«Qazaqstan temir jolynyń» burynǵy basshysy Jaqsybek Qulekeev burynǵy prezıdent Nursultan Nazarbaevty keshirýdi surady, - dep habarlaıdy "Adyrna" ulttyq portaly.
Jaqsybek Qulekeev Nazarbaevtyń 30 jyl boıy el úshin atqarǵan eńbegi zor ekenin aıtty.
"Bári birdeı ol kisiden teris aınalyp ketti dep aıtý qıyn shyǵar. Janynda júrgen azamattar bar. Nazarbaevtyń ózin de kezeń-kezeńge bólip qaraý kerek. Alǵash egemendik alǵan kezde 2005 jylǵa deıin elbasy óte úlken qyzmet jasady. Jalpy egemendiktiń 30 jyldyǵynda elbasynyń atqarǵan eńbegi zor. Qazaqstandy dúnıejúzine tanytty, shekaramyzdy bekitti, ol kisiniń qabileti óte zor azamat. Al sońǵy 10 shaqty jylda ol kisi óziniń bedelin, bıligin jeke basyna, otbasyna kóbirek paıdalanyp ketti. Sodan halyq sharshady", - deıdi Qulekeev "Suraýy bar" YouTube-arnasyna bergen suhbatynda.
Jaqsybek Qulekeev Nursultan Nazarbaevty keshirýdi surady.
"Elbasy da pende, ol da áke. Ol da ata. Nemere, shóbere súıip otyr. Otbasynyń aınalasyndaǵylarǵa qatysty qoǵamda aıtylyp jatqan pikirlerge o kisi alańdamaıdy eken, qynjylmaıdy eken dep aıtý óte qıyn. Ol da et pen súıekten jaralǵan adam ǵoı. Menińshe, o kisini dál qazir tabalaýdyń qajeti joq. Qolymyzdan keletin bolsa, egemendik úshin, keleshek urpaq úshin o kisiniń jaqsy atyn saqtap qalǵan durys.
Elbasy men onyń aınalasynda júrgen adamdardyń ozbyrlyǵyn nemese qylmystyq áreketin bólip qaraǵan jón dep oılaımyn. Prezıdenttiń ustap otyrǵan saıasaty da sondaı. Memleket úshin, bolashaq urpaqtar úshin, egemendiktiń týyn berik qylý úshin Nazarbaevtyń atqarǵan róli óte joǵary. O kisini qazir qorlaıtyn bolsaq, ol – egemendikti qorlaǵanmen birdeı nárse. Sondyqtan bul turǵyda men halyqtyń elbasyǵa keshirimdi bolǵanyn qalar edim. Al otbasynyń jaqyn músheleri men otbasyǵa jaqyn azamattar, jaqyndyǵy bolmasa da sol kisiniń janynda júrip kóp paıdasyn kórgen azamattar bar. Solardyń isin keshirý-keshirmeý jasaǵan is-áreketterine, qylmysyna baılanysty", - dedi Qulekeev.
Eske sala keteıik, Qulekeev 2008 jyldyń 13 qarashasynda Astana qalasynyń Saryarqa sotymen «QTJ» UK» AQ prezıdenti laýazymyndaǵy qyzmettik ókilettikterin asyra paıdalanǵany jáne qyzmettik ókilettigin asyra paıdalanǵany úshin 3 jylǵa bas bostandyǵynan aıyryldy, dese de Qulekeevti para alǵany úshin sot aqtap alǵan bolatyn.
Jaqsybek Qulekeev Qańtar oqıǵasynan keıin «Qańtar oqıǵasy: Aqorda úshin kúres» atalatyn kitap jazǵany belgili.
