1 mamyr – Qazaqstan halqynyŋ bırlıgı künı Qostanai qalasynda qaiyrymdylyq aksiiasynan bastau aldy. Oblys aumaǧyn meken etken türlı etnos ökılderı atalmyş aksiiaǧa belsene at salysty.
– Täuelsız Qazaqstannyŋ eŋ bastysy qūndylyǧy – ol bırlık. Bızdıŋ bırlıgımız qiyndyqtardy bırge jeŋe alatynymyzdy, beibıtşılık pen kelısımde ömır süre alatynymyzdy däleldeidı, - deidı «Qoǧamdyq kelısım» mekemesınıŋ basşysy Natalia Ramazanova. – Bügın etnomädeni bırlestık ökılderı «Jizn na ladoni» jobasynyŋ qatysuşysy Savelii Grigorevke qoldau körsetu üşın qaiyrymdylyq järmeŋkesın ötkızıp jatyr. Barşaŋyzdy Qostanai oblysy Qazaqstan halqy assambleiasy atynan bırlık künımen qūttyqtai otyra, osy igı ıs-şaradan qalys qalmauǧa şaqyramyn.
Merekelık ıs-şara tūrlı ūlt ökılderınıŋ äsem än-küiı men äserlı biı tärızdı dübırlı dumanmen bastalyp, järmeŋkemen jalǧasyn tapty. Etnomädeni bırlestıkterdıŋ qazaqtyŋ darhan dalasyndai etıp jaiǧan dastarhanyna qyzyqqan halyqtyŋ qarasy qalyŋ. Ūlttyq taǧamdar järmeŋkesınen jinalǧan qarajat serebraldy sal auruyna şaldyqqan Savelii Grigorevtıŋ emıne jūmsalatyn bolady.
Järmeŋkeden bölek, mereke qonaqtarynyŋ nazaryn audarǧan baǧdarlama ūlttyq stildegı şoperler tıgu şeberhanasy boldy. Belsendı qozǧalysty qalaityndar üşın halyq bilerı boiynşa şeberlık synyby ūiymdastyrylyp, ūlttyq oiyndar jarysyna qatysu ūsynyldy. Al kışkentai körermenderdıŋ köŋılın türlı tüstı akvakrimmen aulady. Sondai-aq, keştıŋ körkın qalanyŋ üzdık şyǧarmaşylyq ūjymdary men jaidarman oiyndary kırgızdı.
Bır kısıdei jūmyla qatysqan ıs-şaranyŋ arqasynda 11 jasar Saveliidıŋ emıne jarty milliondai qarajat jinaldy. Balanyŋ ata-anasy ūiymdastyruşylar men barlyq qamqor adamdarǧa zor alǧysyn bıldırdı.
