"Qazaq tılı mındettı emes" dep jarnama taratqan Forte bank basqarma töraǧasy Bekjan Pırmatov qazaq tılıne qatysty dauǧa jauap berdı, dep habarlaidy "Adyrna" ūlttyq portaly Ūlysmediaǧa sıltep.
Ötken aida Qazaqstandaǧy bank äleumettık jelıde jarnama taratyp basy dauǧa qalǧan. Sebebı qyzmetkerlerdı şaqyru maqsatynda jasalǧan jarnamada qazaq tılın bıludıŋ maŋyzy joq ekenı körsetılgen. Jelı qoldanuşylary taqyrypty qyzu talqylap, köptıŋ aşuyn tudyrǧan. Bügınde bank basşysy basqarma tarapynan ketken qatelıktı moiyndady.
“Bızdıŋ tarapymyzdan sondai qatelık kettı. Ony moiyndaimyz. 4000-nan astam adam jūmys ısteidı dedım, jylyna orta eseppen 800-900 adam auysyp otyrady. Sol orynǧa jaŋa adamdardy tartu üşın, türlı platformalarǧa jarnama beremız. Qyzmetker bırden tabyla bermeidı. Jarnamamyzdy ekı ne üş ret qaitalap salamyz. Mysaly, soŋǧy jylda 1600 ret jariialandy. Osyndai kezde qatelık kettı,”- dedı Pırmatov.Forte bank töraǧasy jarnamalyq habarlandyrudyŋ robotizasiia küşımen daiyndalatynyn aityp, aqtaldy.
“Bız 1600 habarlandyrudy adam küşımen emes, robotizasiia kömegımen jasaimyz dep şeşkenbız. Al oǧan kerek mälımetterdı qyzmetkerler daiyndaidy. Habarlandyru berudı AiTi mamandary daiyndap salǧan. AiTi degen baǧdarlamalauşylar ǧoi. Olar qazaq tılı kerek emes dep jazyp jıbergen. Al robotizasiia qandai mälımet bar, sonymen vakansiialar platformasyna salǧan. Iаǧni, adami faktor ekenın moiyndaimyz. Özımızdıŋ ışkı prosesterımızge özgerıs engızdık. Qatemızdı tüzettık,”- dep jauap berdı Bekjan Pırmatov.
