Qyrǵyzstan prezıdenti Sadyr Japarov qazaqstandyq bloger Anastasııa Ahmetovanyń málimdemesine baılanysty vıdeo úndeý jarııalady, dep habarlaıdy «Adyrna» tilshisi.
Buǵan deıin Ahmetova TikTok jelisinde Ystyqkól aımaǵyndaǵy ýrandy ıgerý máselesin kótergen bolatyn. Ol Eýrazııalyq analıtıkalyq klýbtyń jetekshisi Nıkıta Mendkovıchtiń «ınsaıderlik aqparatyna» silteme jasap, «Rotshıldterdiń franýzdyq bólimshesi ýran óndirý quqyǵyn alýǵa yntaly» degen málimdeme jasady. Bloger bul kelissózderdiń artynda Qyrǵyzstan mınıstrler kabınetiniń basshysy Aqylbek Japarovtyń turǵanyn atap ótti.
Alaıda Qyrǵystan prezıdenti bul aqparatty joqqa shyǵardy.
«Eldi turaqsyzdandyrýdy qalaıtyn syrtqy kúshter kóp. Qurmetti otandastar, aq pen qarany, dos pen jaýdy aıyrýlaryńyzdy suraımyn. Qazir ınternettegi árbir aqparatty tekserý kerek. Óz-ózińizdi aldamańyz. Bizdiń isimizge eshkim aralaspaýyn qadaǵalaý kerek»,—dedi Sadyr Japarov .
