Keşeden berı Teŋızde taǧy da dauyl köterıldı. Jergılıktı halyq ekı talappen köşege şyqty. Bırınşısı Qytaidyŋ 55 zauytynyŋ Qazaq Jerıne kıruıne tiym salu. Ekınşı talap Jerdı satpaimyz. Osy ekı talappen Jaŋaözen keşeden şeruletıp jatyr. Halyq qyrküiektıŋ 11-12 künderıne josparlanǧan el prezidentı Qasym-Jomart Toqaevtyŋ Qytaiǧa saparynan bas tartuǧa şaqyrdy.
Keşe şeruge şyqqan jaŋaözendıkter bügın taǧy da jergılıktı äkımdık aldyna jinaldy. Qala äkımı Ädılbek Dauylbaev pen prokuratura, polisiia ökılderı tūrǧyndarǧa şerudı zaŋ aiasynda ötkızudı ūsyndy. Jaŋaözenge barǧan Maŋǧystau oblysynyŋ äkımı Serıkbai Tūrymov Qazaqstanda Qytai zauyttary salynbaitynyn aitqanymen jergılıktı tūrǧyndar äkımdı tyŋdamady.
Bızge habarlasyp, aty-jönın aitudan bas tartqan jaŋaözendık tūrǧynnyŋ aituynşa, Jaŋaözendegı bır kompaniiany Qytailar satyp alypty. Jaŋaözende qytailar bar ma? degen saualymyzǧa "bızde äzırge qytailar joq. Olar bügın kelmese de erteŋ keledı. Sol üşın jūrt köşege şyqty" dep jauap berdı.
Bügın Nūr-Sūltan, Şymkent pen Aqtöbe qalalarynda Jaŋaözendıkterdı qoldau aksiialary öttı. Şymkentte 20 şaqty adam maŋǧystaulyqtarmen bırge ekenın aityp, Ordabasy alaŋyna şyqty. Sondai-aq şymkenttıkter bilıktı Qytaidan alynǧan kredit pen ekıjaqty jasalǧan kelısım jaily aqparatty jariialauǧa şaqyrdy.
"Azattyqtyŋ" habarlauynşa bügın Nūr-Sūltanda da jaŋaözendıkterdı qoldau aksiiasy öttı. Jergılıktı tūrǧyndar Anna Şökeeva, Äliia Jakupova men Qaldyhan Qozybaeva Aqordaǧa baratyn jol boiyna "Qytai ekspansiiasyna jol joq", "Bız Jaŋaözenmen bırgemız", "Men jaŋaözendıkterdı qoldaimyn! Al sen şe?" degen jazuy bar plakattar ūstap şyqty. Olardy sol maŋnan ötıp bara jatqan kei adamdar da qoldap, pıkırlerın aityp jatty.
- Jaŋaözen ärqaşan Qazaqstannyŋ jan jarasy bolyp qalady. Sondyqtan da bız olardyŋ beibıt narazylyǧyna qoldau bıldırıp şyǧyp tūrmyz. 2011 jylǧy jeltoqsanda bolǧan jaǧdaidy eşkım de qaitalaǧysy kelmeidı dep oilaimyn, - dedı Äliia Jakupova 2011 jyly jeltoqsanda bırneşe aiǧa sozylǧan mūnaişylar ereuılıne polisiianyŋ oq atyp, qantögıske ūlasqanyn eske alyp dep habarlaidy "Azattyq" radiosy.
Elbasy Nūrsūltan Nazarbaev Qytai basylymdaryna bergen sūhbatynda Qytaidyŋ Qazaqstandaǧy 55 ırı jobasynyŋ 15-ı jūmysyn bastaǧanyn, 11 nysan biyl paidalanuǧa berıletının aitqan bolatyn.
"Adyrna" ūlttyq portaly
