Astanada Ūlttyq akademiialyq kıtaphanada Qazaqstannyŋ Eŋbek Erı, Memlekettık syilyqtyŋ laureaty, qazaq ädebietınıŋ klassigı Äkım Tarazidyŋ esımı berılgen arnaiy zal aşyldy.
Sonymen qatar, belgılı jazuşynyŋ 13 tomdyq şyǧarmalar jinaǧynyŋ tūsaukeserı öttı.
Äkım Tarazidyŋ qazaq ädebietın damytuǧa jäne ūlttyq ruhaniiatty nyǧaituǧa qosqan ülesı öskeleŋ ūrpaq üşın ülgı. Jazuşynyŋ şyǧarmalary, audarmalary, pesalary men tarihi zertteulerı toptastyrylǧan būl köptomdyq – baǧa jetpes bılım közı.
Äkım Tarazidyŋ atyndaǧy jeke zal oqyrmandarǧa qazaq ädebietınıŋ klassikterı şyǧarmalarynyŋ jeke kıtaphanasyn, fotosuretter men jinaqtardyŋ keŋ auqymyn ūsynady.
Şaraǧa qatysqan Astana qalasy Mäslihatynyŋ töraǧasy Erlan Kanalimov "Toqsannyŋ törıne şyǧyp, ūlt ruhaniiatynyŋ abyz aqsaqalyna ainalyp otyrǧan aǧamyzǧa bar jyly lebızımdı tılei otyryp, jastan jasqa, jaqsylyqtan jaqsylyqqa quanyşpen jete berıŋız degım keledı! El aǧalary aman bolsyn!"- dep, ızgı tılegın bıldırdı.
