Qazaqstanda AES salynǧan jaǧdaida 1200 megavattyq reaktordy eldıŋ energetika jüiesıne kırıktıru mümkın emes ekenın aityp jürgen sarapşylar bar. «Qazaqstan atom elektr stansiialary» JŞS bas direktory Timur Jantikin agenttık tılşısıne bergen sūhbatynda osyndai syni pıkırlerge bylaişa ün qatqan bolatyn.
«Bız su ışındegı su atom reaktoryn taŋdap qoidyq. Qauıpsızdık mäselesınde bır problema bolǧan. Sol problema azdap şeşılmei jatyr deuge bolady. Bız salsaq dep otyrǧan 1200-1400 megavattyq atom reaktoryn Qazaqstannyŋ energetika jüiesıne kırıktıru oŋai şarua emes. Tepe-teŋdıktı saqtau, apattyq sätsızdıkter kezınde tūraqtylyqty qamtamasyz etu siiaqty mäseleler aiqyn emes. Bıraq onyŋ bärın şeşuge bolady. Eŋ oŋtaily jolyn tabu kerek», — deidı sarapşy.
Energetik elde salynuy mümkın dep otyrǧan alǧaşqy AES 1200 megavattyq reaktorǧa negızdelgenımen, şaǧyn quatty reaktorlardy esepten müldem şyǧaryp tastauǧa bolmaitynyn aitady.
«Qazaqstannyŋ jüiesıne şaǧyn quatty reaktorlar jaqsy keler edı. Mysaly, toqsanynşy jyldary 640 MVt-tyq su ışındegı su atom reaktoryn salmaqşy boldyq. Qazır şaǧyn moduldık reaktorlar sänge şyǧa bastady. Al bız 2000 jyldardyŋ basynan berı būl taqyrypty zerttep kele jatyrmyz. Aqtauda Maŋǧystau atom energetikalyq kombinatynyŋ alaŋynda AES saluǧa baǧyttalǧan joba bolǧan. Ol jerde 300 MVt-tyq ekı blok ornatpaq bolǧanbyz. Qazır älemnıŋ şaǧyn moduldı reaktor dep jürgenı sol. Būl ıste bız jer şarynyŋ aldyna şyǧyp ketkenbız. Osynyŋ bärın eskersek, şaǧyn moduldı reaktorlardy da esepten şyǧarǧan joqpyz. Bızdıŋ kompaniia osy tehnologiiany ūsynuşylarmen serıktestık jönınde memorandumǧa qol qoidy. Öte sezımtal aqparattardy almasumen bailanysty basqa da qūjattar bar. Būl amerikalyq kompaniialardyŋ bırı — NuScale Power. Ekınşısı — General Electric. Būl japon-amerikalyq bırlesken käsıporyn bolyp esepteledı», — deidı Timur Jantikin.
Sūhbattyŋ tolyq nūsqasyn myna jerdenoquǧa bolady.
