Aǧam bır künı äke–şeşeme: «Qatyn alam, qatyn almasam, myna qysta toŋyp, qatyp qalam!» –dedı. Äke–şeşem kädımgıdei uaiym jedı. «Qoi, qatyp qalmasyn, üilendıreiık!» –dep şeştı. Sodan, aǧam jürıp jürgen qyzyn dostarymen bırge äkeluge kettı. Bız bır jyl sypyrylmaǧan aulany sypyryp, qorany malaqtardan tazalap, bes jyl boiy äktelmegen üidıŋ ışın äktep, keşe tyşyp ketken ittıŋ qatqaq näjısterın aulaqqa aparyp tastap, şaşylyp jatqan baklaşkalardy baqşanyŋ şetıne qarai laqtyryp, qar kürep, qisaiyp qalqan antennany tüzulep, temır qaqpany aiqara aşyp, ınım ekeumız aiaq–qolymyzdyŋ tyrnaqtaryn alyp, monşaǧa tüsıp, şaşymyzdy retke keltırıp, keşke äreŋ bosadyq. Şeşem baiǧūs bauyrsaq pısırıp jatty abysyndarymen. Äkem dosynan aqşa qaryz sūrauǧa ketıp, köŋıldı oraldy. Sodan ne kerek, aǧam yzbandap tūr:
–Kelınderıŋız kelmeitın boldy!
–Nege oibai?
–Qyz emes eken.
–Qalai, qyz emes eken? –dep sūraidy äkem aşulanyp.
–Küieuı bar eken ǧoi...
Sodan ne kerek, temır qaqpany jauyp, baklaşkalardy qaitadan şaşyp jıberıp, ittıŋ qatyp qalǧan näjısın ornyna qoiyp, qoraǧa malaqtardy qaita tastap, aulanyŋ astan–keseŋın şyǧaryp, kürelgen qardy kerı syrǧytyp, antennany qisaityp qoiyp, qolymyz ben aiaqtarymyzdyŋ tyrnaqtaryn oryndaryna jelımdep, monşaǧa baryp, tura aldynan qaityp salyp, şaşymyzdy ūipa–tūipa etıp, äkem dosynan qaryz alǧan aqşasyn aparyp berıp, şeşem bauyrsaqtardy körşılerge taratyp bıtkende, aǧam taǧy yzbandady.
–Alläu?
–Ne boldy, bäläu? –dedı anam.
–Daiyndalyŋyzdar, kelınderıŋız baratyn boldy!
–Küieuı bar ma? Keregı joq, oibai?
–Joq, basqa qyz. Endı tanysyp jatyrmyn.
–Keregı joq, oibai!
–Köktemge deiın toŋbaimyz, ajyrasyp ketsek oŋbaimyz deidı.
Sodan ne kerek, taŋerteŋgı jūmystarymyzdy qaitalap, äkem dosynan quanyp kelıp otyrǧanda, aǧam yzbandady:
–Ne boldy taǧy? –dep sūrady äkem.
–Kelınderıŋız kelmeitın boldy.
–Sol kelını qūrǧyr kelmei–aq qoisynşy, a?
–«Ekeumız jatatyn bölmenıŋ, üidıŋ, ashananyŋ suretın, enemnıŋ 3h4 fotosyn vasappen jıberşı» deidı.
–Odan ärı! Jolama, oibai!
Ne kerek, tura jaŋaǧydai bärın oryn–ornyna qaitadan jaiǧastyrdyq. Aǧam köktemde, kelınşegımen bırge jatqanda toŋbaityn kezde üilenbekşı... Bızdıŋ üide kömır joq, al kömırsız ömır joq!
"Adyrna" ūlttyq portaly
