Jüregımnıŋ iesı... (üş körınıstı drama)

Fabulasy: Bügınde  qyzmet quyp jürıp otbasyn qūrudy keiınge qaldyryp, qaşan kärı qyz atanyp qalǧanyn bılmei qalǧan qazaqtyŋ qyzdary köbeiıp barady.  Mūndaǧy pesada 35 jasqa kelıp otyryp qalǧan Dariǧanyŋ oqiǧasy keş, tüs, taŋerteŋ bolyp, onyŋ 35-30-23 jastary bır kün ışınde suretteledı. Dariǧa qiialdan jasap alǧan mınsız hanzadasyn kütıp jürıp-aq özınıŋ būl hälge qalai tüskenın aŋǧarmai qalady. Pesada oǧan kereǧar keiıpker retınde küieuge şyǧyp, sättı otbasyn qūryp otyrǧan sıŋılısı Jansaianyŋ kömegı arqyly kärı qyzdardyŋ psihologiiasy aşylady.  Qatysuşylar: Dariǧa – Tūrmys qūrmaǧan. Tanymal  qonaq üidıŋ basqaruşysy.  35 jasta. Jansaia –Tūrmys qūrǧan. Dariǧanyŋ sıŋılısı. 28 jasta.   Oqiǧa keş, tüs, taŋerteŋ bolyp kerı qarai ötedı. Keiıpkerdıŋ bır kündık ömırı beinelengenmen, 12 jyldyq ömırı qamtylady. Bırınşı körınıs  KEŞ  Qalalyq päter. Qonaq bölmesı. Elektr jaryǧy janyp tūr. Söre toly kıtaptar. Jinaqy divan men kreslo tūr. Būryşta ülken aina ornalasqan. Ortada 3-4 adamǧa jaiylǧan saltanatty dastarhan. Jansaia ydys-aiaq tasyp jür. Syrttan kostium-şalbar kigen Dariǧa kırdı. Qolynda noutbugı, sän jurnaldary bar. Zattaryn qoiyp, syrtqy kiımın şeşındı. Türı şarşaŋqy.  Jansaia:  Tūsaukeserıŋ qalai öttı? Qarnyŋ aşyp qalǧan joq pa? Dariǧa: (külımsıredı) Balanyŋ tūsauyn kesıp kelgendei sūradyŋ ǧoi. Jansaia:  Endı... Dariǧa: Äpkeŋ endı jai ǧana qonaq üi qyzmetkerı emes, elitalyq oteldıŋ basqaruşysy bolyp taǧaiyndaldy! Jansaia: Qūttyqtaimyn, janym! Sen oǧan äbden laiyqsyŋ... Jansaia: Taŋǧa deiın jazu jazamyn dep, dūrystap ūiyqtamadyŋ da. Baiandamaŋ jaqsy şyqty ma? Dariǧa: Jaqsy şyqpasa da jaqsy şyǧaramyn ǧoi. Uff, şarşadym... Dastarhandy tura men aitqandai jasadyŋ ba? Dastarhandy tekserıp jür. Jansaia: İia, kışkene myna jerlerdı sürtıp jıbersem boldy... Bärı daiyn! Dariǧa:  Kiımderım orynynda ma?   Kiım auystyruǧa şyǧyp ketedı.  Jansaia sörelerdı sürtıp jatyp IŞI HATQA TOLY ülken hrustal qūmyrany syndyryp aldy.  Dariǧa şala kiınıp jügırıp şyqty. Sasqalaqtap qūmyra qaldyqtaryn jinap jatqan Jansaiany aşulanyp jūlqylady.    Dariǧa: Ne ıstedıŋ sen, Jansaia?! Jansaia: Keş... Keşırşı... Men... Men... Men ädeiı emes!.. Baiqamai... Dariǧa: Skolko raz govorila?!  Jansaia... Jansaia: Qaz... qazır bärın jinap... Dariǧa: Pozdno uje!   Dariǧa ony jūlqyǧan küiı jerge qarai iterıp jıberdı.   Dariǧa: Sen... Onyŋ ömırımdegı ornyn bılesıŋ ǧoi?.. Nege tüsınbeisıŋ, Jansaia? Būl menıŋ bükıl älemım... Bärı kökke ūşty. Joq! Bır mezette... Ony qanşa ızdedım. Küttım... Endı? Nege būlai? Tek men ǧana...   Dariǧa yzaǧa bulyǧyp jylady.   Dariǧa: Senen qanşa ret ötındım. Tıptı osy qūmyranyŋ şaŋyn da sürtpeşı, tiıspeşı dep... Nege ūqpaisyŋ?! Jansaia: Men... jai... ony ornynan qozǧap, astyn... Dariǧa: Joǧal! Közıme körınbe!!! Ubiraisia! Uhodi otsiuda. Ne hochu tebia videt. Ostav menia!... Jansaia: ...   Jansaia şyǧyp kettı. Dariǧa bölmedegı zattardy jan-jaqqa laqtyrdy.   Dariǧa: Qūryp ketıŋder bärıŋ!   Jansaia basqa qūmyra alyp şyqty. Pauza. Dariǧa: Jansaia...   Jansaia: Bastaldy... Qazır keşırım sūraidy, jylaidy. Künde osy...   Kelıp  Jansaiany  qūşaqtady.   Dariǧa: Keşırşı menı... Keşıresıŋ ǧoi iia...   Dariǧa yzalanyp jylady.   Dariǧa: Taǧdyrym nege osylai jazyldy eken?!. Qai qylyǧyma berıldı? Ömır bumerang desek, qai jerde şalys bastym??? Qazaq qyzyq halyq... Qyzdaryn aialap, mäpeleuden aldyna jan salmaidy. Törge otyrǧyzyp qūrmettep, sözın ekı etpeidı. Al, sol qyz 20-dan assa boldy, tūrmysqa şyqpaǧany üşın qauym bolyp, tıptı qoǧam bolyp qyspaqqa alady, şektete bastaidy. Maŋdaiǧa jazylǧan taǧdyr ūǧymynan attap, bärı qyzdyŋ ǧana qolynda tūrǧandai  köredı. ...Aspanda ūşqan qūsqa ūzaq qarap süisınemın. Bırde joǧary, bırde tömen qalyqtap ūşyp bara jatqan sätın jiı elestetemın. Menı tüsınbeitın qoǧamnyŋ kögınde ūşqym keledı.  Qalyqtap... Men özgerdım... Mūndai emes edım. Būrynda tez jylaǧyş köŋılşek, äldeqaida meiırımdıleu boldym. Bıraq qoǧamǧa būl qasiettıŋ bır tiynǧa da qajet emes ekenın ūǧyndym. Anyǧyn aitsam ūǧyndyrdy! Janymdaǧy äljuaz erkekterdı körıp, olardyŋ boiynan ızdegen qasietterdı öz ışımnen öndırıp şyǧara bastadym. Bırte-bırte tua bıttı qasietımdei bolmysyma äbden dendep aldy. Al ol sümelekter, menen älı qyzǧa tän qylyq kütedı. Bärıne namyssyz, ūsaqtalǧan, ekıjüzdı, äljuaz erkeksymaqtar kınälı!.. Men siiaqty qyzdarda, iaǧni jas dene ışınde öz janyn taptap, esesıne basqanyŋ bolmysyn qūiyp alǧan adamda  qandai ıŋkär sezım boluy mümkın? Essız ǧaşyq bola almaimyn. Sebebı sezımın aqylǧa jeŋdıre bılgen adamda  esep basym bolady. Ol azdai, qoǧamnyŋ, tıptı jaqyndarymnyŋ salǧan jarasynan qorǧanu üşın janymdy qalyŋ sauyt qorǧap tūr. Tıptı mahabbatty da ötkızbeidı... Bıraq tabiǧat öz degenın jasamai qoimaidy eken. Taŋǧy şaidy jalǧyz ışu... Tıptı kinoǧa da jalǧyz baru... Tünde jalǧyz jatu... Qanşa jerden şarşap tūrsaŋ da közıŋe ūiqy ılıngenşe tösekte aunai-aunai körpege oratylyp qalasyŋ Syrt közge syr bıldırmegenımmen, ışım alai-dülei, Ärıptesterım üşın ärqaşan tört qūbylasy teŋ adammyn. Şarşap ketem... Oilaşy özıŋ,  eŋıregende etegı tolyp otyrǧan direktor qai qyzmetkerıne qyzyq boluy mümkın???   Dariǧa bıraz tynyştaldy...   Dariǧa: Jansaia, maǧan renjımeisıŋ ǧoi iia?! Men mūndai emes edım. Özım de tüsınbeimın... Osylai tez närsege aşulanatyn bolyppyn. 35-ke keldım mıne... Qartaiaiyn degenım be... Keşırşı... Sonşama dastarhan jaiyp kütken de kelmedı ǧoi. Nege kelmedı eken a?!. Ylǧi osylai sebepsız joǧalyp ketedı... Közıme körınbeidı. Jansaia: Ol... Jansaia özımen-özı kübırledı. Jansaia: Osynyŋ kelıp bolmaityn bolaşaq küiuıne dastarhan jaiudan-aq şarşap bıttım. (Dariǧaǧa qarap) Ol... Dariǧa: Aitpa! Ol turaly eşkımnıŋ auzynan estıgım kelmeidı. Ol tek menıkı. Boldy! Jansaia: Bıraq, Dariǧa... Dariǧa: Bügın tym keş bolyp kettı, qasyma qonşy. Küieuıŋe telefonmen eskert. Balaŋdy jaqsylap qarasyn, bır künge eşteme etpes. Qala şetındegı üiıŋe bügın jetpeisıŋ. Esesıne erteŋ demal. Jansaia: Bıraq, küieuım renjidı ǧoi... Dariǧa: Renjıgışın! Jürıŋder sol küieulerıŋnıŋ asty-üstıne tüsıp, köŋılın tauyp! Endeşe, menıŋ kölıgımdı aidap ket. Bıraq  taŋerteŋ erte kel! Jansaia: Qaraŋǧyda... jaqsy jürgıze almaimyn... Jaraidy, küieuıme bara almaitynymdy aityp köreiın, renjıse de... Dariǧa: Özıŋ bıl. Myna jerdıŋ barlyǧyn tez jinap, alyp ketşı.   Jansaia qūmyrany auystyrdy. Esıktıŋ  qoŋyrauy soǧyldy. Dariǧa ornynan atyp tūrdy. Dariǧa: Keldı me? Jansaia: Būl kım boldy eken? Dariǧa: Sen aşşy. Tez! Dariǧa özın tez retke keltıre bastady.   Jansaia tesıkten qarady. Dariǧany qolyn būlǧap şaqyrdy. Dariǧa esıktı aşty. Jerde tūrǧan bır qūşaq güldı mäz bolyp köterdı.   Dariǧa gülderdı qūşyrlana bır iıskedı de qūşaqtaǧan küiı ainanyŋ aldynda teŋselıp bıraz tūrdy. Dalabyn alyp ernın bırneşe qaitara bır boiady. Şaşynynyŋ artyq jerlerın tüzedı. Güldı alyp, telefonyna bırneşe ret  selfi jasai bastady. Jansaia: Özıne özı joldaǧan gülge sonşa şattanǧany nesı?!   Dariǧa: Kışkene jymiia qalsaŋ boldy äjım, elki! Jansaia: Bır qūşaq gül ūstap tūryp, qataiyp tūrǧan qyzyq qoi. Jymisaŋşy kışkene... Dariǧa: A chto ne tak? Vrode fotkaius. Nuu  nepoluchaetsia! Nu ladno sfotkai ty. Telefondy berdı. Jansaia: Işıŋdı tart kışkene... Jymi... Jymi... Ekı, üş! Dariǧa ainaǧa terıs qarap tūryp, baqytty keiıpte bırneşe suretke tüstı. Jansaia: Qaraşy, myna soŋǧysy dūrysyraq şyqty ǧoi deimın... Dariǧa surettı kördı. Dariǧa: Fu! Chto za vid?! Okazyvaetsia mne tak neidet. Davai eşe raz s drugogo rakursa. Etot rakurs ne moi... Taǧy da bırneşe ret tüstı. Dariǧa: nu, smotri, smotri kajetsia poluchilos. Vot etot foto uje normalnoe. Jansaia: Salarda filtrlardan ötkızseŋ, odan da küştı bolasyŋ... Dariǧa instagramyn aşyp, lentadaǧy bırneşe adamǧa laik basyp qarap öttı de, özınıŋ soŋǧy suretın saldy. Post jaza bastady.   Post: Gülder ömırımızdıŋ... Dariǧa: Osy basqa qyzdarǧa ūqsap bır jazyp köreiınşı. Keide qyzyǧam solarǧa... Dariǧa jazǧanyn öşırdı de, oilandy...   Jansaia: Aldyndaǧydai «Jıgıtım suretke tüsıreiınşı dep boi bermei qoidy» degendei jazyp jürme, men taǧy da ainadan körınıp tūrmyn. Dariǧa: Aita bermeşı sony menı ūialtyp (küldı). Rasynda da sol ūiat boldy iä?! Qalaişa baiqamai qaldym  a?! Jansaia: Qaita 10 minut bolmai körıppın... Dariǧa: Sonyŋ özınde 500 adam laik basyp ülgerıptı, al qanşamasy jai körıp, külıp öttı eken?! Ūiat-ai... Äi, qoiş sony! Ädeiı jasaǧan prikolym dei salarmyn azar bolsa. Dariǧa: Osy joly sen körınıp tūrǧan jerdı qiyp tastadym.   Post: #Jüregımnıŋİesı menı quantudan jalyǧar emes...   Postty jariialady. Jansaiaǧa kösettı. Dariǧa: Qalai? Jansaia: Vai-vai-vai... Degenmen myna obrazyŋa jarasatyn siiaqty...   Dariǧa jinalǧan şaşyn bosatyp, jai ǧana bua saldy. Üi kiımderın kidı. Pomadasyn sürttı.   Dariǧa: Şai ışeiıkşı. Qyzyldap tūryp daiyndaşy! Jansaia: Qyzyldap? Dastarhanǧa otyrdy.  Dariǧa olardy  asap jei bastady. Dariǧa: Däl solai... Jansaia: Dieta şe? Dariǧa: K chertu dietu!!! Köŋıl-küiım joq. Jansaia: Jūmysyŋ dūrys bolmai jür me? Dariǧa: Sūraq qoia bermeşı... Sodan basqa problemam joq deisıŋ be? Jalpy menıŋ jūmysymda eşqaşan problema bolǧan emes, bola qalsa da sol mezette şeşuge küşım äbden jetedı! Jansaia: Soǧan bola sonşa aşulanǧanyŋ ne? Jai sūradym ǧoi... Dariǧa: Sūramaş eşteŋe, sūramaaa!!! Jansaia ündemedı. Jansaia balalaryna telefon soqty.   Jansaia: Allo, qyzym?! Qalaisyŋdar? Papaŋ keldı me? ... Tamaq şe? ... Mmm, jaraidy botam... Jansaia mūŋaia tūtqany qoidy. Dariǧa: Olarǧa künıne 5 ret zvondamasaŋ bolmai ma osy? Baqsyn anau! Qarasyn dūrystap! Jansaia: Qoişy boldy... Onsyz da jetısıp jürgem joq. Dariǧa: Balany ne üşın tuasyŋdar osy topyrlatyp? Öz ömırlerıŋdı dūrystap süre almai jürıp, olardyŋ da ömırınıŋ kül-talqanyn şyǧaryp! Jansaia: Är balanyŋ öz nesıbesı bolady deidı. Peiılderıne qarai älı-aq bärı oŋalar... Dariǧa: Bır ǧana balanyŋ taǧdyry bolsa bır särı. Örımdei 3 qyz! Ärine, bırden ūl tuyla qoimaǧannan keiın josparsyz topyrlatyp tuyp... Ūldy mūrager jasaiyn dep pe edıŋder? Küieuıŋ qai dəuletıne orynbasar ızdep jür? 20 jyldyq ipotekasyna ma, əlde 10 jyldyq kreditıne me? Milliondap tabys tabatyn holdingı bolsa, maqūl-au. Orta kəsıbı bolsynşy, hotia by... Jansaia: Bız jetpegenge, balalarymyz jeter būiyrtsa... Dariǧa: Odan da küieuım "kezınde chert bolyp, jūmys ıstemei, maqsatsyz ömır sürıp, bərın qūr ötkızıp aldy. Endı sol qatelıktı tüzeudıŋ qūraly retınde bala tudyq", deseŋşı. Ökınışke qarai, ol da dəl özı siiaqty joly bolmaǧan sorly bop ösuı mümkın! Jansaia: Nege tüsınbeisıŋ sen?.. Balaly üi - bazar, ömır olarsyz qyzyq emes!  Ömırımdı olarsyz elestete de almaimyn. Dariǧa: Aha, köŋıl köteretın təsıldı tauypsyŋdar! Ol bala köŋılıŋ men közıŋe ləzzat syilau üşın aldymen investisiia kerek! Tamaǧyn berıp, kiımın bütındep, tərbie, bılım beru kerek. Al, oǧan kapes aqşa kerek! Älde, erteŋ "Aqşa joq" degen sözdı balasyna dəl özıŋderıŋ siiaqty qaitalaityn taǧy bır "neudachnik" kerek pe būl ömırge? Jalpy sendei äielderge qarasam janym aşidy. Ne dūrys demalmaidy, manikiur, pedkiiur degennıŋ ne ekenın de bılmeidı! Jansaia: El körıp, jer körıp jürgen közı aşyq adamsyŋ ǧoi.  Tym bolmasa, ūltymnyŋ sanyn köbeiteiın dep te oilanbaisyŋ ba osy? Dariǧa: Al sender tochno qazaqtyŋ sanyn köbeitkılerıŋ kele me, əlde, dükenge nanǧa, temekıge jūmsaityn, pult pen zariadkany ızdetetın qūl kerek pe? Menıŋşe... Jansaia: (aşulanyp) Saǧan daua joq eken! Dariǧa: Bızdıŋ dəl qazırgı qoǧamda bala əldenenıŋ qūraly ǧana. Zaletpen küieuge tiıp alu üşın, otbasyn saqtau üşın, tuǧan-tuystyŋ qysymynan qūtylu üşın, jalǧyzdyqtan qaşu üşın, anau üşın, mynau üşın... əiteuır "üşın" ǧana! Jansaia: Däl osy pıkırlerıŋdı özgertpeseŋ sen eşqaşan oŋbaisyŋ sen! Beişara... Jansaia bölmeden jylap şyǧyp kettı.   Dariǧa alasūra bastady. Jyldamdatyp basyna oramal taqty. Közıldırıgın kiıp, kompiuter aldyna otyrdy. Basyn joǧary köterıp, közın jūmyp kışkene otyrdy da jazuǧa kırıstı.   HAT Qūrmettı... (öşırdı). Asa märtebelı... Jaratuşy! Menıŋ oiymdy tym bolmasa sen tüsınşı. Nege solai? Adamdar qalai aqymaq? Bärı bır-bırıne ynqtyq. Al menıkı...  Ol joq! Bır jerden körındı. Bıraq köre almadym. Qūpiia jüredı. Jasyryndy. Tek sūlbasy. Şaram tausyldy.  Şarşap, qaljyradym. Kelmeitın bolǧany ma?! Bärıne senuden qaldym...   Basyndaǧy oramalyn jūlyp alyp tastady. Printerden hatty şyǧardy.   Dariǧa jazǧan hatyn MYJYP-MYJYP büktelgen hatqa TOLY hrustal qūmyranyŋ  ışıne saldy.   Ol nege kelmeidı? Menıŋşe bızdıŋ jıgıtterde ışkı kompleks bar. Qyzdardan otkaz aluǧa qorqady. Sebebı äkesı kezınde «menıŋ balam batyr» dep miyna äbden qūiyp ösırgen. Al ondai ūl ūnatqan qyzy betın qaǧyp jıberedı me dep boljam jasap alady. A vdrug ol sezımın qaǧyp jıberıp, dostaryna prikol ǧyp aitady? Al qyz symbatty, ədemı, mınezdı bolsa, qorqynyşy ekı ese köp, əlbette. Odan da momaqai, türı de onşa emes, könbıs bıreudı közdep, nysanaǧa döp tüsken tiımdırek. Tusovkalarda möliıp otyrǧan qyzdardyŋ küieuge tez şyǧyp ketetının talai ret körgenmın. Al, özıne ne keregenın anyq bıletın qyzdar mūnda naǧyz baiqūs! Köŋılı auǧan jıgıtke sezımın aşyp aita almaidy. Sebebı qazaqta ondai bolmaǧan, ūiat! Ərı, qyzdyŋ synyp qalǧanyn bılgen jıgıt tek qana öz paidasyn oilap uaqyt ötkızıp, qalaǧanyn jasaidy. A vdrug əbden əurelep, soŋynda tastap ketedı? Odan da qanşa qinalsa da, jastyq qūşaqtap jalǧyz ötkenı tiımdırek emes pe?! Men de qadırsız qaludan qaşamyn...   Telefon şyryldady. Telefon tūtqasyn köterdı.   Dariǧa: Allo?! ... İä, tyŋdap tūrmyn. Qaidan deidı? ... Treiningtı tünde de jürgızetın bolǧansyzdar ma? ...Mhm. Tüsınıktı... Bırınşıden, uaqytyn ūmytyp ketıppın, ekınşıden endı qatyspaimyn. Men solai şeştım. Aiyp etpeŋız... Küieudı sızderdıŋ treiningterıŋız arqyly tapsam, endıgıge deiın 10 küieuge tietın uaqytym boldy. ... Joq, tızımnen şyǧaryp tastaŋyz! Sau bolyŋyz!   Tūtqany qoidy.   Hm! Treining deidı ǧoi! 2 jyldan berı ol turaly dissertasiia jazatyn uaqytym boldy.  Barlyǧy solardyŋ aqylyna qarap tūrsa... Nado je?!.   Üstel üstındegı şaqyru bilettegı suretke közı tüstı. Qolyna aldy.   Qasymda jürgen Güljanat ta tūrmysqa şyqty de sonymen... Jūrttyŋ-aq joly bolǧyş. 1-2 ai jürıp, qol ūstasyp üilenıp şyǧa keledı. 3 ai būryn küieuı maǧan kelıp tūratyn. Ol kezde älı Güljanatty tanymaityn. Bız Dubaidaǧy otelde tanystyq. Taŋǧy as ışıp otyrǧanmyn. Däl mūndai küidı eşqaşan sezınbeppın. Qanşa tyryssam da özımdı basqarudan qaldym.  Sebebı ol janyma keldı! Ol naǧyz jıgıttıŋ töresı edı. Ekı iyǧyna ekı kısı mıngendei nakachennyi! İısı mmm.. prianyi, obvolakivaiuşii! Naǧyz erkekke tän ötkır iıs. Ony sezgennen bastap erkımnen aiyrylyp, mas boldym!   Jıgıt: Viski? Älde Rom? Dariǧa: Viski... Jıgıt äkelıp berdı.   Dariǧa: Jıgıtım, men viski dedım... Jıgıt: Rom! Dariǧa: Viski ! Jıgıt: ROM! Dariǧa: Viski! Jıgıt: ROM! Dariǧanyŋ betıne viskidı şaşyp jıberdı. Olar qarsylasa biledı. Dariǧa: Oŋbaǧan! Qyz dep te aiamaidy!   Da poşel ty  k chertu! Ekı qoşqardyŋ basy bır qazanǧa simaidy.   Ekeuıŋdı de jek körem! Jek körem! Bärıŋdı...   Surettı jyrtyp-jyrtyp tastady.   Oilap otyrsam... Būl ömırden kım jalǧyz ötpei jatyr? Jas kezınde jıgıtterdı äbden sapyrǧan Merilin Monro da... Djein Ostin... Koko Şanel... Barlyǧy da «şyn ǧaşyqtar qosylmaidy» degen tämsıldı qauzap ketken beibaqtar. Özderın solai jūbatudan basqa amaldary da joq. Jalpy sol ne söz??? Şyn ǧaşyqtar qosylmaidy degen ras pa? Menıŋşe, adamdardyŋ barlyǧy bır-bırıne şyn ǧaşyq bolady. Qosylǧasyn tūrmystaǧy ūrys-kerıster tuyndap, bır-bırıne suyna bastaidy. Sebebı pende ǧoi! Pende pendeşılıgın jasaidy! V-o-oot, sol kezde otyrady qiialdap, «negızı «anaaau» şyn ǧaşyǧym bolǧan, soǧan qosylǧanymda ǧoi...» dep. Sebebı onymen ūrsysyp ülgermei qalǧan ǧoi))) Kak bud-to sonymen qosylsa tük ūrsyspaityndyǧyna, ömır boiy qyzyǧynyŋ bıtpeitındıgıne bıreu kepıl bolyp tūrǧandai. Qyzyq!.. Sosyn ekı küieumen ömır süredı. Bırı tek miynda, ekınşısı janynda jüredı. Sonda... Qaisysy ömırlık jar?   Bırde anamnan senımdı ömırlık jardy qalai tabuǧa bolady dep sūraǧanymda: Qyzym, Jaratqan şyn mänınde pendesınıŋ maŋdaiyna özıne tiesılı taǧdyryn jazyp qoiǧan. İmandyǧa imandy, zūlymǧa zūlym, jalqauǧa jalqau jar kez bolady. Sen eŋ aldymen özıŋdı damytuǧa tyrys. Küieu ızdeme, özıŋdı ızde, özıŋe ne kerek ekenın tüsın, sonda jaqsy küieudıŋ özı senı ızdep tabady, - degen edı. Men osy sözdı jadymda ūstap, köŋılıme toqydym. Al sen qandaisyŋ sonda? Menı nege taba almai jürsıŋ? Bälkım... qiialymda ǧana qalǧanyŋ dūrys şyǧar... Qoldaryŋ qandai quatty edı... Közıŋdegı meiırımdılıkke şomylǧym keledı...  Demıŋe erıp baramyn... Işıme myŋdaǧan köbelek ūia salyp alǧandai. Jan düniemdı şymyrlatyp...  Özıŋmen bırge alyp ketşı... Basqa älemde ömır süreiık. Bırge...   Pauza.   Maiysyp qaldy. Öz-özıne qarap qysylyp, tömen qaraǧyştai beredı. Özın jıgıttıŋ aldynda tūrǧandai sezındı. Erkelep tūr.   Özıŋ ǧoi endı... Sen menı jylata bermeşı. Men te-e-ez Lenjıp qalam... (tömen qarady) Pauza. Qydyraiyqşy... Mmm... Mysalyyy?.. Şuly jerden jalyǧyp ketkem. Odan da mysaly, parkke. Typ-tynyş saiabaqqa. Ekeumı-ı-z ǧana. Qol ūstasyp... O-oi, ömırı süitesıŋ... Nege? Kelşı! Odan da bileiık.   (Bidıŋ bas jaǧy baiau bolǧanymen, jartysy ctreptiz gou-gou biıne jalǧasady.)   Muzyka oinap tūr. Sahnaǧa kök tüstı jaryq jandy.  Jūqa  peniuar kigen Dariǧa bilei bastady. Jıgıttı bige şaqyrdy. Mahabbat. Yntyq sezım. Jıgıt kettı.  Jaryq kömeskılene bastady. Muzyka dauysy ortaidy. Dariǧa üstelderdıŋ astyna kırıp bürısıp jatty.   Ekınşı körınıs   TÜS Dariǧa 30 jas şamasynda. Bölme qaitadan jaryq boldy. Dariǧa üsteldıŋ astynan şyqty.   Dariǧa: Üstelderdı üstıme üiıp tastaǧany nesı? Denemnıŋ bärı auyryp tūr. Men ne ıstep jatyr edım özı... Aaa, as üige obed ışuge bara jatyr edım ǧoi. Aiaǧym... synyp qalǧan ǧoi deimın. Aqsaŋdap jürıp ony qalai qarsy alamyn sonda?  Joq... synbaǧan siiaqty... Onda nege auyryp tūr a?! Bärı senıŋ kesırıŋnen! Qaraşy sen üşın özımdı taǧy qūrban ettım... Jansaia?! Üidesıŋ be? Äkelgen azyq-tülıktı kördıŋ be? Keşke deiın ülgermei qalmaiyq. Dastarhan daiyn bolmai ūiat bolmasyn! Keşegı aitqanym boiynşa turai ber salattardy. Joq, tūra tūrşy. (ornynan atyp tūryp, öz-özıne sūraq qoia bastady) Ol özı qandai salattardy ūnatuşy edı??? Balyq qosylǧan?..  Qosylmaǧan?.. Balyq jegen jaqsy ǧoi. Densaulyqqa paidaly. Qosylǧanyn ūnatqany dūrys... Jansaia, balyq qosa ber. Basqa da tamaqtaryŋdy da dämdılep jasarsyŋ...   Teledidar qosty. Arnalardy auystyryp kördı de, öşıre saldy.   Bügıngı köŋıl-küiıme sai eşteŋe joq eken. Tıptı muz.kanaldardyŋ özı  kak to... traurnyi... mūŋdy. Bärıne ne körıngen?!. Kütken adamym kele jatyr. Odan asqan baqyt bar ma?! Jansa-a-ia, menen kömek kerek pe? (özımen özı)Äi, bıraq ashana jaǧy qolymnan kele qoimas. Jansaia, keşke deiın ülgermei qalmaiyq äiteuır...   Jaŋyltpaşyn köŋıldene bırneşe qaitalap aitty.   Han balasy hanzada Boldy ǧaşyq hanşaǧa. Alyp hannan habar, Hanşaiymdy tabar.   Telefon şyryldady. Allo! İä... Sälemetsıŋ be? ... Tüsındım. Nūrjan, ony keşegı aitqanymdai jasaŋyz! 25-ne jinalys jasaimyz. ... AQŞ-pen älı bailanysqa şyqpadyŋyz ba? Ne ıstep jürsızder osy kezge deiın? ... Ok! Özım söilesıp, basşylyqqa bır habaryn beremın.  Jaqsy! Nūrjan, tapsyrmalardy tyŋǧylyqty atqaryp üirenıŋız! ... Körıskenşe!   Tūtqany qoidy.   Sondai melochtardy maǧan aitpai-aq qoisa da bolady ǧoi. Joq, mındettı türde aitu kerek, mazalap... Taa-a-k, quanyşymdy qai qūrbyma aityp maqtansam eken... Gülsım! Oi, bıraq ol balasynyŋ qylyǧy men enesın jamandaǧannan basqa äŋgıme bılmeidı. Odan da... Marjan! Bıraq ol taǧy jan-januarlardy qorǧauǧa arnalǧan konferensiialardyŋ bırınde otyrǧan şyǧar... Nazerke qalai toqal bolyp jürgenın aityp auzy bosamaidy. Qoiş sony... Basqa kım bar edı özı... Qatar-qūrby da qalmady...   Telefon şyryldady.   Taǧy qaisysy... Allo! Aha, qalyŋyz qalai? ... Mende bärı oidaǧydai. ... O-o-o, dūrys bolǧan eken. Ne jaŋalyq? ... Mmm... Erteŋ deisız be? Barlyq tuysqandardy şaqyrsaŋyz tıpten jaqsy bolǧan eken. Şüiırkelespegelı köp boldy.... Sızdıŋ bauyrsaǧyŋyz ben beşbarmaǧyŋyzdyŋ dämı älı taŋdaiymnan ketpei jür ǧoi. ... Uaqyt bolsa, baruǧa öte qatty tyrysamyn, apai. ... Sızder de men jaqqa kelıp qaityŋyzdar. ... Keşke ünemı üidemın ǧoi. ... Aha, Jaqsy! ... Sau bolyŋyz!   Telefon tūtqasyn qoidy.   Qalaǧan adamǧa uaqyt älbette tabylar. Bıraq men barmaimyn. Sebebı ärqaisysynyŋ «Qaşan tūrmysqa şyǧasyŋ?» degen sūraqtarynan äbden jauyr boldym. Bas-basyna körgen saiyn qaitalap sūrai beredı, sūrai beredı... Kak budto ia vse reşa-a-aiu i vse v moih rukah!.. Ooo, odan qalsa eskı däuırlerden qalǧan barlyq jalǧyz basty erkektermen tanystyrǧyş... Özımdı jer betındegı ötpei jürgen eŋ soŋǧy qyz sezınıp ketem ondai kezderı. Auzynan sözı, üstınen bözı tüsıp qalǧan nebır jıgıtterge telefon nomerımdı beretının qaitersıŋ?! Ol baiqūstar tūrady sosyn, hal sūraudan ary asa almai. Ondailarmen bırden qoştasamyn. Good bye! Erkek – erkek siiaqty bolu kerek!   Qolynda taqtai, pyşaǧy bar, aiaǧyauyr Jansaia keldı. (Dariǧa divanǧa otyrdy. Kosmetika jurnaldaryn paraqtady.) Mysaly, myna jıgıtterdei symbatty, qarasaŋ köz toiarlyq! Mujestvennyi! Bıreuge mynau menıŋ küieuım degende de ūialmai körsetetındei... Paraqtardaǧy iıs sulardyŋ probniktaryn qolymen üikep iıskep, rahattandy. Är paraǧyn aşyp iıskedı. Jansaia, myna jurnaldyŋ jaŋa sanyna tapsyrys bere ǧoişy. İısterı kete bastapty.... Qolynda taqtai, pyşaǧy bar Jansaia keldı. Dariǧanyŋ janyna otyryp turai bastady. Jansaia: Osy nege erkekterge arnalǧan iıs sudyŋ bır flakonyn tügel satyp ala salmaisyŋ? Dariǧa: Bıreu körıp qoisa ūiat? Erkegı joq üide iıs suy neǧyp tūr dep oilap qalmai ma? Jansaia: Tyǧyp iıskep jür. Dariǧa: Ol bıtkenşe jalyǧyp ketpeimın be ol iısten? Jalpy bırnärsenı ūzaq uaqyt tūtynsaŋ, odan şarşap, jalyǧyp ketesıŋ ǧoi. Osy senderde küieuge tierde odan jalyǧyp, basqa bıreudı ūnatyp qalsam qaitem degen qorqynyş bolǧan  joq pa? Jansaia: Şyn ǧaşyq bolyp tūrmysqa şyqsaŋ ol oi miyŋa da kelmeidı. Dariǧa: Ne närsege bolsa da qanşa jerden yntyǧyp, ūnatyp tūrsaŋ da, qolyŋ jetken künı arman da öledı degendei, bır künı qyzyǧy tausylyp, köŋılıŋ suyp qaluy mümkın ǧoi... Jansaia: Jas jūbailardyŋ qyzyǧy tausylmaidy, sebebı uaqyt öte kele jai ǧana küieu emes, bauyryŋ siiaqty bolyp ketedı. Mahabbat ülken bauyrmaldylyqqa ainalady. Dariǧa: Bılesıŋ be, menıŋşe jıgıtter baraholkada satylyp tūratyn köilekter siiaqty. Jansaia: Qalai sonda? (küldı) Dariǧa: Esıŋde me student kezımızde stipendiia tüsken boida baraholkaǧa qarai ūşatyn edık qoi.  Men sonda bır köilektı bır kün boiy aralap ızdep jüretınmın. Bıreusın tabasyŋ qymbat, qaltaŋ kötermeidı kedei qyzdardy jaqtyrmaityn tym bai jıgıtter syndy. Endı bıreuınıŋ modelı kelse, tüsı jaraspai qalady, iaǧni aqyldy, bıraq türı onşa emester, endı bırınıŋ saǧan şaq kölemı tabylmaidy. Iаǧni jasy tym ülken aǧailardyŋ  söz aitatyny siiaqty. Bıreuınıŋ modelı de, tüsı de, razmerı de oidaǧydai bolǧanymen, kiıp körseŋ bırsūmdyq, özıŋdı diskomfort sezınesıŋ. Ondai jıgıtter de köp boldy, bılımı, aqyly, türı, qaltasy sai kelıp tūrǧanymen, jaqyn aralasa kele äiteuır tartpaidy, qarym-qatynasta garmoniia tappaisyŋ. Jansaia: Teŋeulerıŋ qyzyq eken.   Būnyŋ däl baraholkaǧa qandai qatysy bar sonda? Dariǧa: Eŋ qyzyq jerı sonda, baraholka tym ülken ǧoi, taŋ atqannan bastap kün batqanşa qaidan kırıp-qaidan şyqqanyŋdy bılmei aralai beresıŋ, aralai beresıŋ, būdan da jaqsysy tabylatyn şyǧar degen ümıtpen jarasap tūrǧan köilektı almai jüre beresıŋ, jüre beresıŋ... Keş batyp, saudagerler jinala bastaǧan sätte tapyryqtaisyŋ kep. Ne  baǧana jarasqan köilekterdı qaityp baryp tappaisyŋ, ne qaitadan basqasyn ızdeitın uaqyt joq. Jansaia: Pysyq, aqyldy qyzdar bırden şeşım qabyldap alyp ketken bolar (küldı) . Dariǧa: Solai siiaqty...   Bolaiyn dedıŋ be? Jansaia: Turasyp jıbermeseŋ bıtpeitın türım bar. Dariǧa: Davai, qaisysyn? Jansaia: Mıne... Dariǧa:Üşbūryştap turaiyn ba? Jansaia: İä, Solai.   Pauza   Dariǧa: Jansaia, sezesıŋ be men sondai baqyttymyn! (Kenet esıne bırdeŋe tüsıp ketttı) Qazır...   Dariǧa ornynan tūryp, kompiuter aldyna jaiǧasty. Jan-jaǧynan ızdep oramalyn tauyp, basyna saldy. Közıldırıgın kidı. Basyn joǧary ūstap közın jūmyp bıraz otyrdy da jazuǧa kırıstı.   HAT Qūrmettı, jaratuşy! Qūdıretıŋnıŋ arqasynda Şeksız baqytqa ie bolaiyn dep otyrmyn. Rahmet, saǧan! Tek... Tek ūzaǧynan süiındır...   Printerden şyǧardy. Hatty ädemılep büktedı. JARTYLAI HAT TOLǦAN hrustal qūmyraǧa aparyp saldy. Oramalyn äspettep şeşıp qasyna qoidy. Ony körgen Jansaia basyn şaiqap myrs ettı. Dariǧa stolǧa kelıp, salat turasa bastady.   Pauza   Dariǧa: Köp küttım, öte köp... Jansaia: Qonaqtar tezırek qaitatyn şyǧar... Dariǧa: Tıptı jarty ömırım öttı desem de bolady. Jansaia: Ömır älı alda ǧoi... Dariǧa: Saǧan solai bop körınuı mümkın. Küieuıŋ, balaŋ bar. Jansaia: Kün suytty. Jyly aiaq kiım alyp beru kerek edı. Dariǧa: Ony kütken är uaqytymdy paidaly ıske jūmsaǧym keldı. Nätijesınde... Jansaia: Balamyzdy eştemeden kem qylmai ösırgımız keledı. Dariǧa: Nätijesınde sabaq pen qyzmetke aldanuǧa tyrystym. Student kezde DAIаŞY, joǧarǧy kursta – ADMİNSTRATOR, magistraturada – ATQARUŞY MENEDJER,  mıne BAS MENEDJER  boldym. Bärı jalǧasa berdı ony küte-küte. Mıne...   Jansaia: 30 jas!  Oqyǧan degen jaqsy ǧoi. Bız küieuımız ekeuımız kolledjden ary oqymadyq, küibeŋ tırlıkpen... Dariǧa: Bırdemeden qūr qalatyndai küieuge tiıp, oqudy tastap ketken özıŋnen kör. Sen joǧarǧy oqu oqysyn dep anşa tyrystym. Jansaia: Balam üige mysyq äkelgen eken, tamaq jemei qalypty. Dariǧa: Ömır osylai bolady dep kım oilaǧan?.. Jansaia:  Älı jaspyn ǧoi. Oqyp alsam bolady. Dariǧa: Balany kem qylmai ösırgımız keledı emes, ösıruge mındettısıŋ! Jansaia: Erteŋ joldasym üide monşa jaǧyp qoiamyn dedı. Monşaǧa tüsıp ket! Dariǧa: Botoks jasatqan betterge monşanyŋ bolmaitynyn bılesıŋ ǧoi... Jansaia: Botoks saldyra bergenşe, ekomen bır bala saldyryp alsaŋyzşy... Dariǧa: Qoişy, sosyn äkemnıŋ betıne qalai qaraimyn?! Jansaia: Onda asyrap... Dariǧa: Nege bügın tym aqyldy bolyp ketkensıŋ, Jansaia! Basym jerge jetıp tūrǧan joq, nebärı 30-aq jastamyn. #Jüregımnıŋİesıne tūrmysqa şyǧyp, özım-aq bosanamyn! Jansaia: Bügın ǧana körsem de küieuımdı saǧyndym... Üige ketkım kelıp tūr. Dariǧa: Sport zalyndaǧy trenerım bala kötergısı keletınder ışke presstı köp jasai bermeu kerektıgın eskerttı. Jansaia: Keide özım de tüsınbeimın, sonyŋ qai jerın jaqsy köretınımdı. Bılımı de joq, türı de onşa emes, mınezınıŋ de oŋyp tūrǧany şamaly, ne aqşa tappaidy... Dariǧa: Tuylatyn balaŋ da ädemı bolu üşın, symbatty boiy ūzyn jıgıtke tiiu kerek... Dariǧa şattana ornynan tūrdy.   Bılesıŋ be, onyŋ boiy menen... Mıne, mynadai ūzyn  (qolymen körsettı).   Jansaia: Saǧan  ortaşa boilylar ūnauşy edı ǧoi. Dariǧa: Joq, oiym özgerdı. Tura Gauhardyŋ küieuındei ūzyn bolsa eken deimın. Jıgıttıŋ ūzyn bolǧany jaqsy eken. Jansaia: Qyzyq... Dariǧa: Közderı so-o-ndai möp-möldır. Qyr mūryndy... Al qoldary qandai ädemı deseŋşı. Keiın neke jüzıgın taqqanda odan saiyn ädemı körınetın bolady. Bıraq ol tym symbatty bolyp ketse, men qyzǧanamyn. Sebebı qazır qyzdar özderı jügıredı jıgıttıŋ artynan. Sosyn basyn ainaldyryp üilenıp alady. Treningte sonyŋ bärın üiretken, tek men olardy jasaǧym kelmeidı. Jansaia: Nege? Dariǧa: Nu-u, bılmeimın. Şyndap qalasam jasai alamyn. Bıraq, bılesıŋ ǧoi, maǧan qandai jıgıt kerek ekenın?! Bıreuı tym juas, bırınıŋ türı onşa emes, endı bırı kedei... Oǧan taǧy JMOTtardy qos. Jansaia: Kedei? Dariǧa: İä, kedei! Qūdai-au, 30-ǧa kelgenşe astynda arzandau bolsa da bır maşinasy joq jıgıtten ary qarai ne kütuge bolady? Jansaia: Kedei baiymai ma, bai jarly bolmai ma? Onda tūrǧan ne bar? Kerısınşe sende bar olar... Dariǧa: İä, bar. Al ondailarǧa qosylsam üide matriarhat ornaidy! Kım köbırek ailyq alady, bilık bärıbır sonyŋ qolynda. Ony kez-kelgen erkek ıştei bolsa da moiyndaidy. Jansaia: Mümkın... Dariǧa: Sondyqtan, ol menen barlyq jaǧynan alda tūruy kerek. Bılım, aqyl, aqşa... Jansaia: Ondai jıgıttı tabu qiyndau... Menıŋşe, saǧan juas, baǧynatyn küieu kerek siiaqty. Özıŋ süirep jüresıŋ. Dariǧa: Joq, Jansaia! Qatelesesıŋ... «Baital şauyp bäige almas». Äkem aitqan... (pauza) Jansaia: Sen osy qiialdan jasap alǧan idealyŋdy ızdep uaqyt ötkıze bermei, bır uaqyt ainalaŋa qarap körseŋşı. menıŋşe, sen ızdegen jüregıŋnıŋ iesı däl janyŋda jür! Dariǧa: Joq! Olar maǧan ūnamaidy! J ansaia: Oi, qiial! Qoişy, odan da türımdı retke keltıreiın keşke deiın. Jaqtyrmai ketıp jürmesın (küldı).   Pauza. Dariǧa jastyqty bala qylyp orap, mäpelep jür.   Ol keledı... Kezdesemız...  Keremet!   Jaŋyltpaşty ÄRTÜRLI MÄNERDE bırneşe  ret  aitady.   Taudan tüsıp keledı tau ūldary, Tau ūldary süiedı qauymdaryn. Tau ūldary süiedı auyldaryn, Tamaşalap jüredı tauyn, baǧyn.   Gül äkeler me eken a?! Keşte şarşau körınbei, 1 saǧat jatyp tynyǧyp alaiynşy. (Pauza) Dariǧa tösekke jatty. Dariǧa: Jalǧyzdyq degen ne osy?   38 jas: Menıŋşe,  jalǧyzdyq degen – Taǧdyr. Sebebı ony eşkım basyna tılep almaidy. 28 jas: Joq, 38 jas sen qatelesesıŋ! Menıŋşe – erkındık! Sebebı  qaida baram, ne ışem, ne jeimın demeisıŋ. Rahat! 35 jas: Oi, 28 sen de bır aita beredı ekensıŋ! Jalǧyzdyqta adam erkın bolmaidy. 30 jas: 35! Oiyŋ dūrys.  Sebebı jalǧyzdyqtyŋ keŋıstıgı tar. Sol jerde qysylyp ömır süruge mäjbürsıŋ! 28 jas:  30 jas! Ne degen qatıgez edıŋ   – menıŋşe, jalǧyzdyq degen senım... 38 jas: Sen senesıŋ, senesıŋ! Soŋy tūnǧiyq. 25 jas: Joq! 38 Qatelesesıŋ jalǧyzdyqty – öz paidaŋa da şeşuge bolady. 30 jas: Alǧ sen qanşalyqty öz paidaŋa şeşe aldyŋ Dariǧa? 35 jas: Mysaly Däuren! Bılesıŋder ǧoi qyzdar?! 25jas: Ol ädemı, sypaiy bolatyn. Sen üşın baryn beruge daiyn edı. 38 jas: Al sen oǧan qaramadyŋ. 28jas:  Qazır ol üilengen baqytty. 30 jas:  Qazır jürsıŋ endı suretterın körgen saiyn ışıŋ küiıp. Ony qoişy, kettı ǧoi. Jandosty aitsaŋşy... 25 jas: Ony qiiali, aqynsymaq dep jaqtyrmadyŋ! 38 jas: Ernar degen de jap-jaqsy jıgıt edı. 28 jas: Onyŋ boiy qysqa dedı ǧoi. 25 jas: Qyzdar, Asylbek şe?! 38 jas: Sol jıgıt jaqsy uhajivat etıp jürgen jerınen, podkabluchniksıŋ dep jaqtyrmady emes pe?! 28 jas: Sen sondai täkkaparsyŋ! 25 jas: Özımşılsıŋ! 38 jas: Jūrtty özıŋnen tömen sanaisyŋ! 28 jas: Özıŋe ne kerektıgın bılmeisıŋ! 25 jas: Qatıgezsıŋ! 38jas: Sen ömırde aktrisasyŋ, al naǧyz şynaiy beineŋ osy! Olar şulap kettı. 25 jas: 23! Sen nege ündemeisıŋ?     Üşınşı körınıs   TAŊERTEŊ Qūstar sairap tūr. Dariǧa 23 jas şamasynda. Ūiqydan tūrdy. Telefony şyryldady.   Dariǧa: Allo!..  Qaiyrly taŋ. ...  Mhm... Joq, renjımeşı, Kezdese almaimyz. Sebebı? ...  Sebebı jūmysym köp. Qosymşa sabaqtarym bar. ... Tüsınşı jūmystan 1 jyldyq esep daiyndap otyrmyn... Mümkın keiınırek... Solai... Jaraidy, sau bol!   Tūtqany qoidy.   Qyzǧa ūqsap qydyruǧa da uaqyt joq. Bır jaǧynan ömır alda ǧoi.  Özıme laiyqty, naǧyz jıgıt kezdeskende şyǧarmyn qydyruǧa... Al äzırge jūmys, aiaqtan tūryp alu kerek. Qydyru tabylar...   Ol da qyzyq. Özı qatarlas qyz ızdemei me?! Menı apa jasaiyn dep jür me?! Men 23,  Ol nebärı 21-de ǧoi. Ol üşın bärıbır kärımın. Jıgıt degen qyzdan ülkendeu bolu kerek.   Betı-qolyn judy. Telefonyna sms keldı. Oqydy.   Tu-u, myna qyzdar da qoimady ǧoi. Erıkken bärı şetınen... Qit etse klubqa barǧyş... Kezınde sabaqty qatyrmap edı, qazır jūmys ıstep te jarytyp jürgen joq. Ne ömır? Bar tapqanyna şyrttai bolyp kiınıp alyp, qydyrady da jüredı. Adam degen bolaşaǧyn oilamai ma?   Jūmysyn jalǧastyryp jasap otyr.   Dariǧa:  Jūmys-üi, üi-jūmys. Keide jalyǧyp, bır saryndy ömırden şarşap ketemın. Üide şüiırkelesetın Jansaia da ūzatyldy küieuden qūr qalǧandai... Däuren de habarlaspaǧaly bıraz boldy. Renjıtıp aldym soŋǧy kezdeskenımde... Jūmysyŋ bıtpeidı ömırı, nege keŋseden tym keş şyǧasyŋ deidı... Ol jerde oinap otyratyndai. Tüsınbei ketedı ol da keide... Men de jūmystan şarşap şyǧyp edım, qatty aityp jıberdım ǧoi deimın. Ne ıstep jür eken... Saǧyndym... Uff... Bıraqq senı jolyqtyrǧan taǧdyryma rizamyn janym... Är minutym, är sekundym... Ömırıme sen engelı jūldyzdar da anyq jarqyraityndai... Ainalamdaǧy adamdardyŋ barlyǧy meiırlene tüskendei... Netken qūdırettı edıŋ?! Senı jolyqtyrǧan taǧdyryma rizamyn janym... Qai qasietıŋmen özıŋe yntyqtyryp qoidyŋ?.. Jarty kün körmesem, eleŋdep özıŋdı saǧynyp tūramyn. Qaida, kımmen, ne ıstep otyr ekensıŋ? Qarnyŋ aşyp qalǧan joq pa? Jūmys künıŋ sättı ötıp jatyr ma? Jaurap qalmadyŋ ba eken? Eşkım renjıtpedı me? Köŋıl-küiıŋ qalai? Bärın-bärın bılgım keledı...   Jıgıt keldı.   Jıgıt: Künım menıŋ! Älemdegı eeeŋ sūlu qyzdyŋ jaǧdaiy qalai eken? Dariǧa: Ke-r-emet! Özıŋde bärı jaqsy ma? Jıgıt: Jaqsy, hanşaiymym. Dariǧa: Menı qalai saǧyndyŋ? Körsetşı qane ädettegıdei... Jıgıt: Tük te saǧynǧan joqpyn! Dariǧa: (būrtiyp qaldy) Qalai sonda? Tük te... Jıgıt: Aqymaǧym sol... Renjıgen türınen sol... Senı ünemı jüregımnıŋ ışıne salyp jüremın. Ärdaiym menıŋ janymdasyŋ. Dariǧa: Al, men senı saǧyndym... Sen joqta saǧynyşymdy qaitıp basqanymdy aityp bereiın ba? Jıgıt: Kışkene sezıp tūrmyn... Dariǧa: (būrtidy) Onda menen endı eşteŋe sūrama, aqyry özıŋ bärın bıledı ekensıŋ ǧoi... Jıgıt: Suretıme qarap telmırumen boldyŋ ǧoi, iä? Dariǧa: neaaa Jıgıt: Endı? Dariǧa: Sen bergen güldermen söilesıp jürdım künı boiy... Olar sūraqtaryma senıŋ ornyŋa jauap berdı. Jıgıt: Olar da senı jaqsy köredı. Dariǧa: Olar söilegende tura sen siiaqty süüüp-süikımdı. Sosyn senı odan saiyn jaqsy körıp qaldym. Bıraq bır qyzyq aitaiyn ba? Jıgıt: Aita ǧoi... Dariǧa: Senıŋ bügın taǧy gül beretınıŋdı bılıp, men olardy "liubit ne liubit" dep jūlyp tastadym))) Jıgıt: Kezdesken saiyn gül beretınıme senseŋ de, senı şeksız süietınıme kümänmen qaraisyŋ,iä? Dariǧa: Ärine... Jıgıt (qūşaqtady): Bärı jaqsy bolady janym... Bıraq keide senı şeksız süigım kelmeidı... Dariǧa: negeee? Jıgıt: Ernest Hemingueidıŋ taǧdyryn qaitalaǧym kelmeidı. Dariǧa: Senı sonşama qorqaq dep oilamappyn))) qorqaq! qorqaq! Jıgıt: Ernest özınıŋ muzasy Agnessany bar yqylasymen jan-tänımen süidı. Amerikadan hattar İtaliiaǧa qarşa jauyp tūrdy. Dariǧa: sodaaan? Jıgıt: Bıraq bır künı qandai hat alǧanyn bılesıŋbe? Dariǧa: Qandai? Jıgıt: «Maǧan jiı hat jazudyŋ qajetı joq. Men sız oilaǧandai äiel emespın. Men özımdı doly äielmın dep sanaimyn. Aşulanbaŋyz. Sau bolyŋyz!» dep jazyp jıberıptı... Dariǧa: Ne degen qatygez qyz bolǧan. Şyn süimegen bolyp tūr ǧoi ia... Jıgıt: Şyn süimegen emes. Özın Ernestke laiyq sanamaǧan. Dariǧa: aaa))) ūryspaşy... qaz a tak renji salam... Jıgıt: Mahabbatty tolyq tüsınbeisıŋ, janym. Dariǧa: Tüsındırşı al... Jıgıt: Qatty tüsınıp kerek emes. Köp bılgen ziian. Dariǧa: Nege? Jıgıt: Tek Kleopatra siiaqty qylyqty bola bılseŋ boldy Dariǧa: Jaraaaid... Janym, janym, menı alǧaş körgen kezıŋ esıŋde me? Jıgıt: Ärine Dariǧa: Aityp berşı, ne sezındıŋ? Jıgıt: Aityp jetkızu qiyn. Dariǧa: oiii, aityp beeerş... Jıgıt: Közben köz tüiısıp qalǧan sättı esıme alsam))) Dariǧa: Bıraq syr bıldırmedıŋ iä? Jıgıt: Sol kezde bır öleŋ şyǧaryp edım. Dariǧa: Oo, oqyp berşı! Jıgıt: Oquǧa ūialyp jür edım. Al tyŋda. Sen ekensıŋ jürektıŋ sūraǧany, Bolsaŋdaǧy balapan ūiadaǧy. Jasqanudy bılmeitın ot janarym, Senen nege jasqanyp ūialady? Dariǧa: Öleŋıŋ öte keremet! Sen ūialşaq emes edıŋ ǧoi. Jai ǧana qorqaq emes, endı ūialşaq qorqaq bolǧanyŋ ba))) Jıgıt: Raqmet! Ūialşaqpyn negızı, bıraq sen üşın ötkır boluǧa tyrysamyn. Qorqaqpyn. Sen üşın batyl bolamyn! Dariǧa: Men senı jaqsy-y-y köremın! Şynyŋdy aitşy, menıŋ qai jerım ūnaidy saǧan? Jıgıt: Qai jerım ūnamaidy deseŋşı) Dariǧa küldı Jıgıt: Senıŋ bolmysyŋda maǧan ūnamaityn jerıŋ joq. Dariǧa: Sender barly qyzǧa solai aitasyŋdar iia? Jıgıt: Tıptı tızeŋnıŋ özı ädemı. Dariǧa: İzvraşenes! Jıgıt: (bas salyp qūşaqtap süidı) Kım izvraşenes aaa? Kım, kım... Dariǧa: Tärtıpsız jıgıtsıŋ)) Senı būryşqa tūrǧyzu kerek!)))   Olar tösektes boldy.   Perde köterıldı. Dariǧa jalǧyz jatyr. Ornynan tūryp del-sal küi keştı. Şarşap tūr. Ainalasynan jıgıttı ızdedı. Jıgıt ketıp qalǧan. Telefon soqty.   Jıgıttıŋ telefony bos emes. Bırneşe ret soqty. Zaniat. Taǧy da soqty. « Bailanys aiasynan tys jerde» degen dauys estıdı.   Meŋ-zeŋ küide zattaryn jinastyrdy. Jūmys qaǧazdaryn rettedı.   Bırneşe qaita telefon soqty. « Bailanys aiasynan tys jerde» degen dauys estıdı.   Sms jazdy.   «Janym, qalaisyŋ? Qaidasyŋ...»   Su qūiyp ıştı. Aqyryn baryp tösegıne jatty. Sms keldı. Ornynan atyp tūrdy.   Sms: «Bız keşe ülken qatelık jasadyq. Erterek aitpaǧanym üşın keşırşı. Menıŋ otbasym bar. Olardy tastai almaimyn. Endı mazalamaşy..»   Qūmyranyŋ qasyna bardy. Qolyna aldy. Qūmyraǧa qarap söiledı.   HAT   Qūdıretı küştı Qūdai!!! Men şarasyzbyn... Sengen adamym... Bärı bır mezette... Tükırgenım bar bärıne! Tıptı oilanuǧa da mūrşam joq. Endı ne ısteimın? Kımnen aldanyş tabamyn? Taǧy qandai tartuyŋ bar? Jıbere ber şetınen! Eşteme qaldyrma! Tügel jıber! Nem qaldy deisıŋ? Barlyǧyna daiynmyn!Sebebı men endı ömırdı basqaşa sürudı bastaimyn! Būryŋǧy Dariǧa körge kettı!   Ülken hrustal qūmyra «şŋŋ» etıp dybys şyǧardy. Dariǧa jalt qarady.   Basyndaǧy oramalyn şeşpedı.   Oilanǧan qalpy hatyn büktedı. Süiretılıp baryp, bos qūmyraǧa alǧaşqy hatyn saldy.   SOŊY  

Aidana ALAMAN

"Adyrna" ūlttyq portaly