QR Prezidentı Qasym-Jomart Toqaevtyŋ, Almaty qalasynyŋ äkımı Baqytjan Saǧyntaevtyŋ, Almaty oblysynyŋ äkımı Amandyq Batalovtyŋ nazaryna!
Baqytjan Saǧyntaev, Amandyq Batalov, «Altyn orda» bazarynyŋ qasyndaǧy, Aport sauda ortalyǧynyŋ artyndaǧy eldımeken qazır naǧyz qylmystyŋ ordasyna ainaldy. Mūnda adam tonau, ūrlyq-qarlyq, top bolyp töbelesu, qyz zorlau, adam öltıru faktılerı tym jiılep kettı. Bügınde halyq būl jaqty 13-şı raion, iaǧni «kriminaldy aimaq» dep ataityn boldy. Jūrtşylyq arasynda osy «būzaqy aimaq» atanǧan auylǧa qaşan köŋıl bölesızder, äkımder! Osydan bes-alty jyl būryn qylmys örşıp, terrorlyq äreketter oryn alǧandyqtan, oblysqa qaraityn bıraz auyldar Almaty qalasyna qosylyp edı. Bıraq bız qazır ne auylǧa, ne qalaǧa qaraitynymyzdy bılmei, ortada qaldyq. Bız qūjat boiynşa Qarasai audany, Irgelı auylyna qaraǧanymyzben, bızge su «Almaty su» kompaniiasynan berılıp otyr. Būl jer qalanyŋ territoriiasy dep aitylady. Degenmen jedel-järdem şaqyrsaq, bızge Qalqamannan da, Qarasai audanynan da eşkım kelmeidı. Qalqaman auruhanasy: «Sender Qarasai audanyna qaraisyŋdar» deidı, al Qarasai audany: «joq, sender qalaǧa qosylǧansyŋdar» dep, bır-bırıne sılteidı. Osylaişa, bız qazır ne auylǧa, ne qalaǧa kırgenımızdı bılmeimız. Ne anda, ne mūnda joqpyz, beitarap qaldyq. Bızge qaraityn bırde-bır äkım joq.
Äkımder! Amandyq Batalov, Baqytjan Saǧyntaev, el arasynda 13-şı raion atalyp ketken Almatynyŋ däl ırgesındegı «kriminaldy aimaq» halqy qazır jaryq, su, jol azabyn tartyp otyr. Mūnda 15 jyldan berı älı eşqandai mäsele şeşılgen joq. Tıptı auyl köşelerıne atau da berılmegen. Köşenıŋ aty bolmaǧan soŋ, jedel-järdem, ört söndıru qyzmetın şaqyrsaq, olar qaida bararyn bılmeidı. Adasady. Olar kelem degenşe, adam ölıp, janǧan üidıŋ tügı qalmaidy. Köşelerge jaryq ornatylmai, tas qaraŋǧy bolǧan soŋ, mūnda ūrlyq, tonau köp. Polisiia kelmeidı. Uchaskelık polisiia degen atymen joq. Mektep te salynbaǧan. Äkımder, sudy, jaryqty, joldy qaşan jasaisyzdar? Köşemız jazda – şaŋ-topyraq, köktem-küzde – mi batpaqqa ainalady. Alatau audanynyŋ äkımı Şahmerden Ryspaevtyŋ, Qarasai audanynyŋ äkımı Jandarbek Dalabaevtyŋ, tıptı auyl äkımınıŋ de būl jaqqa ömırı aiaǧy timegen. Olar osy uaqytqa deiın «jany aşymastyŋ qasynda basyŋ auyrmasynnyŋ» kerın keltırıp otyr. Äitpese, būl jaqtaǧy ülken jol qalaǧa qaraidy, bıraq ol ömırı jöndeu körgen joq.
Balalarymyz myna şaŋ-tozaŋ, mi batpaqtyŋ arasynan sonau 7-8 şaqyrym jerdegı mektepke jaiau baruǧa mäjbür. Onyŋ üstıne, mūnda jabaiy itter qaptap ketken. İesız itterden balalar tūrmaq, ülken adamdar köşede jüruge qorqady. Joldyŋ qiiametın aityp, qūzyrly organdarǧa qanşa şaǧymdanǧanymyzben, qūlaq asar eşkım joq.
Ökınştısı sol, bızde Irgelı auylynyŋ äkımı Qadyrbek Atşabarovtyŋ üiıne baratyn jol taqtaidai tep-tegıs, asfalt töselgen. Tıptı özı tūratyn köşege äkımnıŋ atasy Atşabardyŋ esımı berılgen. Al bızde jol tūrmaq, köşenıŋ aty joq. Osy ädıldık pe?
Jaqynda QR PRezidentı Qasym-Jomart Toqaev barlyq äkımderge äleumettık jelıdegı tūrǧyndar sūraǧyna jauap beruın mındettegen bolatyn. Sondyqtan Baqytjan Saǧyntaev, Şahmerden Ryspaev, Amandyq Batalov, Jandarbek Dalabaev 13-şı raion, «kriminaldy aimaqtyŋ» mäselesı naqty qaşan şeşıletının zaŋda belgılengen merzımde bızge jazbaşa türde berulerıŋızdı sūraimyz!
Auyl tūrǧyndary
"Adyrna" ūlttyq portaly
