Memleket basşysy Almaty äkımı Erbolat Dosaevty qabyldady. Prezidentke Almatynyŋ äleumettık-ekonomikalyq damuy turaly baiandaldy, dep habarlaidy “Adyrna” ūlttyq portaly “Aqorda” saityna sıltep.
Prezidentke biylǧy ekı aidyŋ qorytyndysy boiynşa qala ekonomikasynyŋ qarqyndy öskenı, Almatynyŋ qysqa merzımdı ekonomikalyq indikatorynyŋ ösımı 1,7 paiyzǧa jetkenı jönınde aityldy. Jergılıktı biudjetke tüsken qarjy 55 paiyzǧa, iaǧni 287,5 milliard teŋgege deiın köbeidı. Negızgı kapitalǧa salynǧan investisiia kölemı artyp keledı. 190 milliard teŋge investisiia tartylyp, ösım körsetkışı 24,5 paiyzdy qūrady.
Erbolat Dosaevtyŋ aituynşa, byltyr tamyz aiynda Memleket basşysynyŋ bergen tapsyrmalaryn oryndau aiasynda megapolistı poliortalyq retınde damytu, tūrǧyn üi men äleumettık nysandardyŋ seismikalyq qauıpsızdıgın küşeitu, qūrylystardyŋ tyǧyz salynuyn boldyrmau jäne basqa da mäseleler boiynşa jaŋa talaptardy engızu jönındegı keşendı şaralar jüzege asyrylyp jatyr.
Qasym-Jomart Toqaevqa qalanyŋ seismikalyq qauıpsızdıgın qamtamasyz etu jönındegı tapsyrmasynyŋ oryndaluy jaiynda mälımet berıldı. Tūrǧyndar men zaŋdy tūlǧalardyŋ ötınışterı boiynşa biyl 23 qaŋtardaǧy jer sılkınısınen keiın tekserılgen 183 nysanǧa aitarlyqtai zaqym kelmegen. Sondai-aq 4 nauryzdaǧy jer sılkınısınen keiın tüsken ötınışter boiynşa 363 nysanǧa keşendı tekseru jūmystary bastaldy. 2024 jyly 13,2 myŋ nysanǧa seismoaudit jürgızıledı. Memleket basşysynyŋ tapsyrmasymen tötenşe jaǧdai kezınde azamattardy uaqytyly qūlaqtandyru maqsatynda biyl 1 mausymǧa deiın pilottyq rejimde «Mass Alert» jüiesı engızıledı.
Būdan bölek, qala äkımı qaldyqtardy basqaru jüiesın jaŋǧyrtu, aulalardyŋ aumaqtary men jasyl jelekterdı kütıp ūstaudyŋ jaŋa ärı keşendı täsılı turaly aitty. Osy rette qyzmet körsetetın ūiymdarmen 3 jylǧa servistık kelısım-şartqa qol qoiyldy. Būl şaralar olardyŋ qarjylyq ornyqtylyǧyn jäne körsetıletın qyzmetterdıŋ sapasyn arttyrady.
Kezdesu soŋynda Qasym-Jomart Toqaev ekonomikany odan ärı ärtaraptandyru, Almatynyŋ seismikalyq qauıpsızdıgın qamtamasyz etu, sumen qamtu jäne su tartu jüiesın jaŋǧyrtu jūmystaryn jalǧastyrudy tapsyrdy.
Ūqsas jaŋalyqtar
