Qazaqstan azamaty emes sportşylarǧa memlekettık biudjetten bır teŋge de bölınbeidı. Būǧan qosa kvazimemlekettık sektordan da şeteldık atletterdı qarjylandyru tolyqtai toqtatylady, dep habarlaidy «Adyrna» ūlttyq portaly.
Endı zaŋǧa säikes basqa elden kelgen sportşylardyŋ jalaqysy da, bonustary da, tıptı transfer tölemderı de qazynadan qarjylandyrylmauǧa tiıs. Būl jönınde Mäjılıs deputaty Nartai Särsenǧaliev mälımdedı.
«Legionerlerge 1 tiyn bermeitın Zaŋdyq normamdy Ükımet qoldady. Adam estımegen sport türlerıne aqşa berıp kelgen ministrlıktıŋ şeşımı de toqtatyldy. 180 sport türı qysqartylady! Tiıstı normamdy Ükımet qoldady» - dep jazdy Nartai Aralbaiūly äleumettık jelı paraqşasynda.«Qazaqstan Respublikasynyŋ keibır zaŋnamalyq aktılerıne dene şynyqtyru jäne sport, sondai-aq normalardyŋ artyq (şamadan tys) zaŋnamalyq reglamentteluın bolǧyzbau mäselelerı boiynşa özgerıster men tolyqtyrular engızu turaly» Zaŋynyŋ 49 baby: Bırınşı bölıgı: «Qazaqstan Respublikasynyŋ azamattary bolyp tabylmaityn sportşylardy biudjet qarajaty esebınen qarjylandyrudy jüzege asyruǧa tyiym salynady»; Ekınşı bölıgı: «Qazaqstan Respublikasynyŋ azamattary bolyp tabylmaityn sportşylardy kvazimemlekettık sektor subektılerınıŋ qarajaty esebınen qarjylandyruǧa jol berılmeidı» - dep jazyldy. 49-bap. Dene şynyqtyru men sportty qarjylandyru közderınıŋ 6 - tarmaǧy mynadai mazmūnda jazylady: «Biudjet qarajaty esebınen qarjylandyru mynadai baǧyttar boiynşa jüzege asyrylady: 1) joǧary jetıstıkter sporty, onyŋ ışınde sporttyŋ basym türlerı; 2) memlekettık sport ūiymdarynyŋ jūmys ısteuı; 3) būqaralyq sport; 4) sporttyq infraqūrylymdy damytu».
