Qaita qūru jäne damu jönındegı halyqaralyq bank Qazaqstanǧa 11 jylǧa qaryz beredı. Būl turaly zaŋ jobasyn Mäjılıs deputattary qarauǧa qabyldady, dep habarlaidy "Adyrna" ūlttyq portaly.
Mäjılıs deputaty Tatiana Savelevanyŋ aituynşa, Qazaqstan men Qaita qūru jäne damu jönındegı halyqaralyq bank arasyndaǧy qaryz turaly kelısımdı ratifikasiialau turaly zaŋ jobasy Ükımettıŋ 2024 jylǧy 18 qaraşadaǧy qaulysymen engızılgen. Kelısım 2024 jylǧy 11 qazanda Astanada jasalǧan.
"Qaita qūru jäne damu jönındegı halyqaralyq banktıŋ qaryzy Qazaqstan Respublikasyna 84,9 milliard ien (şamamen 270,8 milliard teŋge) somasynda 11 jyl merzımge berıledı. Qaryz qarajaty el ekonomikasynyŋ tūraqtylyǧyn qamtamasyz etu üşın respublikalyq biudjettıŋ bekıtılgen tapşylyǧyn qarjylandyruǧa jūmsalady", – dedı Tatiana Saveleva Mäjılıstıŋ jalpy otyrysynda.Qarjy jäne biudjet komitetı osy zaŋ jobasy boiynşa qorytyndy daiyndaidy.
