Ükımet: Järdemaqy alǧan 70 myŋ otbasy tabysyn jasyrǧan

Saparbaevtyŋ sözınşe, 200-300 myŋ teŋge (520-700 dollar) tabatyn otbasylar tabysyn 40-60 myŋ teŋge (103-155 dollar) dep körsetken. Ministr orynbasary otbasylardyŋ tabysy olardyŋ zeinetaqy qory salymdaryna bailanysty tekserılgenın aitty. Onyŋ sözınşe, qazır ükımet pen äkımdıkter otbasylardyŋ naqty qanşa tabysy baryn anyqtau üşın jūmys ıstep jatyr. 17 tamyzda Qazaqstan eŋbek jäne halyqty äleumettık qorǧau ministrlıgı 21 myŋ otbasy atauly kömek alu üşın tabysyn jasyrǧan dep mälımdegen. Biyl aqpanda elde köp balaly äielderdıŋ bilıkke talaby küşeigen tūsta Qazaqstan ükımetı tūrmysy tömen otbasylarǧa atauly äleumettık kömek töleitınderın jariialaǧan. Analar narazylyǧy 4 aqpanda Nūr-Sūltanda uaqytşa baspanadaǧy örtten keiın bastalǧan. Sol oqiǧadan bır otbasynyŋ bes balasy qaza tapqan. 27 aqpanda “Nūr Otan” partiiasynyŋ jiynynda sol kezdegı el prezidentı Nūrsūltan Nazarbaev tūrmysy tömen otbasylarǧa äleumettık kömektı 70 paiyzǧa ösırudı, köp balaly otbasylardyŋ är balasyna 21 myŋ teŋge töleudı būiyrǧan. Keiın parlament atauly äleumettık kömek turaly zaŋ qabyldap, oǧan Nazarbaevtyŋ ornyna kelgen qazırgı prezident Qasym-Jomart Toqaev qol qoiǧan. Säuırden bastap jergılıktı bilık otbasylardan äleumettık kömekke qūjat qabyldai bastaǧan. Bıraq äielder qūjat ötkızudıŋ qiyndyǧyn aityp, jiı şaǧymdanady. 21 tamyzda “Nūr Otan” jiynynda partiia töraǧasy Nazarbaev köp balaly äielder men şetelden köşıp kelgen qazaqtardy “bilıkten kömek sūrai beredı” dep söktı. - "Maǧan ber, menıŋ balam köp, ailyǧym az" deidı. Sen ne oiladyŋ? Būl – senıŋ mäseleŋ ǧoi, sen būryn memleketpen aqyldaspadyŋ ǧoi" dedı Nazarbaev partiia jiynynda. Eŋbek jäne halyqty äleumettık qorǧau ministrlıgınıŋ esebınşe, 15 tamyzdaǧy jaǧdai boiynşa 1,8 million qazaqstandyq AÄK alǧan. Biudjetten AÄK töleu üşın 103 milliard teŋge (335 mln dollar) bölıngen. Järdemaqy alǧandardyŋ 42 paiyzy qalada, 58 paiyzy auylda tūrady.​

"Azattyq" radiosy