Batys Qazaqstan oblysynda Nauryz meiramy keŋınen toilandy. 22 nauryz künı Oral qalasynda merekelık ıs-şara öttı. Qala tūrǧyndary men qonaqtary konserttık baǧdarlamany, teatrlandyrylǧan qoiylymdardy tamaşalady.
Öŋır tūrǧyndaryn Batys Qazaqstan oblysynyŋ äkımı Nariman Töreǧaliev Nauryz meiramymen qūttyqtady.
«Barşa jerlesterımdı Nauryz meiramymen şyn jürekten qūttyqtaimyn! Äz Nauryz – ūltymyzdyŋ bolmysyn, salt-dästürın, ädet-ǧūrpyn, tälım-tärbiesın, ruhaniiatyn aişyqtaityn meiram. Biyl Memleket basşysynyŋ bastamasymen on kün boiy jaŋa formatta toilanyp jatqan Nauryz meiramy köptıŋ köŋılınen şyqty.
Prezidentımız keşegı qūttyqtauynda el igılıgı jolynda atqarylatyn jūmystarǧa da toqtaldy. Öŋırlerdegı jylu ortalyqtary jäne injenerlık jelıler jaŋǧyrtylady. Elımızde 12 myŋ şaqyrym jol salynyp, jöndeledı. 300 myŋ adam tabiǧi gazdyŋ igılıgın köre bastaidy. Auyl jäne audan tūrǧyndary üşın jaŋa tūrǧyn üi baǧdarlamasy ıske qosylady. Äleumettık jaǧynan osal toptaǧy azamattar üşın nesie ösımı 7 paiyzdan aspaityn bolady. Jalǧa berıletın baspana sany bırneşe ese köbeiedı. Mūnyŋ bärı halyqtyŋ tūrmys sapasyn jaqsartuǧa yqpal etedı degen bolatyn Prezident. Halyqqa arnalǧan osyndai igı şaralar mındettı türde Batys Qazaqstan öŋırın de qamtidy. Bız tūrǧyndarǧa qajettı –äleumettık, medisinalyq nysandardy, jol saludy, tūrǧyn üi qūrylysyn jürgızudı jäne taǧy da basqa maŋyzdy jūmystardy jalǧastyratyn bolamyz», - dep atap öttı Nariman Töreǧaliev.
Tūŋǧyş Prezident alaŋyna jinalǧan oblys tūrǧyndary kiız üilerge kırıp, än, küi tyŋdap, ūlttyq taǧamdardan däm tatty.
Nauryz meiramy Batys Qazaqstan oblysynyŋ är audanynda keŋınen atalyp öttı.
