Täuelsızdıktıŋ tūnyq auasymen tynys alǧan jyldary Batys Qazaqstan oblysyna qarasty Börlı audanynyŋ ekonomikasy da ösıp-örkendeu jolyna qadam basty. Memleket basşysynyŋ jyl saiynǧy Qazaqstan halqyna arnalǧan Joldaulary bolaşaǧymyzdyŋ baǧdarşamyna ainaldy. Atqarylar auqymdy ısterge tyŋ serpın berdı. Ärbır salaǧa arnalǧan memlekettık baǧdarlamalar aiasynda halyq müddesı, igılıgı üşın örelı ıster keŋge qanat jaidy. Alǧa qoiǧan mındetterdı jüzege asyru baǧytynda biylǧy jyl basynan berı nätijelı ısterdıŋ jüzege asqanyna el kuä. Bügınde audanda 19 178 otbasy bar, adam sany 57 868 qūraidy.
Börlı audanynyŋ äkımı Erkebūlan İhsanovtyŋ aituynşa, aǧymdaǧy jyldyŋ segız aiynyŋ qorytyndysy boiynşa audan biudjetı 14,7 mlrd teŋgenı qūrady. Bügıngı taŋda audanda aumaǧynda 91 biudjettık joba jüzege asuda.
Audan ekonomikasyna jeke investisiialar ösımınıŋ oŋ serpını baiqaluda. Ötken jyly 1,8 mlrd teŋgege segız joba aiaqtalyp, ıske qosylǧan.
Börlı audany boiynşa tırkelgen şaǧyn jäne orta biznes subektılerınıŋ sany – 5136.
Üş investisiialyq joba jüzege asuda
Bügınde audanda auylşaruaşylyq baǧytynda 465 şarua qojalyǧy, 22 jauapkerşılıgı şekteulı serıktestık jäne 27 auylşaruaşylyǧy öndırıstık kooperativı tırkeude. Jyl basynan bastap auyl şaruaşylyǧynyŋ önımı 3 mlrd 270 mln teŋgenı qūrady. Egıstık alqaby 63 807 gektardy qūraidy.
Öŋırımızdıŋ agroöndırıstık keşenın damytu maqsatynda äleumettık maŋyzy bar üş investisiialyq joba ıske asyrylu satysynda. Erkebūlan Nūretdinūlynyŋ mälımetınşe, «Dostyq-Qonys» JŞS ettı mal şaruaşylyǧyn damytu baǧytynda asyl tūqymdy maldy ösıru jäne bordaqylau jönındegı auyl şaruaşylyǧy keşenın saluda. Jobanyŋ quattylyǧy – 2 myŋ bas. Qūrylys ötken jyldary bastalyp, 2026 jyly paidalanuǧa berıledı dep josparlanǧan. Öŋırımızdıŋ agroöndırıstık keşenın damytu jobasy aiasynda «Amanat» şarua qojalyǧyna 1 mlrd 64 mln teŋge arzandatylǧan nesie bölınıp, auylşaruaşylyq tehnikasy, 80 ga. suarmaly aimaqqa arnalǧan jaŋbyrlatyp suaru keşenı, süt fermasynyŋ qajettı jabdyqtary satyp alynǧan. Sondai-aq aǧymdaǧy jyldyŋ aiaǧyna deiın Vengriia memleketınen golştin sūrypty 408 bas asyl tūqymdy malyn satyp alady. Bügınde 630 bas siyrǧa arnalǧan ekı qora jäne siyr sauu orny, süt blogy jäne süt salqyndatqyştary bar. «Amanat» şarua qojalyǧy 2025 jyly qosymşa quattylyǧy 80 ga. jaŋbyrlatyp suaru keşenın satyp aludy josparlauda. Nätijesınde, künıne 8800 litr süt öndıru arqyly audan jäne oblys tūrǧyndaryna sapaly önım ūsynatyn bolady.
«Jarsuat» JŞS-nyŋ 950 gektar suarmaly jerı bar, bügıngı taŋda 222 gektary igerılıp otyr, onyŋ ışınde 128 gektarǧa kartop, 84,5 gektarǧa kökönıs jäne 9,5 gektarǧa baqşa daqyldary egılgen. 2025 jyly üş jaŋbyrlatyp suaru keşenın satyp aludy josparlap otyr. Suarmaly alqapty tolyq paidalanu 2028 jylǧa josparlanuda. Būdan bölek, 2025 jyly syiymdylyǧy 12 myŋ tonna kartop jäne kökönıs saqtauǧa arnalǧan qoima qūrylysy josparlanǧan. Serıktestık 200 basqa arnalǧan bordaqylau alaŋyn saldy. Osy maqsatta şaǧyn qūrama jem öndıretın seh jabdyqtaldy.
680 azamatqa jer telımı berıledı
Qazırgı taŋda audan boiynşa 2783 adam tūrǧyn üi kezegıne tırkelgen.
«Nūrly jer» baǧdarlamasy aiasynda 10 şaǧynaudanda 9 qabatty 198 päterlı tūrǧyn üidıŋ qūrylysy jüzege asuda. Qūrylys jūmystaryn aǧymdaǧy jyldyŋ soŋyna deiın aiaqtap, kezekte tūrǧan azamattarǧa «Otbasy bankı» arqyly beru közdelıp otyr. Baǧdarlama boiynşa Aqsai qalasynyŋ 10 şaǧynaudanynda 9 qabatty 126 päterlı ekı tūrǧyn üidıŋ qūrylysy jalǧasuda. Tūrǧyn üi-kommunaldyq infraqūrylymdy damytudyŋ 2023-2029 jyldarǧa arnalǧan tūjyrymdamasy aiasynda auyldyq eldımekenderge 132 tūrǧyn üi satyp alu josparlanuda. Audan boiynşa 15506 adam jer telımınıŋ tızımınde tūr. Jer kezegınde tūrǧan azamattar üşın Börlı auylynda jeke tūrǧyn üi qūrylysyn damytuǧa arnalǧan, sumen, gazben jäne elektrmenjabdyqtaudyŋ injenerlık jelılerın salu jobasy ıske asyryluda. Qūrylys nysanynyŋ aiaqtaluy 2025 jyldyŋ I jartyjyldyǧyna josparlanyp otyr. Qūrylys jūmystary aiaqtalǧan soŋ 680 azamatqa jer telımı berıletın bolady.
Sondai aq, Aqsai qalasy «Jiloi Massiv-2» PDP-sy 800 jer uchaskelerın sumen jabdyqtau jūmystary aiaqtaldy.Endıgı kezekte elektr jäne gazben qamtamasyz etu jūmystary biylǧy jyly aiaqtalyp, kezekte tūrǧan azamattarymyz üşın jer uchaskelerın ülestırıletın bolady.
– Memleket basşysynyŋ aldymyzǧa qoiǧan mındetterınıŋ bırı –tūrǧyndardyŋ ömır sapasyn jaqsartu jäne oǧan qolaily jaǧdai jasau bolyp tabylady. Būl baǧytta biylǧy jyly Bumaköl jäne Priural auyldarynda elektr jelılerın qaita jaŋartuǧa respublikalyq biudjetten qarajat bölınıp, jūmystar jürgızılude. Aqsaidaǧy elektr jelısınıŋ tozuyn tömendetu üşın qalanyŋ oŋtüstık bölıgındegı şaǧynaudanynda jäne 7-şaǧynaudan men 4-şı Qūrylysşy şaǧyn audandar arasyndaǧy elektr jelılerın qaita jaŋartu üşın jobalyq smetalyq qūjattama jasaqtalyp, memlekettık saraptamanyŋ oŋ qorytyndysy alyndy. «BQO Börlı audany Aqsu auyldyq okrugınıŋ Aqsu jäne Jaŋaqonys auyldaryndaǧy elektr jelılerın qaita jaŋartu» nysany boiynşa jobalyq smetalyq qūjattamasy jasaqtaluda. Saraptamanyŋ oŋ qorytyndysyn alu osy aiǧa josparlandy. Qalanyŋ su qūbyry jelılerınıŋ tozuyna bailanysty jiı apatty jaǧdailar oryn alyp, tūrǧyndar üşın qolaisyzdyqtar tudyruda, – degen audan basşysy atalǧan mäselenı şeşu maqsatynda Aqsai qalasynyŋ 4,5 jäne 10-şy şaǧyn audandanyndaǧy su qūbyrlaryn qaita jaŋǧyrtu jūmystary jürgızılude ekenın, atalǧan jobalar qazan aiynyŋ soŋynda aiaqtalatynyn jetkızdı.
Käusar BAIǦALİEVA
