Nauryz meiramynda Oral qalasynyŋ Zaşaǧan kentınde 9 qabatty jaŋa tūrǧyn üi qoldanysqa berıldı. Aituly şara Nauryznamanyŋ Yntymaq künımen qatar keldı.
Päter kıltterın tapsyru räsımıne Batys Qazaqstan oblysynyŋ äkımı Nariman Töreǧaliev qatysty. Öŋır basşysy jinalǧandardyŋ barlyǧyn Nauryz meiramymen qūttyqtap, jaŋa qonys ielerıne baqyt tıledı.
«Memleket basşysy Qasym-Jomart Toqaev öz joldaularynda halyqtyŋ äl-auqaty men ömır süru sapasyn arttyru – memlekettıŋ basty mındetı ekenın atap öttı. Osy oraida, är otbasyn tūrǧyn üimen qamtamasyz etuge baǧyttalǧan bastamalar maŋyzǧa ie. Bügınde Oral qalasynda memlekettık baǧdarlamalar arqyly 14 köppäterlı üidıŋ qūrylysy jürgızılude. Al memlekettık baǧdarlama aiasynda salynǧan köpqabatty tūrǧyn üiler «Otbasy bank» AQ arqyly kezekte tūrǧandarǧa jeŋıldetılgen paiyzdyq nesiemen berıledı. Bügın, mıne osy baǧdarlama arqyly kezekte tūrǧan 80 otbasy baspanaly boldy. Bügıngı jaŋa päter ielerın baspanaly bolularymen qūttyqtaimyn. Sondai-aq, Nauryz meiramy barşaŋyzǧa qūt-bereke äkelsın!» – dedı aimaq basşysy.
Prezidentınıŋ tapsyrmasy boiynşa elımızde «Quatty öŋırler – el damuynyŋ draiverı» jobasy jüzege asuda. Jaŋa tūrǧyn üi qūrylysy atalmyş joba aiasynda jüzege asyryldy.
Baspanaly bolǧandardyŋ köpşılıgı mümkındıgı şekteulı, sondai-aq päter kezegınde tūrǧan jandar.
«Köp jyl kezekte tūrdyq. Endı mıne armanymyz oryndaldy. Memleketke rizamyz. Endı mıne, Nauryz meiramyn jaŋa päterde qarsy alamyz, quanyşymyzda şek joq» – dedı jaŋa päter iesı Nūrgül Esenalieva.
Aita ketu kerek, Oral qalasynda 2024 jyly 1400-den astam päterdı qoldanysqa beru josparlanyp otyr.
Batys Qazaqstan oblysy äkımınıŋ baspasöz qyzmetı
