Belgılı änşı Dimaş Qūdaibergen «New Vision: Biznes küşı» jahandyq biznes-forumynda qūndylyqtar taqyrybyn köterdı, dep habarlaidy «Adyrna» tılşısı.
28 mausymda Qazaqstan mädeni örleuıne arnalǧan paneldık sessiia aiasynda forumnyŋ qorytyndy bölımıne qatysqan öner iesı älemge beibıtşılık kerek ekenın mälımdedı.
«Men öz halqymdy, Otanymdy süie tūra, adamzatty ūltqa, dınge, tılge, näsılge bölmeitınımdı atap aitqym keledı. Qazaq halqy – dana halyq. Ärbır adam ainalasyndaǧy adamdarǧa jyly şyrai qarym-qatynas jasap, meiırımdı bolsa ol sol adamnyŋ danalyǧy dep bılemın. Älemge tek beibıtşılık qana kerek. Älemnıŋ köptegen elınde boldym. Menıŋ konsertterıme keletın körermender, qoldauşylarym — saiasat pen saiasi ügıt-nasihatqa eş qatysy joq adamdar. Sondyqtan men qazaq, olar fransuz, amerikalyq, qytailyq, serb, orys bolsyn – bärımız bauyrmyz»,—dedı Dimaş Qūdaibergen.
Sondai-aq ol tılge degen qūrmettıŋ maŋyzdy ekenın atap öttı.
«Ata-babamyzdyŋ öskeleŋ ūrpaqqa miras etıp qaldyrǧan mūrasyna nemqūraidy qaramai, özımız bırlıkte bolaiyq. Tılımızdı qūrmettep, halqymyzdyŋ qadır-qasietıne jetıp, älemdı qūşaq jaia qarsy alatyndai ädemı deŋgeide ömır süreiık!»— dep tolyqtyrdy änşı.
<View this post on Instagram
