14 naýryz Amal merekesi kúni balalar úıine, kópbalaly jáne erekshe balasy bar otbasylarǵa ulttyq dám men taǵamdarǵa toly «Tartý», eńbek adamdary men zııalylarǵa «Sybaǵa» atty Naýryz qorjyny tartý etildi.
«ULY DALA DÁMI» ulttyq jobasy Naýryz merekesine jańa mazmun berip, ulttyq qundylyqtardy jańǵyrtýǵa baǵyttalǵan. Ulystyń uly kúnin jańasha atap ótýge qatysty Memleket basshysy Qasym-Jomart Toqaev ta únemi aıtyp keledi.
Joba bastamashysy – «Alatau Aqparat» medıaholdıngi. Onyń Bas dırektory Erjan Qalymbaıuly: «Negizgi maqsatymyz – Áz-Naýryzdy ásirese, balalar asyǵa kútetin basty merekege aınaldyrý. Ulystyń uly kúnin aıryqsha atap ótýde jańa qundylyqtar men dástúr qalyptastyrýǵa óz úlesimizdi qosqymyz keledi», – deıdi.
Almaty oblystyq №1 balalar úıine ulttyq kıimdegi qolynda asa taıaǵy bar Qydyr ata nemeresimen birge atpen bardy. Ol balalarǵa Naýryz batasyn berip, «Tartý» qorjyndaryn úlestirdi. Balalar da óz ónerlerin kórsetti. Uıymdastyrýshylar Qydyr Atanyń nemeresin – Baq-bala (Baq qarasyn, Qydyr darysyn) dep ataýdy jón kórgen.
Etnograf Bolat Bopaıulynyń sózinshe, Naýryzdy jańasha dáripteýde balalarǵa erekshe kóńil bólinýi kerek. Qydyr atanyń nemeresimen júrýi urpaqtar sabaqtastyǵy men ulttyq tárbıeniń mánin kórsetedi. Qazaq uǵymynda atasy ul nemerelerin, al ájeler qyz nemerelerin tárbıelegen. Sondyqtan Qydyr Ata men Baq-balany Naýryzdyń balalar asyǵa kútetin basty keıipkerlerine aınaldyrý kerek.
Ulttyq naqyshta bezendirilip kıiz úı pishininde tigilgen balalarǵa arnalǵan «Tartý» qorjyndarynyń ishine Qazaqstannyń ár óńirinen jetkizilgen (batys, shyǵys, ońtústik, soltústik) dámder salynǵan. Olardyń sany jeteý (kıeli san): shubat, qymyz, qurt, irimshik, jent, baýyrsaq, talqan, sondaı-aq rýhanı azyq – kitap pen Almatynyń almasy, Altaıdyń baly, ulttyq kádesyılar men oıynshyqtar bar. Kitaptardyń syılyq quramynda bolýy – jastardy bilim-ǵylymǵa shaqyrady.
Qorjyndardaǵy tabıǵı ári túrli dárýmenderge baı ulttyq taǵamdar balalardy salaýatty tamaqtanýǵa bastaıdy. Sondaı-aq, joba ulttyq taǵam túrleri men qolóner buıymdaryn nasıhattap, sala kásipkerlerin qoldaýǵa jaqsy múmkindik.
Naýryzda jastar úlkenderge arnaıy baryp sálem berip, qurmet kórsetip batasyn alǵan. Ulttyq jobany uıymdastyrýshylar da Asanáli Áshimov, Asyly Osman, Tóregeldi Sharmanov pen Qarlyǵash Ábdikárimova syndy el aǵalaryna, qoǵam qaıratkerlerine sondaı-aq qarapaıym eńbek adamdaryna da sálem bere bardy. Olarǵa Naýryz qorjyny tartý etilip, qurmet kórsetilip, ıyqtaryna shapan jabyldy.
Úlkenderge berilgen «Sybaǵa» qorjynyna jeti dámniń syrtynda jyly-jumsaq: súrlengen qazy-qarta, jal-jaıa men jambas salynǵan.
Naýryz qorjyn berilgender arasynda qarapaıym kóshe sypyrýshy, «Altyn alqa» ıegeri men erekshe balany jalǵyz tárbıelep otyrǵan ana da bar.
Alǵash ret uıymdastyrylǵan ulttyq jobanyń basty demeýshileri: «Asiakoz» túrik kóz klınıkasy, «Erke-Nur», «Ádemi-Aı» men «Adal As» syndy tanymal kompanııalar. Sondaı-aq, elimizdiń barlyq óńirinen «Zhent_chocolate», «Aqtobe damderi», «Sharman», «Asatu», «Astana-Ónim» AQ, «Mıod Vostochnyı», «Aıqan» JShS syndy ulttyq taǵamdar, kıimder men buıymdar shyǵaratyn kompanııalar, saýda markalary jáne «Steppe&World Publishing» baspa úıi atsalysyp, demeýshilik tanytty. Qazaq taǵamtaný akademııasy, Qazaq memlekettik ırki men ulttyq taǵamtanýshy Saıahat Ásimhan da jobaǵa óz úlesterin qosty.
Uıymdastyrýshylar «Uly dala dámi» ulttyq jobasyn aldaǵy jyldary 14 naýryzdan bastap aıdyń sońyna deıin tutas respýblıka kóleminde ótkizýdi josparlap otyr.
