Ūlytau oblysynda bırden 11 äkımge qatysty ıs qozǧaldy, dep habarlaidy “Adyrna” ūlttyq portaly.
QazTAG mälımetınşe būl aqparatty öŋırlık qadaǧalau organynyŋ baspasöz qyzmetı habarlady.
"Ūlytau oblysynyŋ mamandandyrylǧan tabiǧatty qorǧau prokuraturasy ekologiialyq zaŋnamany qoldanudy taldap şyqty. Nätijesınde, 66 I jäne II sanattaǧy operatorlardyŋ öndırıstık ekologiialyq baqylau nätijelerı turaly esepterdı qorşaǧan ortany qorǧau salasyndaǧy uäkılettı organǧa tapsyrmauynyŋ 125 faktısı anyqtaldy (Ekologiialyq kodekstıŋ 184-babynyŋ talaptaryn būzu). Olardyŋ arasynda jer qoinauyn paidalanuşylar, kommunaldyq käsıporyndar, auyldyq okrug äkımdıkterıne tiesılı qatty tūrmystyq qaldyqtar poligondary jäne basqalary bar. Būl öz kezegınde, uäkılettı organǧa öŋırdegı ekologiialyq jaǧdaidy obektivtı türde baǧalauǧa mümkındık bermedı. Osy faktıler boiynşa prokuratura Ūlytau oblysynyŋ Jaŋaarqa audanyna qarasty auyldyq okrugterdıŋ 11 äkımıne qatysty 20 äkımşılık qūqyq būzuşylyq turaly ıs qozǧady", – delıngen särsenbı küngı habarlamada.
Qylmystyq ıster QR ÄQBtK-nıŋ 327-1-baby (Qazaqstan Respublikasynyŋ ekologiialyq zaŋnamasynda közdelgen mındettı mälımetterdı ūsynu talaptaryn būzu) boiynşa qozǧaldy.
"Qazırgı uaqytta prokuraturanyŋ qadaǧalau aktısı boiynşa ekologiia departamentı qalǧan tabiǧat paidalanuşylardy äkımşılık jauapkerşılıkke tartu boiynşa şaralar qabyldauda", – delıngen habarlamada.
Sonymen qatar, Konstitusiialyq "Prokuratura turaly" zaŋ talaptaryn būzǧany üşın Ūlytau oblysy ekologiia departamentınıŋ, veterinariia, käsıpkerlık jäne önerkäsıp basqarmalarynyŋ basşylary QR ÄQBtK-nıŋ 664-baby (sottyŋ jeke qaulysyn, prokurordyŋ, tergeuşınıŋ nemese anyqtauşynyŋ ūiǧarymyn oryndau boiynşa şaralar qabyldamau), 665-baby (prokurorǧa, tergeuşıge jäne anyqtau organyna, sot oryndauşysyna kelmeu) jäne 666-baby (prokurordy habardar etpeu nemese uaqytyly habarlamau) boiynşa jauapkerşılıkke tartyldy.
"Bügıngı künı aiypty tūlǧalar salynǧan jalpy somasy 4,6 mln teŋge aiyppūldy tolyq kölemde töledı", – dep tolyqtyrdy prokuratura.
Eske sala ketsek, Ūlytau oblysynyŋ bırınşı äkımı Berık Äbdıǧaliev taiauda qyzmetınen bosaǧan bolatyn.
Ūqsas jaŋalyqtar
