Memleket basshysy Qasym-Jomart Toqaev Qazaqstan halqyn Ulystyń uly kúnimen quttyqtady, dep habarlaıdy “Adyrna” ulttyq portaly Aqorda resmı saıtyna siltep.
Quttyqtaý sózinde ol Naýryz meıramynyń mańyzy jaıly sóz etti:
“Ulystyń uly kúni – Naýryz meıramy qutty bolsyn! Bul – bizdiń ata dástúrimiz. Búgin barshamyz bir el, bir halyq bolyp tól jańa jylymyzdy qarsy alyp jatyrmyz. Áz Naýryz – jańarý men jańǵyrýdyń sımvoly. Babalarymyz ejelgi zamannan beri Ulys kúnin jyl basy retinde atap ótken. Qazir Áz Naýryz kúlli halyqqa ortaq jalpyulttyq merekege aınaldy. Ony ultyna, dinine qaramastan barsha jurtymyz erekshe kútedi, birge atap ótedi” dedi prezıdent.
Quttyqtaý sózinde ol bıyl Naýryz meıramynyń Ramazan aıymen tuspa-tus kelgenin tilge tıek etti:
“Dana halqymyz «Jaqsy sóz – jarym yrys» dep beker aıtpaǵan. Jańa jyldy jaqsy nıetpen, paıdaly ispen bastaý – talaıdan qalyptasqan dástúr. Bul kúni qonaqjaı jurtymyz aq dastarqan jaıyp, bir-birine aqjarma tilekterin aıtady. Bulaqtyń kózin ashyp, tal egedi, tazalyqqa basa mán beredi. Naýryz merekesinde halqymyzdyń asyl qasıetteri men qundylyqtary túgel kórinis tapqan. Bıyl Ulystyń uly kúni Ramazan aıymen tuspa-tus kelip otyr. Qazaq jerindegi din men dástúrdiń úılesimi dál osy kezde aıqyn kórinedi” dep atap óttti Qasym-Jomart Kemeluly.
Sondaı-aq, Naýryz meıramynyń bıyl Naýryznama retinde 10 kúnge jalǵasatynyn aıtty:
“Bıyldan bastap Naýryz meıramy, ıaǵnı Naýryznama 10 kúnge jalǵasady. Búgin elimiz «Yntymaq» kúnin atap ótip jatyr. Birlik pen yntymaq – elimizdiń basty qundylyqtarynyń biri. Biz janashyrlyq, tileýlestik sııaqty asyl qasıetterdi dáripteýimiz kerek. Elimizdiń birligi men tatýlyǵy árdaıym bekem bolsa, eldigimizdiń tuǵyry máńgi bolady. Men buǵan kámil senemin” dedi memleket basshysy.
