«Zerendı-Astyq» JŞS jäne onyŋ investory – «Qazaqstan astyq konsorsiumy» JŞS basşylary baspasöz mäjılısınde biylǧy egın nauqanynyŋ barysy jaiynda baiandap, jurnalisterdıŋ saualdaryna jauap berdı.
«Qazaqstan astyq konsorsiumy» JŞS bas direktory Baqtiiar Ospanovtyŋ aituynşa, biyl «Zerendı-Astyq» JŞS mol önım berıp, konsorsium serıktestıkke investor bolyp kelgennen bergı rekordty körsetkışke ie bolǧan. Qazırgı taŋda kompaniia paişylarǧa tölemaqy beru jūmystary bastaldy. Aita ketu kerek, Qazaqstan astyq konsorsiumyna kıretın şaruaşylyqtar arasynda «Zerendı-Astyq» JŞS alǧaşqy bolyp pai boiynşa tölemaqy berıp jatyr.
«Qazaqstan astyq konsorsiumy 2021 jyly «Zerendı-Astyq» serıktestıgıne onyŋ qaryzdaryn ötep, jūmysty jolǧa qoiu maqsatynda kelgen bolatyn. Būrynǧy aksionerdıŋ kezınde kompaniia qūldyrap, onyŋ türlı bankte qaryzdary bar boldy. «Zerendı-astyqtyŋ» özı Problemalyq kreditter qoryna kepılge berılgen. Kompaniia bankrot boludyŋ aldynda ǧana tūrǧan edı. Bız investor retınde kelu arqyly arqyly kepılde tūrǧan jerlerdıŋ satylyp ketuınıŋ aldyn aldyq. Ärine, memleket bızge kompaniianyŋ barlyq qaryzyn öteu mındetın qoidy. Qazır būl mäselenı bırtındep şeşıp jatyrmyz», – dedı Baqtiiar Ospanov.
Alaida, onyŋ tüsındıruınşe, «Zerendı-Astyq» JŞS qūramyna kıretın paişylardyŋ zaŋsyz jolmen hattama jasau arqyly serıktestıkten şyǧuy kompaniianyŋ damuyna ülken kedergı keltırıp otyr. Būryn 36 myŋ gektar jerge ie bolǧan serıktestık bügınde 18 myŋǧa juyq gektardan aiyrylǧan. Būl jerlerdıŋ ielerı basqa kompaniialarǧa ötıp ketken.
«Bız būl tūrǧyda investor retınde öte qiyn jaǧdaida qalyp otyrmyz. Öitkenı, bız būrynǧy aksionerdıŋ qaryzy tolyq öteu mındetın moinymyzǧa aldyq, alaida egın egetın jer kölemı aitarlyqtai azaiyp kettı. Qazır serıktestık pen paişylar arasynda ūzaqqa sozylǧan sot prosesı jürıp jatyr. Atalǧan hattamalardyŋ jalǧan ekenın rastaityn sot şeşımderı şyqty. Degenmen, qazır bızge şartty türde paişylarmen beibıt kelısımge kelu üşın uaqyt berılıp otyr. Osyǧan orai, bız paişylardy serıktestıkke qaita oraluǧa, bırge jūmys ısteuge, säikesınşe dividendterın aluǧa şaqyramyz», – dedı Baqtiiar Ospanov.
«Zerendı-Astyq» JŞS mälımetınşe, serıktestık qūramynan şyǧyp ketken şamamen 70 paişy 2023 jyly qaita oralǧan. Qazırgı taŋda taǧy 30-dan astam paişy qaita serıktestık qūramyna ötu boiynşa daiyndyq jūmystaryn jürgızıp jatyr.
«Qazaqstan astyq konsorsiumy» JŞS bas direktory Baqtiiar Ospanov būl rette paişylarǧa tölenetın dividend mölşerı de ūlǧaiǧanyn eske saldy. Eger «Qazeksportastyq» kompaniiasy investor bolǧan tūsta paişylar önımnıŋ 5 paiyzy mölşerınde tölemaqy alsa, bügınde ol 7,5 paiyzdy qūraidy.
Qūramyna 23 şaruaşylyq kıretın Qazaqstan astyq konsorsiumy basşysy kompaniianyŋ äleumettık jauapkerşılık jäne kompaniiany tehnikalyq jaraqtandyru baǧytyndaǧy jūmystar turaly da baiandady. Kompaniia biyl 43 jaŋa kombain (10-y – importtyq önım) satyp alsa, 2025 jylǧy köktemde auyl şaruaşylyǧy tehnikalarynyŋ qatary 32 egın egu keşenımen tolyǧady. Kompaniia äleumettık jauapkerşılık aiasynda jyl saiyn auyldar arasyndaǧy joldy qardan tazalau jūmystaryn öz küşımen jüzege asyrady. Sondai-aq, «Zerendı-Astyq» JŞS paişylary tūratyn, eŋbek etetın auyldarda mädeniet üiın, medisinalyq punktın jöndeu jūmystaryn jüzege asyryp jatyr.
«Ökınışke qarai, biylǧa deiın «Zerendı-Astyq» JŞS körsetkışterı tömen boldy. Oǧan qosa, paişylardyŋ serıktestıkten ketuı kompaniianyŋ joǧary damuyna mümkındık bermei keldı. Soǧan qaramastan, kompaniia äleumettık jauapkerşılık aiasyndaǧy öz mındettemelerın oryndap keledı. Bız tek törtınşı jyl degende serıktestık tabysqa şyǧady dep boljap otyrmyz. Tabystyŋ artuyna qarai oblysta äleumettık baǧyttaǧy jūmystardy köbırek oryndauǧa küş salamyz», – dedı Baqtiiar Ospanov.
