«Adyrna» tılşısı bügıngı Kölık qyzmetkerlerı künıne orai «Qazaqstan temır joly» kompaniiasynyŋ Almaty bölımşesı qauıpsızdık bölımınıŋ bas mamany Bırjan Qapyşevpen tıldestı.
Temırjolşy — temırdei tärtıptı talap etetın mamandyq. Elımızde būl salany taŋdap, eren eŋbekterımen halyq alǧasyn alyp jürgenderdıŋ qatary az emes. Solardyŋ bırı — 8 ǧasyrǧa teŋ ǧūmyryn temırjolǧa arnaǧan Qapyşevtar otbasy.
Täjıribelı mamannyŋ äkesı Mūrat Qapyşev temırjolda 45 jyl ter tökken. Qazırgı taŋda qariianyŋ balalary da būl salada abyroimen qyzmet etıp keledı.
- Äuletımızden 26 jan temırjolda eŋbek etken. Bala künımnen temırjoldy körıp öskendıkten, būl salaǧa keluım kezdeisoq bolǧan joq. Apa-jezdelerımız ben ata-anamyzdyŋ mamandyǧyna degen adaldyǧy, şarşamai kündız-tünı erınbei jūmys ısteuı bızdı de qyzyqtyratyn. Kışkentaiymyzda bız de osyndai bolsaq qoi dep armandap östık. Şyny kerek, temırjol salasynda jūmys ısteŋder dep eşkım eşqaşan ügıttegen emes. Bärımız de öz jürek qalauymyzben keldık, - deidı Bırjan Mūratūly.
Äke jolyn jalǧastyrǧan azamat taŋdaǧan mamandyǧynyŋ qiyn ekenın jasyrmady.
- 1998 jyly Almaty temırjol kolledjıne qūjattarymdy tapsyryp, oquǧa tüstım. Sodan berı osy salada eŋbek etıp jürmın. 26 jyl ışınde talai qyzyq pen şyjyqty bastan ötkerdım. Būl – auyr da, qiyn sala. Dese de, abyroimen atqarǧan jūmysym, halyqtyŋ alǧysy maǧan erekşe läzzat syilaidy, - deidı ol.
Bırjan Qapyşev kez kelgen adamnyŋ temırjolşy bola almaitynyn atap öttı.
- Eŋ aldymen, tözım, qairat jäne sabyr kerek. Būl sala tez şeşım qabyldai aludy da qajet etedı. Bolaşaqta däl osy mamandyqty taŋdaǧym keledı degen jastar men atap ötken qasietterdı boiyna sıŋırse, myqty maman bolyp şyǧady, - dep tolyqtyrdy ol.
Märtebelı mamandyq iesı osy saladaǧy kemşılıktırdı, äsırese, şoiynjolda şyŋdalǧandardyŋ laiyqty jalaqy almaitynyn aitady.
- Ökınışke qarai, temırjolşylardy daiarlauda qazaqşa ǧylymi kıtaptar jetkılıksız. Terminderdıŋ köbı orysşa, qazaqşa balamasy joqtyŋ qasy. Sol sebeptı özge tıldegı kıtaptardy oquǧa mäjbürmız. Ailyq ta temırjolşylardyŋ jasap jürgen eŋbekterıne tatymaidy. Mäselen, jol jöndeuşıler, poiyz qūrastyruşylar, vagon qarauşylar, maşinister qystyŋ qaqaǧan aiazynda, jazdyŋ aptap ystyǧynda jūmys ısteidı. Bolaşaqta jalaqy mäselesınıŋ jaqsarǧanyn qalaimyn. Öitkenı eŋbek baǧalanuy tiıs,—dep qorytyndylady Bırjan Mūratūly.
Diana Asan
«Adyrna» ūlttyq portaly
Ūqsas jaŋalyqtar
