Qazaqstan syrtqy ıster ministrlıgı Reseide jürgen otandastarǧa jeke qūjattaryn özımen bırge alyp jüruge keŋes berdı. Būl turaly SIM resmi ökılı Aibek Smadiiarov brifingte aitty, dep habarlaidy “Adyrna” ūlttyq portaly.
"Azamattarymyzdyŋ özımen bırge jeke qūjattary jäne sol elde bolu maqsaty bolǧany dūrys. Äzırge bızdıŋ elşılıkke bıreudı ūstady, zaŋsyz ūstap otyr degen şaǧymdar tüsken joq. Eger qandai da bır tekserıster bolsa, būl jai ǧana tekserıs", - deidı Aibek Smadiiarov.
Aituynşa, Reseide qauıpsızdıktı küşeitu boiynşa qabyldanǧan şaralar – qalyptasqan jaǧdaida qalypty praktika.
"Öz aumaǧynda ırı terakt bolǧan kez kelgen memleket qauıpsızdıktı qamtamasyz etu üşın şaralar qabyldaidy, ärine. Jergılıktı bilık te, sonyŋ ışınde qūqyq qorǧau organdary da qajettı şaralardy qolǧa alady. Sol sebeptı bıreudı ūstady jäne tekserıp jatyr degen jaŋalyqtar – qalypty jaǧdai", - dep tüsındırdı Smadiiarov.
Esterıŋızge salaiyq, 22 nauryzda Mäskeu maŋyndaǧy Krasnogorsk qalasyndaǧy "Krokus Siti hollda" betperde kigen belgısız adamdar konsert aldynda körermenderge oq atqan bolatyn. Terakt saldarynan qaza bolǧandar sany 140 adamnan asty.
