"Şahristan" tarihi-mädeni keşenı Jambyl oblysynyŋ 80 jyldyq mereitoiyna deiın tolyǧymen aiaqtalyp, paidalanuǧa berıluı kerek. Būl turaly aimaq basşysy Asqar Myrzahmetovtyŋ töraǧalyǧymen ötken jiynda aityldy.
Jiynda «Şahristan» keşenınıŋ qūrylys jūmystaryna jauapty ştabtyŋ esebı tyŋdalyp, sala mamandary atqarylyp jatqan jūmystar jönınde baiandady. Asqar İsabekūlynyŋ aituynşa, keşennşennŋ qūrylys jūmystary öte baiau jürıp jatyr. Sondyqtan da aimaq basşysy qūrylys jūmystaryn jandandyra tüsu kerektıgın sala basşylaryna myqtap tapsyrdy. Naqtyraq aitsaq, keşennıŋ qūrylys jūmysyn der kezınde aiaqtau üşın ekı auysymdyq rejimge jaŋa jūmys kestesı bekıtılıp, 24 saǧat boiy tynbai eŋbektenu qajet. Äitse de, aimaq basşysy jūmysty jandandyramyz dep, qūrylystyŋ sapasyna jürdım-bardym qarauǧa bolmaitynyn eskerttı.
Sondai-aq, öŋır basşysy jūmys qarqyny artqan sätte tuyndaityn qūrylysqa qajettı materialdardy der kezınede jetkızıp tūru öte maŋyzdy ekenın aitty. Sol sebeptı ol qūrylys zattaryn öndıruşı käsıporynmen aldyn ala kelısım-şartqa otyryp, jūmysty kıdırtpeu kerek ekenın eskerttı.
Oblys basşysy «Şahristan» tarihi-mädeni keşenınıŋ qūrylysy kündelıktı öz baqylauynda ūstaitynyn jetkızıp, jauapty azamattarǧa naqty tapsyrmalar jüktedı.
Jalpy kölemı 200 gektardan astam aumaqty alyp jatqan «Şahristan» keşenınde körkem suret galereiasy, muzei, körme jäne ruhaniiat ortalyǧy, qolöner şeberhanasy, meiramhana, sonymen qatar amfiteatr jäne kölemdı saǧat stellasy siiaqty bırneşe nysan boi köteredı.
Būdan bölek, Taraz qalasynyŋ äkımı Qairat Dosaev baǧdarşamdar, jol belgılerı, jaryqtandyru, jol qozǧalysy mäselelerı boiynşa baiandama jasady. Qazırgı taŋda Tarazda barlyǧy 1330 daŋǧyl, köşe, būrylys bolsa, onyŋ 39 paiyzy asfaltbetondy joldar bolyp sanalady. Al qalanyŋ qalǧan 61 paiyz joly şaǧal, topyraqty köşeler. Osy mäselenı şeşu maqsatynda ötken jyly 500 million teŋge bölınse, biyl 2,1 milliard teŋge qarastyrylǧan. Atalǧan qarjynyŋ 1 milliard teŋgesı qalalyq biudjetke, 1,1 milliard teŋgesı oblystyq qazynaǧa tiesılı.
Asqar İsabekūly qala ışındegı joldardyŋ sapasy syn kötermeitının aşyq aitty. Tūrǧyndardyŋ talap-tılegın eskerıp, jaŋa joldar salu kerektıgın tapsyrdy.
"Adyrna" ūlttyq portaly
