Esımı orta ǧasyrlardan bızdıŋ zamanymyzǧa jetken belgılı aqyn, qoǧam qairatkerı Jüsıp Balasaǧūn özınıŋ «Qūtty bılık» dep atalatyn eŋbegınde äiel adamdardy bırneşe topqa jıktegen. Jastyq şaqtyŋ buymen jıgıtterdıŋ köbısı syrtqy sūlulyqqa köp nazar audaryp aldamşy sezımnen asa almai jatady. Al syrty sūlu arulardyŋ ışkı sūlulyǧynyŋ qos kezdesuı – öte sirek qūbylys. Sūlulyqtyŋ köp adamǧa moiyn būrǧyzatyndyǧy anyq, sūluǧa üilengen azamattyŋ bar ömırı jaryn küzetumen ötedı. Būl turaly aqyn: «Sūluqūmar, sūludy aŋsap sor quma, Qyzyl jüzdı sarǧaitpa Häm qor qylma», – deidı. Keibıreuler "qatyn alma, qaiyn al" degen baǧytty ūstanyp, bai äiel alyp, daiyn ömırge kırısıp ketudı oilaidy. Dünienıŋ bärın özı jiǧan jardyŋ erıne boi ūsynuy ekı talai. Sonyŋ saldarynan ol otbasynyŋ basşysy kım ekenın aiyru da qiyn bolady. Sondyqtan aqyn: «Ei, tyŋdauşy bai äielden ümıtker, Qūly bolyp qalma onyŋ, bılıktı er», – deidı. Bärınende qaiyn jūrtyna şyn berılıp, otaǧasyn erekşe qūrmetteitın, qonaǧyna qoly aşyq, etegı jabyq imandy, aq niettı, adal jar tabu qiynnyŋ qiyny.Sondyqtan aqyn: «Qaiyn alma, alsaŋ naǧyz qatyn al, Adamşyldyq sıŋgen asyl zatyna», – dep oi qorytqan. Jüsıp Balasaǧūn babamyz da äieldı imanyna, ruhani bailyǧy men ışkı jan düniesınıŋ sūlulyǧyna qarap taŋdaudy ösiet etedı. «Äiel alsaŋ qarap al aqyldysyn, Ol senıŋ aqyrettık jaqyn kısıŋ»,– dep Şal aqyn aitqandai jaryq düniede jartymyzdy taŋdauda jaŋylyspaiyq.
Aian ALDABERGENŪLY
"Adyrna" ūlttyq portaly
