Bas prokuratura Işkı ıster eks-ministrı Erlan Tūrǧymbaevty jäne polisiia organdarynyŋ basqa da basşylaryn qylmystyq qudalau turaly türlı Telegram-arnalarda taratylǧan aqparatqa qatysty tüsınık berdı, dep habarlaidy “Adyrna” ūlttyq portaly.
Būǧan deiın telegram-arnalarda būrynǧy ışkı ıster ministr Erlan Tūrǧymbaevqa qatysty qylmystyq ıstıŋ qozǧalǧany turaly aqparat tarady. Bas prokuratura būl aqparatty rastaǧan joq, bıraq eks-ministrden qaŋtar oqiǧalary boiynşa jauap alynǧanyn habarlady.
Bas prokuraturanyŋ mälımetınşe, sol kezde adamdardy azaptau faktılerı bolǧan. Ony jasaǧany üşın oblystyq polisiia jäne ūlttyq qauıpsızdık organdarynyŋ bırqatar basşylary men qyzmetkerlerı sottaldy. Bıraq tergeu şaralary älı jalǧasyp jatyr.
"Jürgızılıp jatqan tergep-tekseruler şeŋberınde Işkı ıster eks-ministrı Erlan Tūrǧymbaevtan jauap alyndy. Sondai-aq, Bas prokuratura Almaty oblysy Qarasai audany Qoşmambet auylynda ornalasqan arnaiy qabyldau jaǧdaiynda ūstalǧan azamattarǧa azaptaudy qoldanu turaly ıs boiynşa däleldemeler jinady", - delıngen resmi habarlamada.
16 nauryzda osy qylmysty jasaǧany üşın Qarasai audanynyŋ arnaiy qabyldau oryny jäne polisiia basqarmasynyŋ būrynǧy basşylary qamauǧa alyndy.
Būdan bölek, qyzmettık atys qaruyn ūrlau faktılerı boiynşa Taldyqorǧan qalasy polisiia basqarmasynyŋ būrynǧy basşylyǧyna qatysty tergeu aiaqtalǧan joq.
Aita ketsek, jelıde taraǧan aqparat boiynşa eks-ministr Erlan Tūrǧymbaevtan käuger retınde jauap alynyp jatyr.
