǧady.
- Men bala kezımde ärtıs de, bişı de, jurnalist te bolǧym kelgen. Būryn telefon joq, teledidar az köretınbız. Sodan şyǧar, köp ärtısterdıŋ suretterın jinaitynbyz. Äsırese, bişı Şara Jienqūlovanyŋ bilep tūrǧan suretterı köp bolatyn. Bıraq, oqu bıtırer kezımde, men mūǧalım bolatynymdy naqty bıldım, ūstaz mamandyǧyn taŋdadym. Oǧan sebep bolǧan – äkem jäne orys tılı men fizika pänınen beretın ūstazdarym. Solardyŋ pänge qyzyǧuşylyq tanytu qabıletıne qarap, oquşylardyŋ tılın tauyp, aqyl aityp, keŋes bergenı, qarapaiymdylyǧy, bılımdılıgı, adamgerşılıgı osynyŋ bärı maǧan ülgı boldy! Äkem “Mūǧalım bolsaŋ, jaman adam bolmaisyŋ” deitın. Mektepte 37 jyl ūstaz bolyp ıstedım. Aldymnan myŋdaǧan oquşylar öttı. Bärı de är türlı mınezdı, bır-bırıne ūqsamaidy. Oquşylarymdy jaqsy köretınmın. Bılım, tärbie beruden şarşamaitynmyn. Oquşylarym menı körse amandasyp, jaǧdaiymdy sūrap tūrady. Zeinetke şyqsam da habarlasyp, ızdep, jazyp tūrady. Bügınde oquşylarym jaqsy jūmys atqaryp jür, tūrmys qūryp, otbasyly boldy, balalary da bar. İnstagram jelısınen körse mındettı türde jazady, men bolsam, marqaiyp, mäz bolamyn, - deidı ol.
Janar hanym qazırgı ūrpaqtyŋ öz erekşelıgı bar dep sipattaidy.
- Qazırgı balalar aqyldy, pysyq, erkın söilei alady, alǧyr, ūialşaq emes, bır sözben aitqanda - tūlǧa! Ärine bızdıŋ balalyq şaǧymyzben salystyruǧa bolmaidy. Qazırgı zamannyŋ balalary öte damyǧan, mümkındıgı köp. Bız jas kezımızde dalada öskenbız, oiyn oinap, dostarymyzben kezdesıp äŋgıme aitatynbyz, kıtap köp oqitynbyz, kino, teatrǧa qyzyǧuşylyq qatty bolatyn. Üide äke-şeşemızben, äpke-aǧalarymyzben qyzyqty äŋgıme aityp, äjemız ertegı aityp otyratyn. Är türlı oiyndar oinaitynbyz. Al qazırgı balalarda qalai? Telefonnan basyn almaidy, äke-anasy da köp uaqytyn telefonda ötkızedı. Būrynǧydai qarym-qatynas jasap, aşyq äŋgıme aitu joǧalyp bara jatqandai... – deidı Janar hanym.
JAS MAMANNYŊ JAN QUANYŞY
Emhanada meiırbike qyzmetın atqaratyn jas maman Dinara Berdıbaevanyŋ būl salada ıstep jürgenıne 4 jyldan asqan. Būl mamandyqty taŋdauyna sebepker bolǧan äkesıne şeksız alǧysyn aityp, qazırgı künı sonyŋ jemısın körude.
- Syrqat janyna medeu ızdep kelgen adamdardyŋ emdelgennen keiıngı jadyraǧan jüzın köru erekşe baqyt, - deidı ol.
Ūjymdaǧy ärıptesterımen türlı merekelerde merekelık dastarqan jaiyp, köŋıldı uaqyt ötkızedı.
Bos uaqytynyŋ köp bola bermeitının aitqan keiıpkerımız otbasynda analyq, kelındık qyzmetterdı de atqaratynyn aityp aǧynan jaryldy.
Aiauly jar, meiırımdı ana, pysyq kelın bolyp jürgen Dinara bügınde şeksız baqytty ekenın aitady.
KÄSIPTIŊ NÄSIBI
Malika Tūiaqbaeva – Astana qalasynda türlı nan önımderın şyǧaratyn jeke menşık zauytta jūmys jasaidy. Ol būl jūmysqa keluıne joldas qyzy sebep bolǧanyn aitady. Būl jerde qūrbysymen bırge jūmys jasap kele jatqanyna da 5 jyldyŋ jüzı bolyp qalypty. Keiıpkerımız jūmysy özıne qatty ūnaitynyn jäne ony mahabbatpen oryndaitynyn jetkızdı.
Ūjymdastarynyŋ auyzbırşılıgı tamaşa, jūmysta öte köŋıldı uaqyt ötkızıp, jūmystyŋ qiyn sätterınde sezbei qalatynyn aitady. Jūmys uaqyty taŋǧy 8-den keşkı 20:00 ge deiın. Ekı kün ıstep, ekı kün demalǧan künderınde Malika hanym täp-tättı nemerelerımen seruendegendı ūnatady eken.
ADAL EŊBEKTIŊ İESI
Ūljamal İmanalieva – mektepte ūstaz. Balalardyŋ tılın tauyp, olarǧa bar bılgen bılımın üiretıp jürgen jas maman būl salaǧa qalai kelgenın aityp berdı.
- Men mūǧalım boludy kışkentai künımnen armandadym, sebebı alǧaşqy ūstazym öte keremet jany jaisaŋ jan bolatyn. Sol kısıdei bılımdı apai bolǧym keldı. Sodan informatika pänınen pedagogikalyq institutty tämamdap, Şymkent qalasynyŋ mektepterınen jūmys qarastyrdym. 2020 jyldyŋ jaz ailarynda hr prosesten vakansiia qaraǧan mektepterge ötınım tastap, testten ötıp bır mekteptıŋ mūǧalımı atandym. Mektepke bırınşı kelgende ärıptesterım men oquşylar jaqsy qarsy aldy. Tez üirenısıp kettım. Keide mekteptıŋ bıtpeitın qaǧazdarynan şarşap ketetın kezderımız bolady. Äitse de menıŋ jūmysym özıme qatty ūnaidy. Balalarǧa bar bılgenımdı üiretıp, sanasyna sıŋdırgım keledı, - deidı Ūljamal hanym.
Aigül Jüsıp,
«Adyrna» ūlttyq portaly
