22 cáýir kúni MNU ýnıversıtetinde “AL Jazeera week” ashylý saltanaty ótti. “AL Jazeera” halyqaralyq jýrnalıstıka mektebiniń stýdentterine bir apta boıy trenıng ótkizedi. Kezdesý Qazaqstan Respýblıkasy Prezıdentiniń Teleradıokesheni men AL Jazeera Media Network kompanııasymen uıymdastyryldy.
Is-shara barysynda ýnıversıtet basqarma tóraǵasy Talǵat Nárikbaev pen AL Jazeera Media Institute basshysy Eman Al-Amrı yntymaqtastyq týraly memorandýmǵa qol qoıdy.
Katar telearnasynyń mamandary stýdentterge jańalyqtar reportajy, derekter jýrnalıstıkasy, mobıldi jýrnalıstıka, ıfrlyq jýrnalıstıka jáne jańalyqtar júrgizý kýrstary sııaqty taqyryptar boıynsha teorııalyq jáne tájirıbelik dáris oqıdy.
Spıker Resýl Serdar Atas bul yntymaqtastyq ózara tájirıbe almasýǵa úlken múmkindik dep sanaıdy.
“MNU stýdentteri shynymen óte aqyldy ekenin baıqadym. Olardyń lekııa barysynda qoıatyn suraqtaryna qarap oqýǵa degen qyzyǵýshylyǵy birden kózge túsedi. Bul trenıng Al Jazıra medıasy men Maqsut Nárikbaev atyndaǵy ýnıversıtet arasynda baılanysty nyǵaıtady. Degenmen bul tek Al Jazıranyń trenıngi dep qabyldaý qate. Sebebi, bul eki uıym arasyndaǵy yntymaqtastyq - ıaǵnı eki jaqtyq jumys”, - deıdi ol.
Halyqaralyq jýrnalıstıka mektebiniń dekany Aıgúl Jamalova is-sharanyń bir jyl aralyǵynda uıymdastyrylǵanyn aıtty. Bolashaqta taǵy trenerlerdi alyp kelý tipti jas jýrnalısterdi praktıkaǵa jiberý oıda bar deıdi.
“Al Jazıra búkil álemdik top 10 telearna qataryna kiredi. Olarda BBC sııaqty burynnan qalyptasyp kele jatqan medıa tarıhy bolmaǵanymen, 15-20 jyldyń ishinde osyndaı deńgeıge jetti. Bul arna ashylǵan kezde Brıtanııa men Amerıkanyń CNN, BBC, ABC-da jumys istegen eń myqty jýrnalısterdi tartyp jergilikti mamandarǵa bilim berdi. Sol sebepti bir apta boıy ótetin trenıng stýdentterge kúshti praktıka”, - deıdi Aıgúl Jamalova.
AL Jazeera — Dohada ornalasqan, 1996 jyly Katar Ámiriniń jarlyǵymen qurylǵan halyqaralyq telekompanııa. Ol Aýǵanstandaǵy koalıııa kúshteriniń áýe soqqylary jaıly habarlap, Ýsama ben Ladenniń málimdemelerin kórsete bastaǵannan keıin álemge tanyldy. Televızııalyq kompanııa álemniń kóptegen elderinde arab jáne aǵylshyn tilderinde habar taratady. Jalpy 50-den astam sheteldik bıýrolary bar.
Aqbaıan Arapshaeva
