Qyzylorda oblysy Aral aýdanynyń turǵyny egiz balasyn jarty mıllıon teńgege satyp jibergen, dep habarlaıdy «Adyrna» tilshisi.
Oblystyq sottyń málimetinshe, áıel egiz balasy bolatynyn bilip, olardy satýǵa sheshim qabyldaǵan. Osylaısha óziniń tanystary erli-zaıypty sottalýshylar J. men K.-men kezdesip, bosanǵannan keıin balalaryn olarǵa satý arqyly berý týraly ózara kelisimge kelgen.
Oǵan sáıkes erli-zaıyptylar áıelge «Kaspi bank» qosymshasy arqyly dári-dármek pen azyq-túlik alý úshin 2023 jyldyń qańtar-sáýir aılarynda ártúrli sommada barlyǵy 60 000 teńge aýdarǵan.
«Aıyptalýshy sáýirde balalardy ómirge ákelip, olardy J. men K.-ǵa bergen. 200 000 teńgeni bergennen keıin “satyp alýshylar” kelisken somany bólip tóleý týraly sóılesken. Osylaısha nárestelerdiń anasyna 252 000 teńge jáne taǵy 34 000 teńgeni bólek aýdarylǵan. Aıyptalýshy D. erli-zaıyptylardan nebári 546 000 teńge alǵan»,—delingen habarlamada.
Keıinirek aıyptalýshy men erli-zaıyptylar notarıýsqa júgingen. Balalardyń bıologııalyq anasy olardy asyrap alýǵa jáne keıinnen qorǵanshylyq jasaýǵa kelisimin bergen.
«Qyzylorda oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynyń úkimimen balalaryn satqan sottalýshy D., kináli dep tanylyp, oǵan 8 jyl merzimge bas bostandyǵynan aıyrý jazasy taǵaıyndaldy. Sottalýshylar J. K., kináli dep tanylyp, olarǵa 2 jyl merzimge bas bostandyǵynan aıyrý jazasy taǵaıyndaldy»,– delingen sot habarlamasynda.
