Kıtap oqudyŋ hikmetı men qyzyǧy jaiynda oi bölısken mädeniet salasynyŋ belsendısı qarapaiym äreketter kışkentai qadamdardan bastalady deidı.
Qazaqstandy kıtap oqityn elge ainaldyru missiiasynyŋ aiasynda tuyndaǧan Kitapal club, Kitapal podcast, Auylǧa Kitapal jobalarynyŋ jetekşısı Daniiar Jıgıtbek atqarylǧan jūmystarymen bölısıp, aldaǧy josparlaryn tanystyrdy.
- «Qazaqstandy kıtap oqityn elge ainaldyru» missiiaŋyzdy oidaǧydai jüzege asyryp jatyrsyz ba?
- Qazaqstandy kıtap oqityn elge ainaldyru missiiamyz oidaǧydai jüzege asyp jatyr dep aita alamyn. Oǧan dälel – künde bızge kelıp jatqan hattar. «Sızderdıŋ jobalaryŋyz arqyly qyzyǧuşylyǧym artyp, kıtap oqi bastadym», «mektebımızde, ortamyzda osyndai kıtap oqu şaralaryn jasadyq» degen siiaqty hattar kelıp jatyr.
Būl bızdıŋ eŋbegımızdıŋ kışkentai jemısı dep oilaimyn. Bız ıstemegende mūndai närseler bolmas pa edı degen oi keledı. Missiiamyz jüzege asyp jatyr, osylai jalǧasa beredı degen ümıtımız bar.
- Auylǧa kıtap jetkızetın jobaŋyzda qandai jaŋalyqtar bar? Nätijelermen bölısseŋız.
- Auylǧa Kitapal jobasy aiasynda 400-ge juyq kıtap jetkızdık. Biylǧy maqsatymyzǧa jettık. Būiyrsa, kelesı meje – 1000 auyl. Bızdıŋ erıktılerımız de, qoldauşylarymyz da köbeiıp jatyr. Sol üşın būl joba jalǧasyn tabady dep senemız.
- Jaqynda Kitapal club oqyrmandar klubymen ülken jiyn ötkızgelı jatyr ekensızder. Qandai nätije kütesız?
- Qaraşanyŋ 2-sı künı Kitapal club Qazaqstandaǧy eŋ ülken oqyrmandar qauymdastyǧynyŋ bır jyldyǧyn Astana qalasynda ötkızgelı jatyrmyz. Būl da bır ülken nätije. Oqyrmandarymyzdyŋ sany men sapasynyŋ artqanyn kütemız. Būl keşte tek Kitapalclub-tyŋ müşelerı ǧana emes, syrttan da keletın qonaqtar bolady. Sol üşın būl jaqsylyqty jaiu jobasy desek te bolady.
- Osy künge deiın jastar kıtap oqymaidy, qazaq tıldı kıtaptar oqityndar az degen sözderdı jiı estıp keldık. Qalai oilaisyz, elımızde kıtap oqu mädenietı qalyptasty ma?
- Elımızde kıtap oqu mädenietı qalyptasyp kele jatyr dep oilaimyn. Bızdıŋ jastyq şaqpen qazırgı jastardy salystyrsaq, qazır kıtap oqityndar köbırek dep aita alamyn. Bız dūrys baǧytta damyp kele jatyrmyz.
- Qatelespesem, är närsenı üiretetın kıtaptar jazylsa dep edıŋız. Kıtapty kez kelgen adam jazatyn bolsa, qūnyn joǧaltady dep oilamaisyz ba?
- Kıtapty kez kelgen adam jazady degendı meŋzemedım. Bız är salanyŋ mamany öz salasy boiynşa kıtap jazǧanyn qoldaimyz, qalaimyz jäne soǧan şaqyramyz. Bızdıŋ baǧytymyz sondai. Är adam, är maman öz salasy boiynşa kıtap jazsa bızde kıtap qory da, bılım qory da köbeietın edı. Jaqsylyq äkelmese, onyŋ eşqandai jamandyǧy joq.
- Kıtap oqu mädenietın arttyru üşın üşın mektepte, universitette reforma jasau kerek dep oilaisyz ba?
- Kıtap oqudy arttyru üşın ülken reforma jasaudyŋ qajetı joq dep oilaimyn. Tek kışkentai qadamdar men şeşımder qossa jetkılıktı bolar edı. Ol qandai deseŋız, är sabaqtyŋ basynda on minut kıtap oqu degen erejenı bekıtse, jemısın mındettı türde köremız.
- Elımızdegı kıtaphanalardy jandandyryp, jastardyŋ qyzyǧuşylyǧyn tudyru üşın ne ısteu kerek dep oilaisyz?
- Kıtaphanalardy jandandyru mäselesı boiynşa zamanaui kıtaptar qoryn jasaqtau kerek. Sosyn sol kıtaptardy oqyp, taldaityn oqyrman klubtardy köptep aşu qajet. Klubtardy türlı tättımen, şaimen bas qosuǧa qyzyqtyryp, yntalandyrsa degen ūsynysym bar.
- Jaqynda «Ne üşın üilenu kerek?» kıtabyŋyz qyrǧyz tılıne audaryldy. Būl qalai jüzege asty?
- İä, jaqynda audarylyp, 2000 dana bolyp basyldy. Qyrǧyz baspasynyŋ bırı audarsaq bola ma degen ötınış jasady. Söitıp kelısım-şart jasasyp, kıtapty audardy. Basyp şyǧaryp, taratyp jatyr. Qyrǧyz oqyrmandar jaqsy baǧa berıp jatyr. Menıŋ kıtaptarymnyŋ paidasy köp adamǧa tiıp jatqanyna quanyştymyn.
- Sūhbattasqanyŋyzǧa raqmet!
Merei Myrzaǧaliqyzy
«Adyrna» ūlttyq portaly
