Jetısu öŋırınde mümkındıgı şekteulı jandar «İnvataksi» qyzmetın tūraqty paidalanady. Jyl basynan berı mümkındıgı şekteulı jandarǧa 60 myŋnan astam ret qyzmet körsetılgen. Bügıngı taŋda oblysta arnaiy qyzmet körsetetın 34 «İnvataksi» bar, – dep habarlaidy Jetısu oblysy äkımınıŋ baspasöz qyzmetı.
– Ötken jyly oblys äkımı Beibıt İsabaevtyŋ tapsyrmasymen jergılıktı biudjet esebınen 14 jaŋa «İnvataksi» satyp alyndy. Sonyŋ nätijesınde oblysta 1 jyldyŋ ışınde jekemenşık taksiler sany ekı esege artty. 2024 jyly 34 avtokölıkpen «İnvataksi» qyzmetın körsetu üşın 306,6 million teŋge bölındı, – dedı oblystyq jūmyspen qamtudy üilestıru jäne äleumettık baǧdarlamalar basqarmasynyŋ basşysy Ermek Mizambaev.
Oblys aumaǧynda «İnvataksi» qyzmetın 8 ükımettık emes ūiym jüzege asyrady. Onyŋ ekeuı Taldyqorǧan qalasynda. Bırı – «Erlık» mügedekter qoǧamdyq ūiymy bolsa, ekınşısı «Taldyqorǧan» korporativtık qorynyŋ «Qazaq zaǧiptar qoǧamy» qoǧamdyq bırlestıgı. Jalpy, oblys ortalyǧynda barlyǧy 13 mamandandyrylǧan «İnvataksi» kölıgı mümkındıgı şekteulı jandarǧa qyzmet körsetedı.
– Alǧaşynda mümkındıgı şekteulı jandarǧa 3 avtokölık qyzmet körsetetın. Memleket qoldauynyŋ nätijesınde qazır 8 avtokölıkke ie boldyq. «İnvataksi» qyzmetınıŋ jürgızuşılerı erekşe qajettılıkterı bar adamdardy jūmysqa, mektepke, sporttyq, sauyqtyru şaralaryna alyp barady. Memleket tegın körsetetın äleumettık qyzmettıŋ paidalanuşysy bolu üşın mügedekterge arnalǧan «Erlık» QB janyndaǧy «İnvataksi» qyzmetıne mügedektıktı rastaityn qūjattardy tapsyru qajet. Ötınışter kölıktı jetkızuge bır kün qalǧanda telefon arqyly qabyldanady. Belgılı bır mekemege baratyn kölıktıŋ jetkızıletın künı, uaqyty jäne ol jerden qaitatyn uaqyty körsetıledı, – deidı «Erlık» mügedekterge arnalǧan qoǧamdyq ūiymnyŋ ökılı Nūrbek Tūrǧanov.
Taldyqorǧan qalasynyŋ tūrǧyny Gülnar Nūrǧalieva bırneşe jyldan berı «İnvataksi» qyzmetın paidalanyp keledı. Osy äleumettık qyzmettıŋ arqasynda arbaǧa taŋylǧan jan kün saiyn jūmyspen qamtudy üilestıru jäne äleumettık baǧdarlamalar bölımındegı jūmysqa oŋai jetıp, keşkısın üiıne qaitady.
«Bızdıŋ qalada osyndai qyzmettıŋ baryna quanyştymyn. Būl – öte yŋǧaily. Bızge ülken qoldau dep bılemın. Äsırese, «İnvataksidıŋ» qyzmet körsetu sapasy köŋılımızden şyǧady. Öz basym būl kölıktı kündelıktı jūmysqa baryp, qaitu üşın paidalanamyn», – deidı «Aqjanel» sauyqtyru ortalyǧynda medbike bolyp jūmys ısteitın Jadyra Qasymova.
Jalpy, Jetısu oblysynda jan-jaqty qoljetımdılıktı qamtamasyz etıp, kedergısız orta qalyptastyruǧa basa nazar audaryluda. Mäselen, jyl basynan berı 168 äleumettık infraqūrylym nysanyna kedergısız orta qalyptastyru boiynşa jüielı jūmys jürgızıldı. Qazırdıŋ özınde oblysta bılım, densaulyq saqtau, mädeniet, sport nysandaryn, sondai-aq memlekettık mekemelerdı qosa alǧanda, barlyǧy 628 nysan josparǧa säikes jasaqtaldy.
