Türkıstan oblysy Arys qalasyndaǧy äskeri qoimadaǧy jarylys kezınde jaralanǧan üş adamnyŋ bırı segız jasar Aian Şärıpbek qaitys boldy. Būl turaly Azattyqqa balanyŋ äkesı Erbol Şärıpbek habarlady.
Bügınge deiın Nūr-Sūltan qalalyq № 2 balalar auruhanasynyŋ jan saqtau bölımınde jatqan balanyŋ därıgerı Aidyn Nūrtasūlynyŋ sözınşe, Aiannyŋ jüregı 2 tamyzda taŋerteŋ toqtaǧan.
24 mausymda Arystaǧy qaru qoimasynda jarylys bolyp, adamdardy evakuasiialap jatqan kezde 8 jasar Aian Şärıpbektı kölık qaǧyp ketıp, basy jaraqattanǧan edı. Büldırşındı 28 mausymda sanaviasiiamen Nūr-Sūltan qalasyna şūǧyl jetkızgen. Därıgerler operasiia jasap, şetelden därıgerler şaqyrtylǧan.
Äkesı Erbol Şärıpbektıŋ sözınşe, üidıŋ kenjesı Aian zerek ärı pysyq bala bolǧan. Būǧan deiın Azattyqqa bergen sūqbatynda Erbol Şärıpbek Arys qalasyndaǧy jedel järdemnıŋ ūlyna der kezınde kömek körsetpegenın aitqan.
Densaulyq saqtau ministrlıgınıŋ deregınşe, jarylystan üş adam qaza tapqan. Onyŋ bırı - beibıt tūrǧyn, ekeuı - äskeri qyzmetker. Jarylystan soŋ 400-den astam azamat därıger kömegıne jügıngen. Taǧy 80 adam türlı jaraqatpen auruhanaǧa jatqyzylǧan.
24 mausymda Arys qalasynda äskeri qoima örtenıp, arty ırı jarylysqa ūlasqan. Resmi derek boiynşa, ondaǧy oq-därılerdıŋ 70 paiyzdan astamy jarylyp ketken. Qaladaǧy tūrǧyn-üilerdıŋ basym bölıgı bülıngen. Būǧan deiın bilık Arysty qalypqa keltıruge 34,5 mlrd teŋge qajet ekenın, är tūrǧynǧa 100 myŋ teŋge berıletının mälımdegen.
Derekköz: azattyq.org
"Adyrna" ūlttyq portaly
