Crocus City Hall oıyn-saýyq kesheninde bolǵan terakt saldarynan qaza tapqandar sany 93 adamǵa jetti, - dep habarlaıdy “Adyrna” ulttyq portaly Reseıdiń Tergeý komıtetiniń aqparatyna siltep.
Taraǵan aqparatqa súıensek, tergeýshiler, krımınologtar men Reseı Tergeý komıtetiniń sarapshylarynan quralǵan tergeý toby qylmystyq isti zertteýdiń egjeı-tegjeıli josparyna sáıkes oqıǵa ornynda jumysyn jalǵastyrýda. Tótenshe jaǵdaılar qyzmeti úıindilerdi tazalaýda, beınebaqylaý kameralarynyń jazbalary zerttelýde, zardap shekkendermen jumys júrgizilip, konert zalynyń ǵımaratyn tekserý jáne zattaı aıǵaqtardy alý jalǵasýda.
"Qazirgi tańda qaza tapqandar sany 93 adam ekeni anyqtaldy. Qaıtys bolǵandar sany budan da kóp bolýy múmkin. Aldyn ala málimetter boıynsha, adamdardyń ólimine oqtan jaraqattaný jáne janý ónimderinen ýlaný sebep bolǵan", - delingen habarlamada.
Máskeý oblysynyń densaýlyq saqtaý mınıstrligi Krokýstaǵy teraktiden keıin qaza tapqandardyń tizimin jarııalady. Alǵashqy 37 adamnyń aty-jóni anyqtaldy.
Esterińizge sala keteıik, 22 naýryz kúni keshke Reseıdiń Krokýs Sıtı Hollynda belgisiz bireýler iri terakt jasaǵan bolatyn. Aldyn ala málimet boıynsha, ondaǵan adam qaza taýyp, 100-den astamy jaralanǵan. Krokýs Sıtı Holldaǵy teraktige baılanysty Qazaqstan azamattary úshin senim telefony ashyldy. Prezıdent Qasym-Jomart Toqaev Qazaqstan atynan Máskeýdegi Krokýs Sıtı Holldaǵy lańkestik áreketti qatań aıyptady. Aıta keteıik, Ýkraına lańkestik áreketke qatysy joqtyǵyn birden málim etti.
