Otbasy künı qarsaŋynda Astanada «Mereilı otbasy» ūlttyq baiqauy qorytyndylanyp, jeŋımpazdar marapattaldy. Saltanatty ıs-şaraǧa Qazaqstannyŋ barlyq aimaǧynan öŋırlık kezeŋderde jeŋıske jetken otbasylar qatysty.
Memleket basşysy Qasym-Jomart Kemelūly Toqaev baiqau jeŋımpazdaryna arnaiy sälemın joldap, qūttyqtau hatyn jıberdı. Prezidenttıŋ jyly lebızın Senat töraǧasy Mäulen Äşımbaev oqyp berdı.
Memleket basşysy özınıŋ qūttyqtau hatynda Ädılettı Qazaqstan qalyptastyru jolynda otbasy institutyn qoldau maŋyzdy qadam ekenın atap ötken. Sondyqtan elımızde būl baǧytqa basa män berılıp, jüielı şaralar qabyldanyp jatqany da aityldy.
«Mereilı otbasy» baiqauy – ūlttyq qūndylyqtardy jaŋǧyrtuǧa jol aşatyn, özındık dästürı bar bıregei joba. Halqymyzdyŋ asyl qasietterın öskeleŋ ūrpaqtyŋ boiyna sıŋıru – bärımızge ortaq mındet. Osy oraida är otbasy airyqşa röl atqarady. Elımızde adal eŋbegımen köpke ülgı bolyp jürgen önegelı äuletter az emes. Bügıngı saltanatty keş – sonyŋ aiqyn dälelı. Būl baiqaudaǧy ärbır otbasynyŋ jeŋısın bırlıgı jarasqan jūrtymyzdyŋ mereilı jetıstıgı dep baǧalauǧa bolady», – delıngen Prezidenttıŋ qūttyqtau hatynda.
Öz sözınde Mäulen Äşımbaev Memleket basşysy ūltymyzdyŋ jaŋa kelbetın qalyptastyruda otbasy instituty şeşuşı röl atqaratynyna ünemı nazar audaryp kele jatqanyn aitty. Palata Spikerı atap ötkendei, Prezident Ūlttyq qūryltaidyŋ otyrysynda jariialaǧan «Adal adam – Adal eŋbek – Adal tabys» tūjyrymy el ideologiiasynyŋ ırgetasy retınde airyqşa maŋyzǧa ie.
«Prezidentımız Qasym-Jomart Kemelūly Toqaev otbasynyŋ äleuetın köteruge, ana men balany qorǧauǧa, qoǧamda dūrys qūndylyqtardy därıpteuge ünemı basa män berıp keledı. Memleket basşysy özınıŋ Joldauynda da osy mäselelerge nazar audaryp, azamattarymyzdyŋ äl-auqatyn arttyruǧa arnalǧan kezektı äleumettık bastamalar keşenın jariialady. Mūnyŋ bärı elımızdegı är otbasynyŋ ömırıne oŋ yqpalyn tigızetını anyq», – dep, Mäulen Äşımbaev Palatanyŋ Memleket basşysy jüktegen mındetterdı ıske asyru aiasynda atqaryp kele jatqan zaŋnamalyq qyzmetıne toqtalyp öttı.
Sondai-aq biyl ıske qosylǧan «Ūlttyq qor – balalarǧa» atty auqymdy joba jönınde jäne sonyŋ aiasynda eldegı 7 million balanyŋ qamtylǧany söz boldy. Otbasylardy qoldauǧa jäne äielder men balalar qūqyǧyn qorǧauǧa arnalǧan basqa da şaralardyŋ maŋyzy aityldy.
Senat töraǧasy baiqau jeŋımpazdaryn qūttyqtai kele, adamgerşılık jäne otbasylyq qūndylyqtardy därıpteu ısınde «Mereilı otbasy» baiqauy eleulı röl atqaratynyn aitty.
Jalpy jobaǧa bır salada ūzaq jyldar boiy jūmys ıstep kele jatqan eŋbek dinastiialary, şyǧarmaşyl jäne bala asyrap alǧan otbasylar, volonterler men mesenattar qatysyp jatyr. Biyl baiqau 11-şı ret ötkızılıp otyr. Baiqaudyŋ öŋırlık kezeŋıne qatysuǧa Qazaqstannyŋ barlyq aimaqtarynan 3 369 ötınım tüskenın atap ötken jön. Baiqau jeŋımpazdaryn Mädeniet jäne aqparat ministrı Aida Balaeva qūttyqtady.
«Qazaqstandaǧy är otbasy – elımızdıŋ tıregı, jüregı. Sızderdıŋ baiqauǧa belsendı qatysyp, jeŋımpaz atanyp otyrǧandaryŋyz men üşın quanyş. Är otbasy ūlttyq qūndylyqtardy boiyna sıŋırıp otyrǧan balalarynyŋ qyzyǧyn köre bersın!» – dedı Aida Balaeva.
❇️«Mereilı otbasy – 2024» baiqauynda Aqmola oblysynan kelgen – Köŋbailar, Almaty oblysynan – Janbaevtar, Aqtöbe oblysynan – Nūrbaevtar, Abai oblysynan Smaǧūlovtar otbasy laureat atandy. Sondai-aq respublikalyq maŋyzy bar Astana, Almaty jäne Şymkent qalalarynyŋ jeŋımpazdary – Ädılbaevtar, Qapyşevtar jäne Sydyqovtar otbasylary. Odan bölek, Batys Qazaqstan oblysynan – Hamzinder otbasy, Qaraǧandy oblysynan – Halabaevtar, Soltüstık Qazaqstannan – Hasenovter, Atyraudan – Syrälievter, Qostanaidan – Şukurovtar, Jambyldan Taŋatarovtar, Jetısudan – Älekeevter, Pavlodardan – Temırovter, Ūlytaudan – Qydyrpatşaevtar, Qyzylordadan – Bektaevtar, Maŋǧystaudan – Mūqyrbaevtar, Türkıstannan – Meŋlıbaevtar jäne Şyǧys Qazaqstan oblysynan Qydyrhanovtar otbasy üzdık dep tanyldy.
Ūqsas jaŋalyqtar
