Qarjylyq monitoring agenttıgınıŋ baspasöz qyzmetı «Kezbi» kompaniiasyna qatysty qarajatty jymqyru jäne salyq töleuden jaltaru faktılerı boiynşa sotqa deiıngı tergeu bastalǧanyn mälımdedı, dep habarlaidy «Adyrna» ūlttyq portaly.
Maŋǧystau oblysy boiynşa QMA departamentı «Kezbi» JŞS atqaruşy direktory Erjan Kezbaevqa qatysty, Qazaqstan Respublikasynyŋ Qylmystyq kodeksınıŋ 190-babynyŋ 4-bölıgı, 2-tarmaǧy («Asa ırı kölemdegı alaiaqtyq») boiynşa qylmystyq ıs qozǧady.
Ol «Özenmūnaigaz» AQ kompaniia qyzmetkerlerıne eŋbekaqy töleuge bölıngen 321 million teŋgenı jymqyrdy, jäne şamamen 1,5 milliard teŋge kölemınde salyq töleuden jaltardy degen küdıkke ılıngen.
«2021 jyly «Kezbi» JŞS «ÖzenMūnaiGaz» AQ-men brigada saǧatyna 65 myŋ teŋge baǧamen jöndeu jūmystaryn jürgızuge kelısımşart jasady. Keiın jūmysşylardyŋ jalaqysy men medisinalyq järdemaqyny arttyru maqsatynda qūny brigada üşın saǧatyna 87 myŋ teŋgege deiın ūlǧaityldy. Alaida, tergeu mälımetınşe, osy qarajattyŋ eleulı bölıgı, atap aitqanda 321 million teŋge, äleumettık jaǧdaidy jaqsartpai, kompaniia basşysy tarapynan jymqyrylǧan», - dep habarlady QMA.Bügın küdıktı Erjan Kezbaev qamauǧa alyndy. Qazırgı uaqytta jasalǧan qylmystyŋ män-jaiyn anyqtauǧa baǧyttalǧan tergeu şaralary jürgızılude. Qylmystyq ıs jürgızu kodeksınıŋ 201-babyna säikes özge mälımetterdı jariialauǧa bolmaidy.
