Batys Qazaqstan oblysynyŋ Qaztalov audanynda «Qaladan-auylǧa» baǧdarlamasy qarqyndy jüzege asuda. Öŋırlık baǧdarlama aiasynda Bolaşaq auyldyq okrugınıŋ Jaŋataŋ jäne Köpkütır eldı mekenderınen 4 otbasy jaŋa baspanaǧa ie boldy. Baspanaly bolǧan otbasylardy oblys äkımı Nariman Töreǧaliev qūttyqtap, tūrǧyn üi kıltın saltanatty türde tabystady.
Öŋırımızde Memleket basşysynyŋ tapsyrmasymen bırqatar infraqūrylymdyq jobalar, memlekettık baǧdarlamalar jüzege asuda. Onyŋ syrtynda öŋırlık baǧdarlamalarymyzdy da ıske qosyp jatyrmyz. Sonyŋ ışınde «Qaladan auylǧa» baǧdarlamasy jas otbasylar üşın, halyqtyŋ äl-auqatyn arttyru jäne auyldar men eldı mekenderdı damytuǧa sep bolady. Baǧdarlama aiasynda Qaztalov audanyna köşıp kelgen jas otbasylardy qūttyqtaimyn! Şaŋyraqtaryŋyz berekelı bolyp, quanyş pen şattyqqa tolsyn! – dedı oblys äkımı.
Audanda joba ıske asyrylatyn auyldarda 16 tūrǧyn üi satyp alynuda. Bügınde auyldarǧa qūramynda 78 adam bar (sonyŋ ışınde 50 bala) 14 otbasy köşıp kelıp, uaqytşa üilerge ornalastyryldy. Barlyq otbasylar tūraqty jūmyspen qamtylyp, mektep jasyndaǧy 24 bala mektepke, 25 bala mektepke deiıngı ūiymdarǧa ornalasty.
Jaŋataŋ eldı mekenındegı saltanatty ıs-şarada Sisenovtar men Sündetovter otbasy (Jaŋataŋ eldı mekenı), Jakupovtar men Abdrahmanovtar (Köpkütır eldı mekenı) otbasy jaŋa baspanaǧa ie boldy. Baǧdarlamanyŋ igılıgın körgen Sisenovtar janūiasynyŋ otanasy Şynarai Töremūratova quanyşymen bölısıp, oblys basşylyǧyna rizaşylyǧyn bıldırdı.
– Oblys äkımı Nariman Töreǧaliūlynyŋ bastamasymen jüzege asqan jobanyŋ naqty jemısı. «Qaladan-auylǧa» baǧdarlamasyna qatysuşy otbasylardyŋ atynan şynaiy rizaşylyǧymyzdy bıldıremın. Baǧdarlama arqyly Qaztalov audanynyŋ Jaŋataŋ auylyna aqpan aiynyŋ basynda köşıp kelgen bolatynbyz. Qaladan köşıp kelu barysynda jergılıktı atqaruşy organdar barlyq mümkındıktı qarastyryp, uaqytşa tūrǧyn üimen jäne siyr, qoi men eşkı maldarymen qamtamasyz ettı. Qazır sol tört tülıktıŋ igılıgın körudemız. Joldasym Aiat ekeuımızdı tūraqty jūmysqa ornalastyrdy. Joldasym merdıgermen bırge osy üidıŋ salynuyna atsalysty. Özegınen teppei, qūşaq jaia qarsy alǧan auyl halqyna da alǧysymyz şeksız! – dedı ol.
Saltanatty ıs-şarada jas otbasylarǧa tūrǧyn üi kıltımen qatar, ekı bas ırı qara jäne 10 bas qoi men eşkınıŋ sertifikaty tabystaldy. Al auyldyŋ batagöi aqsaqaly Musin Esmaǧūl jas otbasylarǧa aq batasyn berdı.
Aita keteiık, qos eldımekende tūrǧyn üi qūrylystaryn jeke investorlar Meiırbek Fatihov jäne Amanjol Kereev jürgızdı.
