Qazaqstan transauǧan temırjol qūrylysyna qatysuǧa daiyn. Būl turaly vise-premer ministr Serık Jūmanǧarin bastaǧan delegasiianyŋ Auǧanstanǧa sapary kezınde belgılı boldy, dep habarlaidy «Adyrna» tılşısı Ükımettıŋ baspasöz qyzmetıne sılteme jasap.
Ekı el premer-ministrlerınıŋ orynbasarlary 24 säuırde ötken kezdesuınde taraptar Ortalyq jäne Oŋtüstık Aziiany integrasiialau jobalaryndaǧy yntymaqtastyqty damytuǧa özara müddelılık tanytty.
Atap aitqanda, qazaqstandyq taraptyŋ transauǧandyq dälızdı damytu jobalaryn: Termez – Mazari-Şarif – Kabul – Peşavar jäne Gerat – Kandagar – Spin-Buldak temır joldaryn salu jönındegı jobalardy ıske asyruǧa qatysuǧa daiyndyǧy belgılendı. Joba Ortalyq jäne Oŋtüstık Aziia elderı arasynda jükterdı jetkızu uaqytyn 10 esege qysqartuǧa, sondai-aq jükterdı tasymaldau qūnyn tömendetuge mümkındık beredı. Qazaqstan temır joldyŋ joǧarǧy qūrylysyna arnalǧan materialdardy, öz öndırısınıŋ şpaldary men bekıtkışterın jetkızu arqyly transauǧan magistralınıŋ qūrylysyna qatysuǧa daiyn.
Soŋǧy üş jylda Qazaqstannan Auǧanstanǧa eksporttyq tasymaldau kölemı tūraqty türde ösıp keledı: 2023 jyly temır jol arqyly tasymaldau kölemı 2,7 mln tonnany qūrady, onyŋ 1,5 mln tonnasy – ūn jäne astyq. Būl 2021 jylǧy deŋgeimen salystyrǧanda 14%-ǧa köp. Aldaǧy jyldarǧa arnalǧan boljam – eksporttyŋ 40%-ǧa ūlǧaiuy. Būl rette 2030 jylǧa qarai tasymaldardyŋ 3 ese ösuı kütılude.
